एजेन्सी — अमेरिकी राष्ट्रपति डोनाल्ड ट्रम्पको रिपब्लिकन पार्टी मध्यावधि निर्वाचनमा पराजित भएको छ। अमेरिकी कंग्रेसका दुवै सदन प्रतिनिधिसभा र सिनेटमा विपक्षी डेमोक्र्याटिक पार्टीले बहुमत हासिल गरेको छ।
निर्वाचनको प्रारम्भिक नतिजाअनुसार प्रतिनिधिसभाका ४३५ सिटमध्ये डेमोक्र्याटिक पार्टीले २२८ सिट जितेको छ भने ट्रम्पको रिपब्लिकन पार्टीले १३९ सिटमा जित हासिल गरेको छ। बाँकी ६८ सिटको नतिजा आउन बाँकी छ।
प्रतिनिधिसभामा बहुमतका लागि २१८ सिट आवश्यक पर्छ। डेमोक्र्याटिक पार्टीले यो संख्या पार गरेसँगै तल्लो सदनमा रिपब्लिकन पार्टीको बहुमत गुमेको छ।
त्यस्तै, माथिल्लो सदन सिनेटमा पनि डेमोक्र्याटिक पार्टीले बहुमत हासिल गरेको छ। सिनेटका कुल १०० सिटमध्ये यसपटक ३५ सिटका लागि निर्वाचन भएको थियो। तीमध्ये ३३ सिटको नतिजा सार्वजनिक हुँदा डेमोक्र्याटिक पार्टीले २० र रिपब्लिकन पार्टीले १३ सिट जितेका छन्। बाँकी दुई सिटको मतगणना जारी छ।
यससँगै सिनेटमा डेमोक्र्याटिक पार्टीको पक्षमा ५४ सिट पुगेको छ भने रिपब्लिकन पार्टी ४४ सिटमा सीमित भएको छ। सिनेटमा बहुमतका लागि ५१ सिट आवश्यक पर्छ। डेमोक्र्याटिक पार्टीले दुई स्वतन्त्र सिनेटरको समर्थनसहित बहुमत कायम गरेको हो।
यसअघि अमेरिकी कंग्रेसका दुवै सदनमा ट्रम्पको दल रिपब्लिकन पार्टीको बहुमत थियो। मध्यावधि निर्वाचनको परिणामसँगै ट्रम्पले आफ्नो कार्यकालको बाँकी दुई वर्षमा संसद्मा विपक्षी दलको चुनौती सामना गर्नुपर्ने भएको छ।
यसैबीच, अमेरिकाका ३६ राज्यमा गभर्नर चयनका लागि पनि निर्वाचन भएको थियो। सार्वजनिक प्रारम्भिक नतिजाअनुसार ३४ राज्यको परिणाम आउँदा डेमोक्र्याटिक पार्टीले २२ र रिपब्लिकन पार्टीले १२ राज्यमा जित हासिल गरेका छन्। बाँकी दुई राज्यको मतगणना जारी छ।
अमेरिकामा राष्ट्रपतिको चारवर्षे कार्यकालको मध्यबिन्दुमा हुने निर्वाचनलाई मध्यावधि निर्वाचन भनिन्छ। यस निर्वाचनबाट कंग्रेसका दुवै सदनका सदस्य तथा विभिन्न राज्यका गभर्नर चयन हुन्छन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
