लाल मोहम्मद घटना : जेलमा भेट, भारतमा योजना, १३ दिनको निगरानीपछि यसरी भएको थियो हत्या

सुरक्षा/अपराध

नारायण अधिकारी मंगलबार, पुस ५, २०७९ १०:२५

काठमाडौं– गत असोज ३ गते काठमाडौंको कागेश्वरी मनोहरा नगरपालिका–८ गोठाटारको कृष्ण मन्दिर नजिकै गोली प्रहार गरी हत्या गरिएका लाल मोहम्मद (लाल मोहम्मद दर्जी)को हत्यामा सुन्धारास्थित सेन्ट्रल जेल (केन्द्रीय कारागार)देखि भारतसम्मको नेक्कस जोडिएको खुलेको छ।

सर्लाहीको गडौता नगरपालिका–८ घर भइ गोठाटारमा रामकृष्ण श्रेष्ठको साढे दुई तले घर पुरै भाडामा लिएर गार्मेन्ट फ्याक्ट्री सञ्चालन गर्दै आएका ५५ वर्षीय लाल मोहम्मद हत्याबारे अनुसन्धान गरेको प्रहरीले केन्द्रीय कारागारदेखि भारतसम्मको नेक्कस निकालेको हो।

काठमाडौं उपत्यका अपराध अनुसन्धान कार्यालयका प्रहरी वरिष्ठ उपरीक्षक (एसएसपी) जनकराज भट्टराई नेतृत्वको समितिले भारतमा योजना बनाएर १३ दिनको लगातार निगरानीपछि मोहम्मदको हत्या गरिएको निष्कर्ष निकालेको छ। करिब २ महिना लामो अनुसन्धानबाट भारतीय नागरिक बब्लु पासवान भनिने गणेश कुमारको मुख्य योजनामा मोहम्मदको हत्या भएको समितिको ठहर छ। उनकै योजनामा आफ्नै प्रेमिकादेखि नेपाली युवायुवतीको प्रयोग गरेर संसाँझै मोहम्मदको हत्या भएको औंल्याइएको छ।

लागुऔषध मुद्दामा वीरगञ्ज कारागारमा ५ वर्ष बसेर छुटेका बब्लुले नेपाली र भारतीयको सहयोगमा मोहम्मदको हत्या गरेको खुलेको छ। मुख्य योजनाकार बब्लु भनिए पनि मोहम्मदको हत्यामा ६ जना भारतीयको प्रत्यक्ष संलग्नता रहेको समितिले निष्कर्ष निकालेको छ।

भारत मोतिहारी रक्सौल थाना परेउवा–१७ का बब्लु भनिने गणेश कुमार, भारतकै पूर्वी चम्पारन जिल्ला रक्सौल थाना मननकी २२ वर्षीया ममता भनिने मेरिना तिवारी, भारत जालान्धर महेशपुर मअजगढका अन्दाजी २७/२८ वर्षका राजु भनिने दिनेश, भारत रक्सौल बिहार घर भएका अन्दाजी ४०/४५ वर्षका गुड्डु पटेल, भारत दिल्ली राना प्रताप बागमाका नितिन खान भनिने नितिन मदान र भारत सैफुल्लाह मिया परेउवाका २३ वर्षीय मो. नेजामुदिन हत्यामा प्रत्यक्ष संलग्न रहेको भट्टराई समितिको निष्कर्ष छ।

बब्लुले योजना बनाएको र उनको योजनाअनुसार बाँकी पाँच जनाले काम गरेको पाइएको छ। उनीहरुकै योजना अनुसार पर्साको वीरगञ्ज–१६ का १९ वर्षीय मोहराम मिया भनिने मोहरम मिया, १७ वर्षीय रेहान मिया र मकवानपुरको बकैया गाउँपालिका–१ कि २१ वर्षीया सुमी भनिने सुस्मिता स्याङ्तानले सहयोगीको भूमिका खेलेको पाइएको अनुसन्धान प्रतिवेदनमा उल्लेख गरिएको छ।

१३ दिनदेखि रेकी : मोहम्मदको भिडियो, फोटो बल्लुलाई
बब्लु र ममता प्रेमि–प्रेमिका हुन्। बल्लुले प्रेमिका ममताको प्रयोग गरेर मोहम्मदको निगरानी गरेको खुलेको छ। ममता लागुऔषध मुद्दामा केन्द्रीय कारागारमा थुनामा थिइन्। चोरी आरोपमा बौद्ध प्रहरीले पक्राउ गरेपछि सुमी २०७६ असारमा पुर्पक्षका लागि केन्द्रीय कारागार पुगिन्।

त्यहीँ भेट भयो, सुमी र ममताको। नेपाली भाषा समेत बोल्न जान्ने भएकाले ममता र सुमी निकै नजिक भए। सुमी २०७८ फागुनमा कारागारबाट छुटिन्। ममता भने गत साउनमा कारागारबाट छुटिन्।

