काठमाडौं– आगामी चैत्र ५ गते हुने स्वतन्त्र विद्यार्थी युनियन (स्ववियु) निर्वाचनलाई लक्षित गर्दै तीन दलका विद्यार्थी संगठनले तालमेलका लागि कार्यदल बनाएका छन्।
नेपाली कांग्रेस निकट नेपाल विद्यार्थी संघ, नेकपा एकीकृत समाजवादी निकट अनेरास्ववियू र सत्ताको नेतृत्व गरिरहेको नेकपा माओवादी केन्द्र निकट अनेरास्ववियु क्रान्तिकारीले तीन सदस्यीय कार्यदल बनाएका छन्।
कार्यदलमा नेविसंघका तर्फबाट दिनेशकुमार शाही, अखिल क्रान्तिकारीका तर्फबाट क्षितिज सापकोटा र अनेरास्ववियुका तर्फबाट हिरेन्द्र शाही सदस्य रहेका छन्।
पुरानो दलीय गठबन्धनलाई एक ठाउँमा ल्याउने र विद्यार्थीहरू राजनीतिमा ऐक्यबद्धता ल्याउने सन्देशसहित एक साताअघि नै कार्यदल बनाइएको कार्यदलका सदस्य तथा नेविसंघका नेता दिनेशकुमार शाहीले बताए।
नेपाललाइभसँग कुरा गर्दै उनले भने, ‘त्रिविका आंगिक क्याम्पस वा सम्बन्धन प्राप्त क्याम्पसहरुमासमेत तालमेल गर्ने वा गठबन्धन नै गर्ने भन्ने विषयमा छलफल भइरहेको छ। एक दुई दिनमै ठोस निर्णय सार्वजनिक गर्छौं।’
नेता शाहीले मातृ पार्टीहरू संसद् विघटनपश्चात् एकै ठाउँमा रहेर काम गरेको, संघ र प्रदेशमा चुनावी गठनबन्धनसहित एक ठाउँमा रहे पनि सरकार गठनका क्रममा त्यो कायम हुन नसकेकाले पार्टीहरुलाईसमेत एक ठाउँमा ल्याउनेगरी स्ववियु निर्वाचनका लागि तालमेल गर्न लागेको जानकारी दिए।
स्ववियु निर्वाचनमा एमाले निकट अनेरास्ववियुलाई पराजित गर्नका लागि तालमेलको प्रायस भइरहेको उनको भनाइ छ। यस्तै माओवादीको विद्यार्थी संगठन अनेरास्ववियु क्रान्तिकारीका तर्फबाट कार्यदलमा सदस्य रहेका क्षितिज सापकोटाले स्ववियु निर्वाचनमा तालमेल गर्नकै लागि कार्यदल बनाइएको जानकारी दिए।
उनले भने, ‘कार्यदलमा एक/दुईपटक छलफल भइसकेको छ। स्ववियुमा मिलेर जाने सहमति भइसकेको छ। निचोडमा भने पुग्न सकेका छैनौं’
नेता सापकोटाले खासगरी प्रतिगमनकाविरूद्व एक जुट भएर हिजो सडकमा आएका विद्यार्थीहरूबीच तालमेल भएको दाबी गरे। प्रतिगमन, एमसीसी र शैक्षिक माफियाविरुद्धको आन्दोलनमा सडकमा सँगै रहेर दलहरु र संगठनहरुले आन्दोलन गरेकाले आगामी दिनमा पनि त्यसलाई निरन्तरता दिन तालमेल गर्न लागेको उनको भनाइ छ।
उनले तीन सदस्यीय कार्यदलभित्र भएको सहमतिलाई पछि संगठनका अध्यक्षसँग परामर्श र छलफल गरेपछि सार्वजनिक गरिने बताए। कुन क्याम्पसमा कसको बाहुल्यता छ, कसलाई उठाउँदा निर्वाचन जित्न सकिन्छ त्यसलाई नै उम्मेदवार बनाउने गरी तीनवटा संगठनभित्र छलफल भइरहेको उनले बताए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
-1770562345.jpg)
