काठमाडौं– महिला तथा बालबालिकामाथि सबैभन्दा धेरै मधेश प्रदेशमा हिंसा हुने गरेको पाइएको छ। अनौपचारिक क्षेत्र सेवा केन्द्र(इन्सेक)ले गरेको अनुगमनमा सबैभन्दा धेरै मधेश प्रदेशमा धेरै घटना भएको पाइएको हो।
२०२३ नोभेम्बर २५ देखि डिसेम्बर १० सम्म महिला तथा बालिकाविरूद्धका घटनाहरुको अभिलेखमा मधेश प्रदेशमा २६ वटा घटना भएको पाइएको छ। त्यसपछि बागमती प्रदेशमा हुने गरेको पाइएको छ। ६२ वटा घटनामध्ये बागमतीमा १२ वटा दर्ता भएको इन्सेकले जनाएको छ।
यस्तै लुम्बिनीमा ११, गण्डकीमा ५, कोशीमा ४, कर्णाली र सुदुर पश्चिममा २/२ वटा घटना भएको इन्सेकको तथ्यांकमा उल्लेख छ। इन्सेकले महिलामाथि हुने हिंसा रोक्न तीनै तहका सरकारको जागरूकता आवश्यकता रहेकोमा जोड दिएको छ।
लैङ्गिक हिंसाविरूद्धको १६ दिने अभियानको १६ दिनमा इन्सेक अनलाइनमा प्रकाशित समाचारका आधारमा महिला तथा बालिकाविरुद्ध भएका हिंसासम्बन्धी घटनाको अध्ययन प्रतिवेदन जारी गर्दै इन्सेकले महिला अधिकारको रक्षार्थ सरकारको जागरूकतामा जोड दिएको हो।
‘महिला अधिकारको रक्षाका लागि लागु गरिएका कानुनहरूको कार्यान्यवनमा तीनै तहका सरकारको जागरुकता आवश्यक रहेको छ,’ प्रतिवेदनमा उल्लेख छ। इन्सेकका अध्यक्ष डा कुन्दन अर्यालद्वारा मङ्सिर २५ गते जारी प्रतिवेदनमा भनिएको छ, ‘महिलासँग सम्बन्धित कानुनी प्रावधान एवम् राजनीतिक सहभागितामा क्रमशः भएको वृद्धि सकारात्मक छ। तर, विभिन्न खाले संरचनात्मक एवम् लैङ्गिक हिंसाबाट महिला तथा लैङ्गिक अल्पसङ्ख्यक पीडित हुँदै आएका छन्।’
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
