कैलालीमा सुनचाँदी व्यवसायीमाथि गोली प्रहार

सुरक्षा/अपराध

शेरबहादुर ऐर आइतबार, पुस ३, २०७९ १९:०३

धनगढी– कैलालीमा एकजना सुनाचाँदी व्यवसायीमाथि गोली प्रहार भएको छ।

आइतबार साँझ अत्तरियास्थित सशस्त्र प्रहरी बल नेपालको कार्यालय नजिकै उनीमाथि गोली चलाइएको हो। गोली लागेर न्यू घोडाघोडी सुनचाँदी पसलका सञ्चालक २८ वर्षीय विकास सुनार घाइते भएका छन्। दाहिने हातमा गोली लागेका उनको अवस्था सामान्य रहेको प्रहरीले बताएको छ।

विकासलाई उपचारका लागि सुरुमा पद्‌मा अस्पताल लगिएकोमा त्यहाँबाट माया मेट्रो अस्पताल रेफर गरिएको छ। उनीमाथि कसले र किन गोली चलाएको भन्ने खुलेको छैन। प्रहरीले घटनाबारे अनुसन्धान सुरु गरेको जनाएको छ।

‘मोटरसाइकलमा आएका दुई जनाले गोली प्रहार गरेको भनिएको छ। गोली चलाएर उनीहरू भागेका छन्। हामीले खोजी कार्य थालेका छौं’, कैलाली प्रहरी प्रवक्ता वेदप्रकाश जोशीले भने।

गोली प्रहारपछि सुटरले विकाससँग भएको झोला लगेर भागेको प्रत्यक्षदर्शी हेमराज जोशीले बताए।

नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।