त्यसपछि ममताले नै सुमीलाई रक्सौल बोलाएर बब्लुसँग चिनजान गराएकी थिइन्। रक्सौल जान काठमाडौंबाट वीरगञ्ज पुगेकी सुमीलाई रिसिभ गरेर रक्सौलसम्म पुर्‍याउने जिम्मा बब्लुले वीरगञ्जका मोहराम मिया र १७ वर्षीय रेहान मियालाई (उनीहरु अहिले पुर्पक्षका लागि कारागारमा छन्) खटाएका थिए।

उनीहरुले मोटरसाइकलमा राखेर सुमीलाई रक्सौल पुर्‍याएका थिए। त्यसपछि ममतामार्फत सुमीको बब्लुसँग चिनजान भएको थियो। बल्लुलाई भेटेपछि सुमी र ममता गत भदौ १८ गते रक्सौलबाट वीरगञ्ज हुँदै काठमाडौं आएका थिए। त्यसपछि सुमी र ममता जम्मुडाँडास्थित कोशिपारी गेष्टहाउसमा गएर बसेका थिए। दुई दिन उक्त गेष्टहाउसमा बसेपछि होटल सञ्चालकले परिचयपत्र लगायतका कागजात मागेपछि उनीहरुले होटल परिवर्तन गर्दै बौद्धस्थित माँ गेस्टहाउसमा बसेका थिए।

उक्त होटलमा बसेर उनीहरुले बब्लुले सिकाएअनुसार मोहम्मदको सम्पूर्ण गतिविधि रेकी गर्न थालेका थिए। मोहम्मदका गतिविधिका भिडियो, फोटो समेत गोप्य रुपमा खिचेर उनीहरुले बब्लुसम्म पुर्‍याउँथे। होटलमा बस्दाको सम्पूर्ण खर्च बब्लुले नै ब्यहोरेका थिए।

लाल मोहम्मद हत्या घटनामा गत असोजमा पक्राउ परेका ३ जना

मोहम्मदको हत्या गर्न १३ दिनअघिदेखि मकवानपुरकी सुमी र बब्लुकी प्रेमिका ममताले निगरानी गरेका थिए। गोठाटारकै कोशिपारी र बौद्धको माँ गेष्टहाउसमा बसेर उनीहरुले मोहम्मदको निगरानी गरेका थिए। माँ होटलको इन्ट्री बुकमा समेत ममताको नाम र मोबाइल नम्बरमा कोठा बुक भएको पाइएको थियो भने कोशिपारी होटलको कोठा भने नितिन मदानको नाम र मोबाइल नम्बरमा बुक भएको पाइएको थियो।

इन्ट्री बुकमा उल्लेख भएका ममता र नितिनको मोबाइल नम्बरको कलवाइज लोकेशन, एसएमएस, कल डिटेल रिपोर्ट लगायत यी नम्बरबाट सुमीको नम्बरमा बारम्बार कन्ट्याक्ट भएको खुलेको थियो। मोहम्मदमाथि गोली चल्ने बेलासम्म घटनास्थल वरपर नै सुमी र ममता रहेको मोबाइल लोकेशनबाट प्रहरीले पत्ता लगाएको थियो।

जब दुई मास्कधारीसँग पुतलीसडकमा भेट भयो
मोहम्मदको हत्या हुनुभन्दा ४ दिनअघि मोहम्मदको सम्पूर्ण जानकारी लिएर बसेका सुमी र ममता पुतलीसडक पुगेका थिए। पुतलीसडकमा मास्क र क्पाय लगाएर बसेका दुई जना पुरुषसँग उनीहरुले भेट गरे।

बल्लुकै योजनाअनुसार भारतदेखि काठमाडौं आएका ती दुई युवक थिए, राजु भनिने दिनेश र गुड्डु पटेल। पछि मोहम्मदलाई गोली हान्ने व्यक्ति यीनै दुई जना रहेको प्रहरी अनुसन्धानबाट खुलेको थियो।

यी दुई व्यक्तिलाई सुमी र ममताले कोशीपारी गेष्टहाउसमा पुर्‍याएर नितिन मदानले बुक गरेको कोठामा लगेर राखेका थिए। त्यसको ४ दिनपछि असोज ३ गते साँझ उनै दुई जना राजु र गुड्डुले मोहम्मदलाई गोली हानी हत्या गरे।

दशैंमा घर आउन खोज्दा पक्राउ परिन् सुमी
हत्या भएपछि ममताले नै फोन गरेर सुमीलाई काम भयो अब भागौं भनेपछि उनीहरु ट्याक्सीमा दक्षिणकालीको बाटो हुँदै फरार भएका थिए। त्यसपछि उनीहरु वीरगञ्जबाट भारत छिरेका थिए। उनीहरु लखनउमा ममताको घरमा २ दिनसम्म बसे। त्यसपछि सुमीले दशैंमा घर जाने बताइन्।

