काठमाडौं- चितवनमा बोरा भित्र प्याक गरेर फ्याँकिएको अवस्थामा महिला र पुरुषको शव भेटिएको डेढ महिनापछि हत्याकाण्ड सुल्झिएको छ। लामो समयसम्म पहिचान हुन नसकेका ती दुईको शवको पहिचान मात्र भएको छैन, त्यसका अभियुक्त समेत प्रहरीले पत्ता लगाएको छ। अभियुक्त पत्ता लागेसँगै यो घटनाको पटाक्षेप भएको छ।
जिल्ला प्रहरी कार्यालय चितवन र केन्द्रीय अनुसन्धान ब्यूरो (सीआईबी) समेतको संयुक्त टोलीले डेढ महिनापछि यो घटना सुल्झाएको हो। बोरा भित्र प्याक गरेको अवस्थामा मृत भेटिका दुई शव भारतीय नागरिकको रहेको खुलेको छ। मृत भेटिएका पुरुष भारतको मोतिहारी फुलबारीया, सुगौलीका १९ वर्षीय ऋषभकुमार कुशवाह र महिला सुगौली चम्पारणका ३० वर्षीय अस्मिता भनिने सन्जु देवी रहेको खुलेको छ।
उनीहरु दुवै जनाको हत्या गर्ने व्यक्ति भारतीय नागरिक सुगौली पूर्व चम्पारणका ३३ वर्षीय अखिलेश भगत हुन्। मृतक दुई जना र हत्या आरोपित एकै परिवारका व्यक्ति हुन्। सन्जु देवी अखिलेशकी श्रीमती हुन् भने ऋषभकुमार उनका भतिजा हुन्। अर्थात् अखिलेशले आफ्नै श्रीमती र भतिजको हत्या गरेको सीआईबीका प्रवक्ता तथा एसपी नवराज अधिकारीले बताए।
यी दुईको हत्यामा विवाहपछिको अवैध सम्बन्ध रहेको खुलेको छ। विवाहपछि आफ्नै भतिजसँग अवैध सम्बन्ध राखेको पाएपछि अखिलेशले हत्या गरेको खुलेको छ।
हत्या गरिएका व्यक्ति तथा हत्या आरोपित सबै जना नेपालमा फलफूलको व्यापारका आउने-जाने गर्थे। सोही क्रममा ऋषभ र सन्जु गत दशैंमा अन्तिम पटक नेपाल आई चितवनमा बसेका थिए। चितवनस्थित काका नाता पर्नेको घरमा कोठा लिएर उनीहरु (भतिज ऋषभ र उनका काकी सन्जु) बसेका थिए। काकी भतिजको नाता भए पनि उनीहरुबीच श्रीमान्-श्रीमतीबीचको जस्तो सम्बन्ध रहेको थियो।
चितवन गएर भतिजसँग बसेको भन्ने जानकारी पाएपछि हत्या गर्ने योजना बनाएर अखिलेश चितवन पुगेका थिए। गत मंसिर २ गते राति अखिलेशले उनीहरु भाडामा बस्दै आएको काठामै दुवै जनाको हत्या गरेको पाइएको एसपी अधिकारीले बताए। राति हत्या गरेर जुटको बोरामा शव प्याक गरेर उनले व्यवस्थापन गरेका थिए। राति १२:४५ बजे र १:१२ बजेको समयमा दुई पटक गरेर साइकलमा शव राखेर अखिलेशले कल्भर्टमा लगेर फालेको सीसीटीभी फुटेजमा समेत देखिएको एसपी अधिकारीले बताए।
हत्यापछि साइकलमा शव राखेर व्यवस्थापन गरेको त्यसको ३ दिनपछि मंसिर ६ गते बल्ल चितवन महानगरपालिका–९ मिलनचोकको कल्भर्टमा बोरा भित्र महिला र पुरुषको शव भेटिएको थियो।
सीसीटीभी फुटेजमा केही हुलिया देखिए पनि शव पहिचान नहुँदा प्रहरीले हत्यारा पक्राउ गर्न सकेको थिएन। त्यसका लागि सुरुमा मृत भेटिएका महिला र पुरुषको शव पहिचान हुन नसकेपछि शवसँगै भेटिएका कपडा तथा विभिन्न हुलियाहरु सार्वजनिक गर्दै हुलियासँग मेल खाने व्यक्ति हराएको भए खबर गर्न प्रहरीले अनुरोध गरेको थियो। मृत भेटिएका पुरुषको शरीरमा निलो रङको कट्टु, कलेजी रङको पेन्टी, सेता रङको सेन्डो रहेको हुलिया उल्लेख गरिएको थियो।
महिलाको शरीरमा प्याजी रङको लेगिन्ज, रातो पहँलो मिसिएको सल, माला, कानमा झुम्का, बाँया हातमा ए, एम, वाई र एसजस्तो आकारको ट्याटु रहेको भन्दै प्रहरीले हुलिया सार्वजनिक गरिएको थियो।
हुलिया र स्केच सार्वजनिक गरेको करिब डेढ महिनापछि शवको पहिचान भएर हत्यारा समेत पत्ता लाग्यो।
हत्यापछि मंसिर १६ आफू फरार भएर भारत पुगेको अखिलेशले बताएका छन्। नेपालमा दुई जनाको हत्या गरेका अखिलेश नेपाल प्रहरीको हिरासतमा नभएर अहिले भारतीय प्रहरीको हिरासतमा छन्। उनले भारतमा समेत अपहरण तथा व्यक्ति बेपत्ता पारेको आरोप छ। उनी विरुद्ध अहिले प्रहरी थाना सुनौली बिहारमा अपहरण तथा व्यक्ति वेपत्ता सम्बन्धी एफआईआर दर्ता भएको छ। सोही क्रममा यही पुस १६ गते उनलाई भारतीय प्रहरीले पक्राउ गरेर अनुसन्धान गरिरहेको छ।
हाल उनलाई भारतको केन्द्रीय कारागृहमा राखिएको छ। नेपालमा समेत दुई जना आफ्नै श्रीमती र भतिजको हत्या गरेको पाइएपछि भारतीय प्रहरीसँग समन्वय गरेर उनको बयान लिइएको एसपी अधिकारीले बताए। प्रहरीको बयानका क्रममा अखिलेशले आफ्नै श्रीमती र भतिजको हत्या गरेको समेत स्वीकार गरेका छन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1791087676.png)
-1786602170.png)
