काठमाडौं– सर्लाहीका थापाजी भनिने लाल मोहम्मद दर्जी हत्याको कारण खोज्न १५ वर्षअघि (२०६४ असार २० गते) भएको बलराम पटुवाको हत्यासम्मको घटनासम्म पुग्नुपर्ने देखिएको छ।
मोहम्मद हत्याको अनुसन्धानमा जुटेको प्रहरी टोलीले उनको विगतको पृष्ठभूमिदेखि बलराम हत्यासम्मको फाइल पल्टाएर अनुसन्धानलाई अघि बढाएको छ। अनुसन्धानका क्रममा नयाँ–नयाँ तथ्यहरु फेला पर्दै गएका छन्।
बलराम हत्या घटनामा पक्राउ परेका तथा हाल मारिएका मोहम्मदको त्यतिबेलाको बयान, प्रहरी अनुसन्धान रिपोर्ट, हत्यामा संलग्न अन्य व्यक्तिहरुको बयान, सबूद प्रमाणलगायतका आधारमा त्यतिबेलाको बलराम हत्यामा पनि अन्तरदेशीय अपराध जोडिएको देखिएको छ।
हाल मारिएका मोहम्मद, मोहम्मदकै समूहबाट मारिएका बलराम थापा, उपेन्द्र चौधरी, मुन्ना खान, वाहिद, असरफ अली समेतका व्यक्ति मिलेर नक्कली भारुको कारोबार गर्दै आएका थिए।
यी व्यक्तिहरुका लागि नक्कली भारु नोट नेपालमै छपाइ नभएर बंगलादेश र पाकिस्तानबाट आउने गरेको थियो। नक्काली भारु नोट नेपाल आइसकेपछि त्यसको वितरण गर्ने मुख्य जिम्मा मोहम्मदको थियो।
मुन्ना खानको गुटमा बलराम पटुवा र उपेन्द्र चौधरी देखिन थाले। बलराम र उपेन्द्र मुन्नाप्रति झनै बफदार बने। यो कुरा मोहम्मदलाई मन परेको थिएन। अर्कै गुटबाट धन्दा चलाउन सुरु गरेको र आफूहरुविरुद्ध गतिविधि गर्न थालेपछि बलरामबाट मोहम्मद समूहले असुरक्षित महसुस गरेको थियो। अनि मोहम्मद समूहको टार्गेटमा परेका थिए बलराम।
बलरामलाई मार्ने योजना बनाएर ५ लाख नक्कली भारु चाहिएको छ भन्दै २०६४ असार २० गते बानेश्वरस्थित रामप्रसाद शाहको पसलमा ल्याइदिन भनेर बोलाउने र बलरामलाई आजै मार्ने भन्दै मोहम्मदले फोनमार्फत् मुन्नालाई समेत जानकारी गराएका थिए।
त्यसपछि मोहम्मद आफैं रामप्रसादको पसलमा गएर बलरामलाई भेटी मेलम्ची खानेपानीको अफिस अगाडि लगे। उक्त ठाउँमा पहिला नै वाहिद, मुन्ना र असरफ अली बसिसकेका थिए। ‘भारु आउन ढिलो भयो’ भन्दै मोटरसाइकलमा बलरामलाई धोविखोला किनारमा पुर्याएर ४ राउण्ड गोली हानी मोहम्मदको समूहले हत्या गरेको थियो।
पाकिस्तानमा रहेको ‘बोस’ लाई जानकारी
हत्यापछि कुरो यत्तिमै सकिएन। बलराम हत्याको जानकारी पाकिस्तानमा रहेको ‘बोस’ लाई समेत गराएको बयान त्यतिबेला मोहम्मदले प्रहरीसमक्ष नै दिएका थिए।
‘बलरामको हत्या गरेपश्चात् मैले पाकिस्तानमा बोसलाई फोन गरी हामीले बलरामलाई मार्यौं भनि जानकारी गराएको हुँ’, मोहम्मदले बयानमा भनेका थिए।
मोहम्मदको बयानलाई मात्रै आधार मानेर पाकिस्तानको खुफिया एजेन्सी इन्टर सर्भिसेस इन्टेलिजेन्स (आईएसआई) सँग जोडेर मोहम्मदलाई हेर्दा पुष्टि हुने आधार कम हुन्थ्यो। तर, प्रहरी यतिमै रोकिएन। मोहम्मदको बयानबाट चकित भएको प्रहरीले थप अनुसन्धान गर्दा उक्त कुरा पुष्टि हुने आधार भेटायो।