ममताले घर जानु उचित नरहेको र प्रहरीले समात्ने बताइन्। तर, जसरी पनि दशैंमा आफू घर जानैपर्ने सुमीले बताएपछि अब आइन्दा मलाई सम्पर्क नगर्नु भन्दै ममताले भारु १० हजार रुपैयाँ दिएर सुमीलाई बिदा गरेको पाइएको अनुसन्धान अधिकारीले बताएका छन्।

काठमाडौं आएपछि सुमीलाई प्रहरीले असोज १३ गते गोंगबुबाट पक्राउ गरेको थियो। पछि काठमाडौं जिल्ला अदालतले सुमीलाई २ लाख धरौटीमा छाड्ने आदेश दिएको थियो। मोहम्मदको रेकी गरेर उनको सम्पूर्ण गतिविधिको भिडियो, फोटो पठाएवापत बब्लुले डेढ लाख दिने आश्वासन दिएपछि आफूले रेकी गरेको सुमीले प्रहरीसमक्ष बताएकी थिइन्।

कसरी प्रयोग भए मोहरम र रेहान?
मोहरम वीरगञ्जमै कक्षा ११ मा अध्ययनरत थिए। उनका आफ्नै दाई समिर मियामार्फत बब्लुसँग उनको चिनजान भएको थियो। सोही क्रममा एक दिन बल्लुले उनलाई फोन गर्दै काठमाडौंबाट सुमी वीरगञ्ज आउँदै गरेको र उसलाई रिसिभ गरेर सक्सौलसम्म ल्याउन अह्राएका थिए।

युवतीको फोटो समेत बब्लुले उनलाई ह्वाट्सएपमा पठाएका थिए। त्यसपछि मोहरमले रेहानलाई समेत लिएर बसपार्क पुगी सुमीलाई रिसिभ गरेर रक्सौल पुर्‍याएर वीरगञ्ज फर्केका थिए। त्यसको केही समयपछि बल्लुले फोन गर्दै तीन थान हतियार काठमाडौं लैजानु पर्ने भएको र त्यसवापत ४० हजार रुपैयाँ मिल्ने बताएका थिए।

उक्त कुरा मोहरमले रेहानलाई पनि सेयर गर्दै हतियार बोक्न राजी भएर उनीहरु गत भदौ ३१ गते रक्सौल पुगेका थिए। रक्सौलबाट हतियार वीरगञ्ज ल्याएपछि उनीहरु हतियार बोकेर रात्री बसमार्फत काठमाडौं आएका थिए। रक्सौलमा हतियार रिसिभ गर्ने बेलामा ३५ हजार पाएका उनीहरुलाई बाँकी ५ हजार भने काठमाडौंमा हतियार रिसिभ गर्ने मान्छेले दिने बब्लुले बताएका थिए।

असोज १ गते काठमाडौंको माछापोखरी आइपुगेर उनीहरुले बब्लुले भनेअनुसार नै हतियार सम्बन्धित व्यक्तिलाई दिएका थिए।

यी दुईबाट हतियार लिने व्यक्ति मोहम्मद हत्याका सुटर राजु र गुड्डु भएको एक अनुसन्धान अधिकृतले नेपाल लाइभलाई बताए। ती अधिकृतका अनुसार उनीहरुले माछापोखरीको लुम्बिनी तन्दुरी होटलमा हतियार र गोली रिसिभ गरेका थिए।

पेस्ताल दिएर वीरगञ्ज पुगेपछि असोज ३ गते बब्लुले भारतबाट फोन गर्दै उक्त हतियारबाट मोहम्मदको हत्या भएको र प्रहरीले खोजीरहेकाले भाग्न भनेका थिए। त्यसपछि उनी असोज ८ गते वीरगञ्जबाट भक्तपुर आइपुगेका थिए। भक्तपुर आएलगत्तै सूर्यविनायकबाट प्रहरीले मोहरमलाई पक्राउ गरेको थियो।

रेहानलाई भने असोज १४ गते बाराको प्रसौनीबाट प्रहरीले पक्राउ गरेको थियो। यी दुवैलाई पुर्पक्षका लागि जेल चलानको आदेश भएको छ। रेहान भने नाबालक भएकाले उनलाई भक्तपुरस्थित बाल सुधार गृहमा राखिएको छ भने मोहरमलाई केन्द्रीय कारागारमा राखिएको छ।

मोहम्मद हत्यामा प्रयोग भएका तीन नेपाली पक्राउ परे पनि मुख्य योजानकारसहित ६ भारतीय भने अझैसम्म फरार छन्। उनीहरुको पहिचान भइसकेपनि भारतीय प्रहरीको असहयोगका कारण पक्राउ पर्न नसकेको प्रहरी स्रोतले बताएको छ।