गोठाटार गोलीकाण्ड: जुवा खालबाट पक्राउ परेका नितिन मदनले बनाएका थिए मोहम्मद हत्याको योजना?

सुरक्षा/अपराध

गोठाटार गोलीकाण्ड: जुवा खालबाट पक्राउ परेका नितिन मदनले बनाएका थिए मोहम्मद हत्याको योजना? उदय सेट्टीलाई भेट्न नितिन र मोहम्मद गइरहन्थे रसुवा जेल

नारायण अधिकारी बुधबार, असोज ५, २०७९ १६:०९

काठमाडौं– सर्लाहीका थापाजी भनिने लाल मोहम्मद दर्जी हत्याको योजना नितिन मदन भनिने भारतीय नागरिकले बनाएको खुलेको छ। मोहम्मदको हत्या गर्ने सम्पूर्ण बन्दोबस्त मिलाउनेदेखि सुटर ल्याउनेसम्मको काममा नितिनको संलग्नता रहेको प्रहरी अनुसन्धानबाट खुलेको हो ।

आतंकवाद तथा अन्तरदेशीय अपराध हेर्ने नेपाल प्रहरीको विशेष ब्यूरोका एक उच्च अधिकारीका अनुसार सूचना आदानप्रदान, सुराकीदेखि सुटरको बन्दोबस्तसम्म नितिनले नै मिलाएको खुलेको छ।

गत सोमबार साँझ ६ बजेर ४५ मिनेटतिर बा ६ च ५१५२ नम्बरको कारमार्फत् गोठाटारमा रहेको आफ्नो गार्मेन्ट पसलमा आइपुगेका बेला रातो रङको सर्ट लगाएका व्यक्तिले मोहम्मदमाथि गोली प्रहार गरी हत्या गरेका थिए। सुटरले उनलाई लडाएर छाती, कन्चट, टाउकोमा गरी चार राउण्ड गोली प्रहार गरेका थिए।

उक्त हत्याको योजना बनाएका भारतीय नागरिक नितिन भने लामो समयदेखि काठमाडौंमै बस्दै आएका समेत खुलेको छ। नेपाल प्रहरीको बिशिष्टिकृत इकाइ विशेष ब्यूरोका अधिकारीका अनुसार हत्याका योजनाकार भनिएका नितिन लकडाउनका समयमा काठमाडौंमै पक्राउ परेका व्यक्ति हुन्। प्रहरी वृत्त महाराजगञ्जको टोलीले उनलाई २ लाख रुपैयाँसहित जुवा खालबाट पक्राउ गरेको थियो।

जुवा खालबाट पक्राउ परेर जिल्ला प्रशासन कार्यालयको आदेशपछि छुटेका उनै नितिनले मोहम्मद हत्याको सम्पूर्ण योजना बनाएको खुलेको प्रहरी स्रोतको दाबी छ।

को हुन् नितिन?
भारतीय नागरिक नितिन मदन अपहरण मुद्दामा जेलमा रहेका अर्का भारतीय उदय सेट्टीका विश्वासिला पात्रको रुपमा चिनिन्छन्। उदयको आदेश, निर्देशनअनुसार नेपालमा सम्पूर्ण धन्दा उनै नितिनले चलाउने गरेको प्रहरी स्रोतको दाबी छ।

नितिनको समूहले काठमाडौंमा हुण्डीको काम गर्ने गरेको थियो। यही समूहमा रहेर हाल मारिएका मोहम्मददेखि २ वर्ष अघि साढे १५ किलो नक्कली सुनसहित पक्राउ परेका इल्ताब हुसेन अन्सारीसम्मले काम गर्दै आएको खुलेको थियो। प्रहरी स्रोतका अनुसार त्यतिबेला बरामद भएको नक्कली सुनको ‘नेक्सस’ समेत सेट्टीसम्म पुगेको थियो। सेट्टी रसुवा कारागारमा थिए। उनै सेट्टीलाई भेट्न हाल मारिएका मोहम्मद र नितिन बारम्बार रसुवा पुग्ने गरेको पाइएको छ।

‘नितिनको मोबाइलमा रसुवा कारागारको ल्याडलाइनबाट पटक–पटक फोन सम्पर्क भएको समेत देखिन्छ,’ विशेष ब्यूरोका एक अधिृकत भन्छन्। एउटै समूहमा रहेर काम गर्दा खटपट भएको परिणाम स्वरुप मोहम्मद मारिएको आशंका प्रहरीको छ।

यतिमात्रै होइन सेट्टी र मोहम्मदको नख्खु कारागारबाट एकसाथ रसुवा कारागारमा समेत सरुवा भएको थियो। जसले पनि नितिन, सेट्टी र मोहम्मदको निकट सम्बन्ध रहेको जानकार स्रोत बताउँछ।

किन मारिए मोहम्मद?
नक्कली भारतीय मुद्राको कारोबारमा जोडिएका मोहम्मद जेलबाट छुटेपछि नितिनको सम्पर्कमा पुगेका थिए। नितिन सेट्टीका विश्वास पात्र हुन्। सेट्टीलाई पाकिस्तानी खुफिया एजेन्सी ‘आईएसआईनिकट’ अन्डरवर्ल्ड डन दाउद इब्राहिमको निकट रहेको भनेर पनि हेर्ने गरिन्छ।