बलरामको हत्यापछि उनकै मोबाइल ९८०३४५४०७७ बाट मोहम्मदले राति ९ बजेर १८ मिनेटमा कान्तिपुर टेलिभिजनको ०१–४४६६३०० मा फोन समेत गरेको अनुसन्धानबाट पुष्टि भएको थियो।
मोहम्मदले चलाउने गरेको ९८०३४५७६२७ को मोबाइलबाट पाकिस्तानको फोन नम्बर ००९२–३०६२८५९०५४ मा बलरामको हत्या गरिएपछि २०६३ असार २० गते राति ८ बजेर ३८ मिनेटदेखि ८ बजेर ४२ मिनेटसम्म गरी ४ मिनेट कुराकानी भएको कल स्टेटमेन्टबाट प्रहरीले पुष्टि गरेको थियो।
पाकिस्तानी बोसलाई फोन गरेर बलरामको हत्याको जानकारी दिएको भन्ने मोहम्मदले बयानलाई कल स्टेटमेन्टले पुष्टि गरेपछि अनुसन्धानमा खटिएको प्रहरी टोली नै चकित भएको थियो। त्यतिबेला अनुसन्धानमा खटिएका प्रहरी अधिकारीका अनुसार पाकिस्तानी बोस भन्दै उनले आईएसआईका एजेन्टलाई फोन गरेर बलराम हत्याको जानकारी गराएका थिए।
बलरामको हत्यामा संलग्न रहेको ठहर गर्दै जिल्ला अदालतले मोहम्मदलाई जन्म कैदको सजाय सुनाएको थियो। त्यसपछि उनी उच्च हुँदै सर्वोच्च पुगे पनि जिल्लाकै फैसला सदर भएको थियो। वरिष्ठ अधिवक्ता शम्भु थापादेखि देव मैनाली सम्मले मोहम्मद निर्दोष रहेको भन्दै बहस समेत गरेका थिए।
जन्म कैदको सजाय तोकिएका उनै मोहम्मद २०७४ सालमा कैद माफी मिनाहा पाएर छुटेका थिए। जेलबाट छुटेको ५ वर्षपछि सोमबार साँझ काठमाडौंको गोठाटारमा उनको गोली हानी हत्या गरिएको छ।
मोहम्मदको हत्याको कारण बलराम हत्याको अनुसन्धान गर्दा खुलेका तथ्यहरुसँग जोडेर अहिले प्रहरीले अनुसन्धान गरिरहेको छ। नक्कली भारुको कारोबार गर्नु, पाकिस्तानी खुफिया एजेन्सी आईएसआई तथा पाकिस्तानकै संरक्षणमा रहेका अन्डरवर्ल्ड डन दाउद इब्राहिमको निकट भएर काम गर्नु र बलरामको हत्यापछि पाकिस्तानमा रहेका आईएसआईका एजेन्टलाई फोन गरेर हत्याको जानकारी गराउनुसम्मका गतिविधिले मोहम्मद भारतीय खुफिया एजेन्सी रिसर्च एण्ड एनालाईसिस विंङ (रअ) को टार्गेटमा परेको हुनसक्ने प्रहरीको विश्लेषण छ।
अर्कोतर्फ प्रहरीले भारतीय 'रअ' को हात रहेका भनिएका घटनासँग यो घटनाको प्रकृति पनि मिलेकाले 'रअ' सम्मको संलग्नता हुनसक्ने आकलन गरेको छ। पूर्वडीआईजी हेमन्त मल्ल पनि मुस्लिम अगुवा मारिएका यसअघिका हत्या र अहिलेको हत्या एकै प्रकृतिको देखिएकाले जोडेर हेर्नुपर्ने बताउँछन्।
बा ६ च ५१५२ नम्बरको कारमार्फत् सोमबार साँझ पौन ७ बजेतिर गोठाटारमा रहेको आफ्नो गार्मेन्टको पसलमा आइपुगेका बेला रातो रङको सर्ट लगाएका व्यक्तिले मोहम्मदमाथि गोली प्रहार गर्न सुरु गरेको सीसीटीभी फुटेजमा देखिन्छ। सुटर उनलाई लडाएर छाती, कन्चट, टाउकोमा गरी ४ राउण्ड गोली प्रहार गरी फरार भएका थिए।
घटनामा संलग्नको पहिचान प्रहरीले अहिलेसम्म गर्न सकेको छैन। काठमाडौं उपत्यका अपराध अनुसन्धान कार्यालयका एसएसपी जनक भट्टराईको संयोजकत्वमा समिति गठन गरेर अनुसन्धान सुरु गरिएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
-1786513116.png)
