भक्तपुर– भक्तपुर सूर्यविनायकस्थित पाण्डु बजारमा आज साँझ टिप्परको ठक्करबाट मोटरसाइकल चालकको मृत्यु भएको छ।
_x000D_
_x000D_
मृत्यु हुनेमा काभ्रेपलाञ्चोक नमोबुद्ध डराउने पोखरीका २५ वर्षीय रामकृष्ण श्रेष्ठ रहेका छन्। काभ्रेपलाञ्चोकबाट काठमाडौंतर्फ जाँदै गरेको बा४ख ३६५० नम्बरको टिप्परले सोही दिशातर्फ जाँदै गरेको बा८८प ८५२ नम्बरको मोटरसाइकललाई ठक्कर दिँदा श्रेष्ठको घटनास्थलमै मृत्यु भएको महानगरीय प्रहरी परिसर भक्तपुरले जनाएको छ।
_x000D_
_x000D_
प्रहरी परिसर भक्तपुरका अनुसार साँगाबाट ६ बजे छुटेर तीब्र गतिमा आएको टिप्परले मोटरसाइकललाई ठक्कर दिएको थियो। ठक्कर दिएपछि टिप्परका चालक भने फरार भएका थिए। ठक्करबाट मोटरसाइकल चालकको मृत्यु भएपछि आक्रोसित भीडले टिप्परमा आगो लगाइदिएका छन्। आगलागीका कारण टिप्परमा पूर्णरुपमा क्षति पुगेको छ।
_x000D_
_x000D_
आगो नियन्त्रणका लागि आएका प्रहरीले भीड हटाउन खोज्दा आक्रोसित भीडले नाराबाजी गरेपछि प्रहरीले लाठीचार्ज गरेको स्थानीय हरिशरण थापाले बताए। प्रहरीको लाठीचार्जबाट आक्रोसित भीडले ढुङ्गा हानेपछि सूर्यविनायक क्षेत्र राति साढे ८ बजेसम्म तनावग्रस्त बनेको थियो।
_x000D_
_x000D_
आगो नियन्त्रण गर्न आएको दमकललाई समेत भीडले ढुङ्गा हानेर तोडफोड गरेपछि प्रहरीले भीडलाई नियन्त्रणमा लिन अश्रुग्यास प्रहार गरेको छ। स्थानीयका अनुसार प्रहरीले १५ सेलभन्दा बढी अश्रुग्यास प्रहार गरेको हो। राति ८ः३० बजेसम्म अश्रुग्यास हानेर भीड तितरवितर बनाएपछि दमकलले आगो निभाएको छ।
_x000D_
_x000D_
घटनामा प्रहरीको व्यापक लापर्बाही : स्थानीय
_x000D_
_x000D_
घटनालाई शान्तिपूर्ण रुपमा नियन्त्रणमा लिन सकिने भए पनि प्रहरीको लापर्बाहीका कारण सूर्यविनायक क्षेत्र तनावग्रस्त बनेको स्थानीय बासिन्दाले दाबी गरेका छन्। प्रहरीले राति घर जान लागेका, पसल सञ्चालन गरेको व्यापारीदेखि सुत्केरी महिला समेतलाई अन्धाधुन्दा लाठीचार्ज गरेको स्थानीयले बताएका छन्।
_x000D_
_x000D_
स्थानीय प्रत्यक्षदर्शी सावित्री पोखरेलले प्रहरीले बच्चा बोकेको सुत्केरी महिलालाई समेत लाठी प्रहार गरेको बताइन्। उनले भनिन्, ‘ढुङ्गा हान्ने भागे, सोझा र निर्दोषमाथि प्रहरीले लाठी र अश्रुग्यास बर्सायो, टाढा–टाढा घर जानेको कन्तबिजोग बनायो, धेरै घाइते भए।’
_x000D_
_x000D_
प्रहरीले घरको छतछतमा समेत अश्रुग्यास हानेको स्थानीय सुरेन्द्र बोगटीले जानकारी दिए। उनका अनुसार प्रहरीको लापर्बाहीका कारण स्थानीयदेखि घर जान हिँडेका नागरिकसमेतले अनावश्यक सास्ती खेपेका हुन्।
_x000D_
_x000D_
आक्रोसित भीडले गरेको ढुङ्गा प्रहारका कारण दमकल तोडफोड हुनुका साथै दमकलका कर्मचारीसमेत घाइते भएको र केही प्रहरी घाइते भएको प्रहरी परिसर भक्तपुरले जानकारी दिएको छ। प्रहरीको लाठीचार्ज र अश्रुग्यासबाट कति घाइते भए भन्ने यकिन तथ्याङ्क नआए पनि जिल्लामा विभिन्न अस्पतालमा घाइतेको उपचार भइरहेको स्थानीय प्रत्यक्षदर्शीले जानकारी दिएका छन्।
_x000D_
_x000D_
दिउँसै चल्यो टिप्पर
_x000D_
_x000D_
भक्तपुरमा आज दिउँसो १२ बजेदेखि नै टिप्पर सञ्चालनमा आएको स्थानीय बासिन्दा बताउँछन्। स्थानीय सञ्जय श्रेष्ठले यसअघि साँगाबाट ६ बजे टिप्पर आउने गरे पनि आज प्रहरी प्रशासनकै मिलेमतोमा टिप्पर १२ बजेदेखि सञ्चालनमा आएको स्थानीयको आरोप छ।
_x000D_
_x000D_
सरकारको निर्णयविपरीत दिउँसो टिपर सञ्चालन गर्न दिएको भन्दै स्थानीयले प्रहरी र प्रशासनप्रति आक्रोस व्यक्त गरेका छन्।
_x000D_
_x000D_
यता काठमाडौं उपत्यकामा बिहान ७ बजेदेखि साँझ ७ बजेसम्म टिप्पर चलाउन नपाउनेगरी नयाँ व्यवस्था कायम गरिएको छ। यसअघि दुर्घटना न्युनिकरण गर्न भन्दै महानगरीय ट्राफिक प्रहरीले बिहान ८ बजेदेखि अपरान्ह ५ बजेसम्म उपत्यकामा टिप्पर चलाउन निषेध गरेको थियो। रासस
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