एक प्रहरी अधिकारी भन्छन्, ‘यो फलानोको मान्छे भन्ने प्रमाण त हुन गाह्रो छ। तर विभिन्न घटनाको एनलाइसिस गर्दा सेट्टीलाई दाउदको निकट भनेर हेर्न सकिन्छ।’

मोहम्मद आफैं पनि पाकिस्तानबाट नक्कली भारतीय नोट ल्याएर कारोबार गर्ने भएकाले उनलाई आईएसआई निकट रहेको भनेर भारतीय खुफिया एजेन्सी 'रअ' ले निगरानीमा राखेको थियो।

२०७५ सालमा जेलबाट छुटेपछि मोहम्मद भने नितिनसँग मिलेर काठमाडौं केन्द्रित हुण्डीको कारोबार गर्थे। करिब १ वर्षअघि न्यूरोडबाट ७० लाख नेपाली रुपैयाँ र ३० लाख भारु लुटिएको थियो। हुण्डीको उक्त रकम मोहम्मदले नै लुटेर लगेको नितिनको बुझाइ थियो।

रकम नै लुटेर लगेपछि भएको खटपटबाट सुरु भएको द्वन्द्वको कारण मोहम्मदको हत्या भएको हुनसक्ने प्रहरी अनुमान छ। यो कोणबाट पनि प्रहरीले अनुसन्धान गरिरहेको छ। मोहम्मदको हत्या गर्न उनकै गोठाटारको डेरा नजिकै कोशिपारी गेस्टहाउसमा भाडामा सुटर बसेको समेत खुलेको छ। जितेन खानको नाममा कोठा बुक गरेर गेस्टहाउसमा बसेर रेकी गरिसकेपछि मोहम्मदको हत्या भएको प्रहरी निष्कर्ष छ।

पुरानो पृष्ठभूमि पनि उत्तिकै कारक
मोहम्मदको हत्या हुनुमा उनको पृष्ठभूमि कारक बन्न सक्नेतर्फ पनि प्रहरी अनुसन्धान जारी छ। आईएसआई तथा पाकिस्तानसँग निकट रहेका भारतीय नक्कली नोटको कारोबार गरेकाले उनी 'रअ' को टार्गेटमा परेको भन्ने बुझाइ पनि प्रहरी अधिकृतहरुको छ।

२०६४ असार २० गते धोबिखोला करिडोरमा भएको बलराम पटुवाको हत्या र त्यसपछि खुलेको अनुसन्धानको पाटोले उक्त कुरा केही हदसम्म पुष्टि गर्ने आधार समेत देखाउँछ।

बंगलादेश र पाकिस्तानबाट नक्कली भारु काठमाडौं ल्याउने र कारोबार गर्ने गिरोहका मुख्य नाइके मोहम्मद थिए। बलरामले अर्कै गुटबाट धन्दा चलाएर आफूहरुविरुद्ध गतिविधि गर्न थालेपछि बलरामबाट मोहम्मद समूहले असुरक्षा महसुस गरेर हत्या गरेको थियो।

बलरामकाे हत्यापछि पाकिस्तानमा रहेको ‘बोस’ लाई समेत जानकारी गराएको बयान त्यतिबेला मोहम्मदले प्रहरीसमक्ष नै दिएका थिए। ‘बलरामको हत्या गरेपश्चात मैले पाकिस्तानमा बोसलाई फोन गरी हामीले बलरामलाई मार्‍यौं भनि जानकारी गराएको हुँ,’ मोहम्मदले बयानमा भनेका थिए।

मोहम्मदको बयानलाई मात्रै आधार मानेर पाकिस्तानको खुफिया एजेन्सी इन्टर सर्भिसेस इन्टेलिजेन्स (आईएसआई) सँग जोडेर मोहम्मदलाई हेर्दा पुष्टि हुने आधार कम हुन्थ्यो। तर मोहम्मदले चलाउने ९८०३४५७*** नम्बरको मोबाइलबाट पाकिस्तानको फोन नम्बर ००९२–३०६२८५९०५४ मा बलरामको हत्या गरिएपछि २०६३ असार २० गते राति ८ बजेर ३८ मिनेटदेखि ८ बजेर ४२ मिनेटसम्म गरी ४ मिनेट कुराकानी भएको कल स्टेटमेन्टबाट प्रहरीले पुष्टि थियो।

नक्कली भारुको कारोबार गर्नु, पाकिस्तानी खुफिया एजेन्सी आईएसआई तथा पाकिस्तानकै संरक्षणमा रहेका अन्डरवर्ल्ड डन दाउद इब्राहिमको निकट भएर काम गर्नु र बलरामको हत्यापछि पाकिस्तानमा रहेका आईएसआईका एजेन्टलाई फोन गरेर हत्याको जानकारी गराउनु सम्मका गतिविधिले मोहम्मद भारतीय खुफिया एजेन्सी रिसर्च एण्ड एनालाईसिस विंङ (रअ) को टार्गेटमा परेको हुनसक्ने प्रहरीको विश्लेषण छ।

नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।