अनुसन्धान

कोरियामा हुने स्वास्थ्य बीमाको कार्यक्रमलाई स्वास्थ्य मन्त्रालयले बनायो ‘विदेश भ्रमण’

उच्च अधिकारी बोलाइएकोमा १ नासुसहित ५ जना अहेब, बीमा बोर्ड नै बाइपास

डिबी खड्का शुक्रबार, साउन १९, २०८० १८:३७

काठमाडौं– स्वास्थ्य बीमा कार्यक्रमलाई प्रभावकारी बनाउन स्वास्थ्य तथा जनसंख्या मन्त्रालय र बीमा बोर्डका नीतिगत तहका कर्मचारीलाई लक्षित गर्दै दक्षिण कोरियाले तयार गरेको ‘कोर्स’लाई स्वास्थ्य तथा जनसंख्या मन्त्रालयले ‘विदेश भ्रमण’ बनाएको छ। स्वास्थ्य तथा जनसंख्या मन्त्रालयले मनोनयन गराएर अर्थ मन्त्रालयको अन्तर्राष्ट्रिय आर्थिक समन्वय शाखामा पठाएको सूचीमा मन्त्रालयका अधिकारीले कार्ययोजना र त्यसले लिएको लक्ष्य लत्याउँदै निकटस्थहरुलाई ‘भ्रमण’का लागि छनोट गरेका देखिएको छ।

मन्त्रालय र बीमा बोर्डका माथिल्लो तहका कर्मचारी सहभागी हुनुपर्ने त्यसका लागि तयार कार्ययोजनामा स्पष्ट रुपमा उल्लेख गरिएको छ। तर कोरिया भ्रमणमा जाने कर्मचारीहरुको सूचीमा स्वास्थ्य मन्त्रालयका उच्च पदस्थ अधिकारीहरुका निकटकस्थहरु बढी परेका पाइएको छ।

साउन १५ गते भएको सचिवस्तरीय निर्णयले यसको मुख्य सरोकारवाला निकाय स्वास्थ्य बीमा बोर्डलाई समेत बाइपास गरिएको छ। १५ जनाको टोलीमा उक्त निकायबाट १ जना अहेब मात्रै समेटिएका छन्। आगामी सेप्टेम्बर ३ देखि १२ सम्म दक्षिण कोरियामा उक्त कार्यक्रम हुँदैछ।

उक्त भ्रमणमा मन्त्रालयकै २ जना उपसचिव बाबुराम घिमिरे र कृष्ण थापा रहेका छन्। स्वास्थ्य तथा जनसंख्या मन्त्री मोहन बस्नेतका स्वकीय सचिव विक्रम श्रेष्ठको नाम समेत उक्त कार्यक्रमका लागि छनोट गरिएको छ। लेखा अधिकृत मानबहादुर बुढा र नायब सुब्बा (स्टोर शाखा) लिलम बिकसमेत गरी ५ जना स्वास्थ्य मन्त्रालयबाट सहभागी छन्।

स्वास्थ्य बीमा बोर्डबाट पाँचौं तहका अहेब भगवान रेग्मीलाई मात्रै समेटिएको छ। वीर अस्पतालमा कार्यरत अहेब नवराज श्रेष्ठ, डडेलधुरामा कार्यरत टंकप्रसाद पन्त, भरतपुर अस्पतालका लिलाधर पौडेल र अहेब गोपालप्रसाद पाण्डे रहेका छन्।

पहिल्यै तय गरिएको यो कोर्समा सन् २०२३ मा माथिल्लो तहका कर्मचारी सहभागी हुने उल्लेख छ। मध्यमस्तर र कार्यक्रम सञ्चालन गर्ने तहका कर्मचारीले यसअघि अनलाइनमा उक्त तालिम लिइसकेका छन्। मध्यम र कार्यक्रम तहका कर्मचारीलाई सन् २०२४ मा कोरिया भ्रमण गराउने स्पष्ट उल्लेख छ।

स्पष्ट रुपमा टार्गेट ग्रुप उल्लेख गरेर हुने गतिविधि समेत त्यहाँ समेटिएको छ। नेपाल र कोरियाका नीतिगत तहका कर्मचारीबीच स्वास्थ्य बीमा प्रभावकारितका विषयमा यसपटक छलफल तथा साझेदारी हुनेछ। नेपाल र कोरियाका अधिकारीबीच उच्च तहको संवाद पनि भनिएको छ।

छनोट भएका कतिपयको योग्यता समेत पुग्ने देखिँदैन। उक्त कार्यक्रमको सहभागी अनिवार्य रुपमा सरकारी कर्मचारी हुनुपर्ने लेखिएको छ र सम्बन्धित क्षेत्रमा ५ वर्षको अनुभव पनि जरुरी हुने लेखिएको छ।