काठमाडौं– पूर्वराजदूत केशवराज झाको बवरमहलस्थित आफ्नै निवासको एउटा एकान्त कोठामा रहस्यमय तरीकाले हत्या भएको दुई हप्ता बढी भयो। ३ भदौको राति चक्कु प्रहारबाट ८० बर्षिय झाको निर्मम हत्या भएको थियो। तर, प्रहरीले अहिलेसम्म अपराधको गुत्थी पहिल्याउन सकेको छैन।
‘अपराधको अनुसन्धान भइरहेको छ, अहिल्यै यही हो भनेर हामी सूचना दिने अवस्थामा छैनौं’ अनुसन्धानको नेतृत्व गरिरहेका महानगरीय अपराध अनुसन्धान महाशाखाका एसपी सोमेन्द्र राठौरले लाचारी प्रकट गरे, ‘अनुसन्धानमा प्रगति भइरहेको छ भनेर पनि भन्ने अवस्थामा छैनौं। हाम्रो सूचना कि जीरो हुन्छ, कि अनुसन्धान पुरा भएको विवरण।’
देशमा बलात्कार जस्ता जघन्य अपराध सतहमा आइरहेका र गृहमन्त्रालय स्वयं आफ्नै हर्कतका कारण विवादित बनिरहेका बेला पूर्वराजदूत झा हत्या प्रकरणको अनुसन्धानमा प्रहरीलाई कुनै दवाव छैन। यद्यपी प्रहरीले घटनाको सुक्ष्म अनुसन्धान भइरहेको दाबी गरेको छ।
हामीले अनुसन्धानमा रहेका प्रहरीलाई सोध्यौं, ‘हाइप्रोफाइल हत्या भएको दुई हप्ता वित्यो। त्यो पनि देशकै राजधानीमा। यो बीचमा तपाईँहरुले गर्नुभयो के?’
प्रहरीले घटनाको अनुसन्धानमा कुनै कसर बाँकी नराखिएको दाबी गरेको छ। उसका अनुसार झा हत्या प्रकरणमा पक्राउ परेका ३ जनाको गएको बुधबार ‘पोलिग्राफ’ परीक्षण गरिएको छ। झाको घरमा काम गर्ने एक सहयोगी र दुई जना मालीलाई महाशाखाका प्रहरीले घटनास्थलको मुचुल्का उठाइसकेपछि नियन्त्रणमा लिएका थिए।
प्रहरीले आफ्नो कब्जामा लिएका झाको घरमा काम गर्ने सहयोगीहरुको प्रारम्भिक बयान चित्त बुझ्दो नभएकाले ‘पोलिग्राफ’ परीक्षण गरेको हो। तर यसको रिपोर्ट भने प्रहरीले लुकाएको छ। अनौपचारीक कुराकानी गर्दा प्रहरीहरु झाका सहयोगीहरुको ‘पोलिग्राफ’ परीक्षणको रिपोर्टबाट त्यत्ति उत्साही छैनन्।
प्रहरीले घटनास्थलबाट जे जे सामग्रीहरु प्रमाणका रुपमा संकलन गरेको थियो, त्यसको प्रारम्भिक अनुसन्धानबाट पनि प्रहरी निरास देखिन्छ। चक्कु जुन पूर्वराजदूत झाको टाउकोमा प्रहार भएको भनिएको छ, त्यसको ‘ल्याव टेष्ट’ गर्दा त्यसमा कसैको ‘फिङ्गर प्रिन्ट’ भेटिएन। ‘सम्भवत पञ्जा लगाएर हत्या गरिएको हो, बरामद भएका पञ्जाहरुमा दह्रो प्रमाण सामग्री बनेनन्’ अनुसन्धानमा सहभागी एक प्रहरीले नेपाल लाइभलाई बताए, ‘अहिलेसम्म हामीलाई उत्साही गराउने प्रकारको प्रमाण जुटेको छैन।’
अनुसन्धानको सुई सही दिशामा छ कि छैन भन्नेमा प्रहरी अन्योलमा छ। झा हत्या प्रकरण केही विशिष्ट कारणले गर्दा पनि रहस्यमय छ। रहस्य अव प्रहरीका लागि जटिलतामा अनुदित हुँदै गइरहेको छ।
प्रहरीको अनुसन्धान अहिलेसम्म कुन कुन प्रश्नलाई केन्द्रमा अघि बढेको थियो त? खासमा जटिलता कहाँ छ?
