धनगढी– कैलालीको गोदावरी नगरपालिकाको मुख्य बजारमा सुन व्यवसायीमाथि गोली प्रहार गर्ने व्यक्तिहरु अहिलेसम्म पक्राउ परेका छैनन्। प्रहरीले अनुसन्धान तीव्र बनाए पनि आक्रमणकारी पहिचान गर्न सकेको छैन।
आइतबार साँझ ६ बजेर २० मिनेटमा पसल बन्द गरेर फर्कने क्रममा सुन व्यवसायी विकास गौतम (सुनार) माथि दुई जना व्यक्ति मोटरसाइकलमा आएर गोली प्रहार गरेका थिए।
उद्योगीले उक्त आक्रमणमा संलग्नलाई तत्काल पक्राउ गरेर कारबाही गरी व्यवसायीको सुरक्षा गर्न माग गरेका छन्। उद्योगी व्यवसायीलाई शान्ति, सुरक्षा प्रदान गरी भयरहित तरिकाले व्यवसाय सञ्चालन गर्ने वातावरण बनाउन व्यवसायीहरुले माग गरेका छन्।
नेपाल उद्योग वाणिज्य महासंघ सुदूरपश्चिम प्रदेश कमिटिले एक विज्ञप्ति जारी गर्दै दिनदहाडै सुरक्षाकर्मीको नजिकै भिडभाडयुक्त ठाउँमा व्यापारीमाथि ज्यान मार्ने उद्देश्यका साथ भएको आक्रमण प्रति घोर भत्र्सना गरेको छ।
सुनचाँदी व्यवसायी संघ कैलालीले पनि घटनामा संलग्न व्यक्तिलाई पक्राउ गरी कारबाही गर्न माग गरेको छ। गोली प्रहारपछि व्यवसायीबाट अज्ञात व्यक्तिहरुले करिब ३० तोला सुनका गरगहना र दुई लाख नगद रहेको झोला लुटपाट गरेका थिए।
व्यवसायीहरुको सीसीटीभी फुटेज खोज्दै प्रहरी
२०७८ साल असोजमा राजमार्गमा हुने अपराधको निगरानी गर्न सुदूरपश्चिम प्रदेशको आन्तरिक मामिला तथा कानुन मन्त्रालयले सीसीटीभी जडान गरेको थियो। झण्डै डेढ महिनादेखि मर्मत नहुँदा प्रयोगविहीन रहेको छ।
आइतबार राति व्यवसायीमाथि आक्रमण गर्ने व्यक्तिको पहिचान गर्न प्रहरीले निजी व्यवसायीहरुको सीसीटीभी फुटेज अध्ययन गरिरहेको इलाका प्रहरी कार्यालय मालाखेती इन्स्पेक्टर बासुदेव भट्टले बताए।
उनले भने, ‘प्रदेश सरकार र गोदावरी नगरपालिकाले जडान गरेका सीसीटीभीहरु बिग्रेका छन्। अहिले हामी व्यवसायीहरुका सीसीटीभी फुटेज खोज्दै घटनामा संलग्न रहेका व्यक्तिहरुको पहिचान गरिरहेका छौं।’
सुदूरपश्चिम प्रदेश सरकारले राजमार्गमा एक सय ३८ वटा सीसीटीभी क्यामेरा जडान गरी संविधान दिवसको अवसरमा प्रहरीलाई हस्तान्तरण गरेको थियो। कैलालीको चिसापानीदेखि गड्डा चौकीसम्म जडान गरिएको सो सीसीटीभीबाट राजमार्ग किनारमा रहेका प्रहरी कार्यालयहरुले निरन्तर निगरानी गर्ने गरि हस्तान्तरण गरिएको थियो।
यद्यपि अहिले मर्मत नहुँदा व्यवसायीमाथि आक्रमण गर्ने व्यक्ति पहिचान गर्न प्रहरीलाई चुनौती थपिएको छ। मन्त्रालयले गत आर्थिक वर्षमा एक करोड ७१ लाख रुपैयाँ खर्च गरेर राजमार्गमा अपराध नियन्त्रण गर्न सिसिटिभी जडान गरेको थियो।
उनले बाइकको मोडल, नम्बर, कलर पहिचान भए पनि घटनामा संलग्न व्यक्तिहरु पहिचान हुन नसकेको बताए। मन्त्रालयले लाखौं खर्च गरेर सवारी साधन खरिद गर्न तयार हुने तर, अपराध न्यूनीकरण गर्न जडान भएका सीसीटीभी मर्मत गर्नमा ध्यान नदिएकोप्रति स्थानीयहरुको आक्रोश रहेको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
-1786513116.png)
