गण्डकी प्रदेश: यस्ता छन् आगामी सरकारका सम्भावनाहरू!

राजनीति

रिखिराम जिसी सोमबार, मंसिर १२, २०७९ २०:२२

काठमाडौं- गण्डकी प्रदेश अन्तर्गतका ३६ निर्वाचन क्षेत्रमध्ये ३४ निर्वाचन क्षेत्रको नतिजा सार्वजनिक भइसकेको छ। मतगणना बाँकी स्याङ्जाका दुई निर्वाचन क्षेत्रको नतिजा कहिले आउँछ भन्ने चाहिँ टुंगो छैन।

आइतबारसम्म सार्वजनिक भएका ३४ निर्वाचन क्षेत्रमध्ये कांग्रेसका उम्मेदवार सर्वाधिक १६ ठाउँमा निर्वाचित भएका छन्। त्यस्तै, एमाले १२, माओवादी केन्द्र ४, नेपाल समाजवादी पार्टी १ र स्वतन्त्र १ ठाउँमा निर्वाचित भइसकेका छन्।

प्रत्यक्षतर्फ मात्रै हेर्दा कांग्रेस सबैभन्दा ठूलो पार्टी देखिन्छ। तर, जारी समानुपातिक मत गणनामा एमालेले अग्रता लिइरहेको छ। आइतबार दिउँसम्म गणना भइसकेको ९ लाख १८ हजार ९०३ मतमा भने एमाले अगाडि छ। उसले गणना भइसकेको मतको आधारमा ३७. ०६ प्रतिशत मत पाएको छ। त्यस्तै, कांग्रेसले ३४.५६ प्रतिशत, माओवादी केन्द्रले १२.५५ प्रतिशत र राप्रपाले ६.२१ प्रतिशत मत पाइसकेका छन्।

समानुपातिकतर्फ पनि अहिलेकै मत ट्रेन्ड कायम रहेमा कांग्रेसले ८-१० सिट पाउने आकलन गर्न सकिन्छ। त्यसो हुँदा प्रदेश सभामा २४-२६ सिट हुनेछ। यस्तै गरी, एमालेको २२-२४, माओवादी केन्द्रको ७-८ र राप्रपाको २-३ सिट हुनसक्नेछ।

समानुपातिकतर्फको मत गणना जारी भएकाले अन्तिममा केही सिट तलमाथि पर्ने सम्भावना छ। तर मूलभूत रुपमा पहिलो दल कांग्रेस, निकटम अन्तरमा रहेर दोस्रो दल एमाले र तेस्रो दल माओवादी केन्द्र हुने देखिन्छ। तर मत गणना बाँकी रहेको स्याङ्जामा एमालेले जित निकालेमा कांग्रेसकै हाराहारी र कांग्रेसले जितेमा ऊ केही ठूलो हुनसक्छ।

६० सदस्यीय प्रदेश सभामा सरकार गठनका लागि कम्तिमा ३१ सिट चाहिन्छ। तेस्रो दल माओवादी केन्द्रको साथ लिएर कांग्रेस वा एमालेले सरकारको नेतृत्व गर्न सक्ने सहज सम्भावना छ। एमालेलाई भने थप अन्य दलको साथ लिनुपर्ने हुनसक्छ।

संघीय सरकारमा अहिले कायम रहेको गठबन्धन अब पनि निरन्तर रहेमा गण्डकी प्रदेशमा कांग्रेस-माओवादी केन्द्रको सरकार बन्ने सम्भावना उच्च छ। अझै, नेपाल समाजवादी पार्टी र स्वतन्त्र सांसद राजीव गुरुङ पनि यही गठबन्धनमा जोडिने सम्भावना छ।

को बन्ला मुख्यमन्त्री?
सत्ता गठबन्धनमा रहेकामध्ये माओवादी केन्द्र, एकीकृत समाजवादी, नेपाल समाजवादी पार्टी जस्ता दलहरु गण्डकी प्रदेशमा साह्रै कमजोर छन्। एकीकृत समाजवादीको त संसद्‌मा प्रतिनिधित्व पनि नहुने स्पष्ट जस्तै छ। त्यसैले अहिलेकै गठबन्धन कायम रहेको स्थितिमा कांग्रेसले नै मुख्यमन्त्री पाउने निश्चितप्रायः छ।

कांग्रेसबाट अहिले मुख्यमन्त्रीका रुपमा तीन नेताको चर्चा छ – सुरेन्द्रराज पाण्डे, बिन्दुबहादुर थापा र शुक्रराज शर्मा। पाण्डे गोरखा २ (ख) र थापा कास्की २ (ख)बाट निर्वाचित भइसकेका छन्। शर्मा समानुपातिक सूचीमा छन्।

पाण्डेलाई निर्वाचनताका नै मुख्यमन्त्रीका रुपमा चर्चामा गरिएको थियो। खासगरी नेपाल समाजवादी पार्टीका अध्यक्ष डा बाबुराम भट्टराईले आफ्नो भाषणका क्रममा उनलाई मुख्यमन्त्रीको रुपमा प्रस्तुत गर्ने गरेका थिए। थापा गण्डकी प्रदेशका कानुन, सञ्चार तथा प्रदेश सभा मामिला मन्त्री हुन्। शर्मा कांग्रेसको गण्डकी प्रदेशका सभापति हुन्।

तर उनी समानुपातिक सूचीमा छन्। उनको नाम खस आर्य सूचीको पुरुषतर्फ पहिलो नम्बरमा छ। उनी सांसद बन्ने सम्भावना उच्च छ।

उल्लेखित सबै नेताहरुले आकांक्षा देखाएको स्थितिमा संसदीय दलको नेताका लागि प्रतिस्पर्धा हुनसक्नेछ। एमालेबाट सरकारको नेतृत्व हुने स्थिति बनेका खगराज अधिकारी नै बन्ने लगभग निश्चित छ। संघीय पनि भइसकेका उनी यसपटक प्रदेश सरकारको नेतृत्व गर्ने आकांक्षा राखेरै प्रदेश सभामा उम्मेदवार बनेका थिए। उनी कास्की- १ (क)बाट निर्वाचित भइसकेका छन्।