झाको परिवार एउटा सम्पन्नशाली परिवार हो। घरमा एक छोरी र छोराबुहारी छन् जो विदेशमा काम गर्छन्। स्वदेश आएका छोराबुहारी घटनाको दुई दिन अघिमात्र विदेश गएका थिए। झाकी एक छोरी विदेशमा नै छिन् भनिएको छ। घरमा श्रीमती मात्र छिन्।
झाको घरमा दुई वटा गेट छन्। पश्चिमतर्फको ढोका खुल्ने गरेको छ भने पूर्वतर्फको सधैं बन्द। घटना भएको रात पश्चिमको गेट पनि बन्द थियो। घरमा प्रवेश गर्ने अर्काे ढोका भनेको छतको हो। त्यो पनि बन्द थियो।
त्यो अवस्थामा हत्यारा कसरी घरभित्र प्रवेश गरे? प्रहरीले प्रश्नको यही विन्दूबाट अनुसन्धान सुरु गरेको थियो तर अहिलेसम्म यही प्रश्नको जवाफ भेटिएको छैन।
पहिलो तलामा रहेको कोठको झ्यालको जाली काटिएको भनिएको छ जुन कोठमा झाकी श्रीमती सुतेकी थिइन् भनिएको छ। त्यहीबाट हत्यारा प्रवेश गरेको अनुमान प्रहरीको छ। तर, जाली छिनाल्दा समेत श्रीमती झाले किन केही थाहा पाइनन्? यो आफैमा अनौठो प्रश्न छ।
हत्यामा संलग्न व्यक्तिहरुले झाको घरबाट केही नलिई गएका छन्। जसले हत्याकै लागि उनीहरु गएको जस्तो पनि देखिन्छ। कसैसँग पनि रिसराग र झैझगडाको पहलु फेला नपारेको प्रहरीले झाको हत्या किन र कसरी गरियो भन्ने आश्चर्यलाई सल्टाउन सकेको छैन।
घटनास्थलको परिदृश्यले पनि प्रहरीलाई अचम्ममा पारेको छ । झ्यालमा रहेको किताबमा समेत रगत पुग्ने गरी झामाथि चक्कु प्रहार भएको छ। तर, घटनास्थलभन्दा बाहिर भने रगतको कतै प्रमाण भेटिन्न। प्रहरीले यही आधारमा पनि घटनामा पेशेवर अपराधीको हात हुन सक्ने अनुमान गरेको छ।
अर्को आश्चर्य के भने, झाको घरमा एउटा कुकुर रहेछ जसलाई उनको निकै माया गर्थे भनिएको छ। हत्याको रात अपराधीहरु बन्द गेट छलेर घरभित्र प्रवेश गर्दा र झ्यालको जाली काट्दा समेत कुकुरले किन कुनै प्रतिक्रिया दिएन? या दिएर पनि घरमै रहेकी झाकी श्रीमतीले किन थाहा पाइनन्?
अनुसन्धानमा रहेका प्रहरीहरुका अनुसार यो रहस्यमयी घटनामा अनौठा र जटिल पक्षहरु देखिएका छन्। तर अनुसन्धानको प्रक्रियाले अपेक्षाकृत परिणाम भने हात लाग्न सकेको छैन।
‘अनुसन्धानको दायरा अलिक फराकिलो हुँदै जान सक्छ’ महाशाखा स्रोत भन्छ, ‘कतिपय कुरामा परिवारका सदस्यहरु पनि छानबिनको दायरामा आउन सक्छन्। र, अहिले नै यो घटनाबारे यस्तो भयो भन्न सकिने अवस्था छैन।’
प्रहरीले अहिलेसम्म अनुसन्धानमा परम्परागत प्रक्रिया अपनाएको देखिन्छ। प्रहरी स्वयंले पूर्वराजदूत केशव झाको हत्यालाई उपत्यामाका भएका एकदम कम रहस्ययी हत्यामध्ये एक स्विकारेको छ। घटनाको जटिलता स्विकार गरिसकेपछि यो अपराधको अनुसन्धान पुरानै विधीबाट गरिनुले प्रहरी सृजनशील हुन नसकेको भने स्पष्ट छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
-1786513116.png)
-1788425345.png)
