पोखरा– काठमाडौं विमानस्थलबाट आइतबार बिहान १०:३३ बजे ४ चालक दलका सदस्य र ६८ यात्रुसहित यती एयरलाइन्सको विमान पोखराका लागि उड्यो।
आइतबार एकपटक पोखरा गएर फर्केर आइसकेको थियो उक्त जहाज। पुनः दोस्रोपटक पोखराका लागि उडेको यतीको एएनसी एटीआर–७२ जहाजको पोखरा विमानस्थलमा अवतरणको समय १०:५९ बजे थियो। तर, उक्त विमान पोखरा विमानस्थलमा अवतरण हुन नपाउँदै दुर्घटनामा पर्यो।
अवतरणका लागि कम उचाईमा आइरहेका बेला पोखरा महानगरपालिका १७, घारीपाटन नजिकैको आकाशमा अस्वभाविक कोल्टे परेको एक स्थानीयले खिचेको भिडियोमा देख्न सकिन्छ।
त्यसपछि भने केही सेकेन्डमै भुइँमा बजारिएको ठूलो आवाज सुनियो। त्यसलगत्तै धुवाँको मुस्लोसहित ठूलो आगो दन्कियो। आगो लागेलगत्तै हेलिकोप्टरबाट पानी खन्याए पनि निभ्न सकेन। दुर्घटनापछि तत्कालै उद्धार गर्दा पनि जीवित यात्रु भेटिन मुस्किल भएको छ।
दुर्घटनाअघि विमानस्थलले अतवरणको अनुमति लिइसकेको थियो। ‘मौसमको समस्या थिएन, विमानको प्राविधिक कारणले दुर्घटना भएको प्रारम्भिक जानकारी प्राप्त भएको छ, विमानमा आकाशमै आगोको झिल्को देखिएको जानकारी प्राप्त भएको छ,’ प्राधिकरणका सूचना अधिकारी ज्ञानेन्द्र भुलले भने।
विमान अन्तिम पटक १०:५० मा सम्पर्कमा थियो। त्यसपछि भने सम्पर्क हुन सकेन। विमान खसेको ठाउँ पुरानो आन्तरिक विमानस्थलको पूर्वपट्टि रहेको नेपाली सेनाको ब्यारेक पछाडि हो। नयाँ विमानस्थलतर्फ ल्याण्डिङका लागि मोडिएको अवस्थामा विमान घनाबस्ती माथि उडिरहेको थियो।
‘विमान एक मिनेट मात्रै ढिला दुर्घटना परेको भए पुरानो विमानस्थल माथि खस्ने थियो। एक मिनेट मात्रै थप अघि बढेको भए रामघाट बजारमाथि जहाज बजारिने थियो,’ उनले भने।
पाइलटले बस्ती जोगाउन हरसम्भव प्रयास गरेको देखिन्छ। ‘पाइलटले बस्ती जोगाउन विमान सेती खोँचतिर लगेर अर्को दुर्घटना जोगाउन हरसम्भव प्रयास गरेको देखियो,’ एक प्रत्यक्षदर्शीले भने।
दुर्घटनामा सेती खोँचमा माछा मार्न गएका दुई जना स्थानीय पनि घाइते भएका छन्। उनीहरु माछा मार्दै गरेको समयमा जहाज सेती खोँचमा खस्दा घाइते भएका हुन्। उनीहरुलाई उद्धार गरेर अस्पताल पठाइएको छ।
उक्त विमानमा चालक दलका सदस्यहरू कमल केसी, अन्जु खतिवडा सृजना होंगचुन र ओसिन आले मगर थिए। जहाजमा नेपाली ५३ जना, भारतीय नागरिक ५ जना, रसियन ४ जना, आयरल्याण्डका १, अस्ट्रेलियन १, अर्जेन्टिनी १, कोरियन २, फ्रान्सेली १ गरी ६८ जना यात्रु र चालक दलका ४ जना थिए।
जहाज खोँचमा परेकाले उद्धारमा कठिनाई भएको छ। अहिलेसम्म ३६ जनाको शव फेला परेको कास्कीका प्रहरी प्रमुख एसपी अजय केसीले बताए। ‘अहिलेसम्म ३६ जनाको शव निकालिएको छ, बाँकी १०/१२ जनाको शव माथिबाट देखिएको छ। निकाल्न प्रयत्न गरिरहेका छौं,’ उनले भने।
उक्त विमान दुर्घटनापछि पोखरा विमानस्थलबाट हुने उडानहरु स्थगित गरिएको छ। त्रिभुवन अन्तर्राष्ट्रिय विमानस्थलका प्रवक्ता टेकनाथ सिटौलाले दुर्घटना भएपछि पोखरा विमानस्थलबाट हुने सबै उडान स्थगित गरिएको बताए।
उद्घाटन भएको १५ दिनमै पोखरा अन्तर्राष्ट्रिय विमानस्थलनजिकै विमान दुर्घटना भएको हो। जनवरी १ तारिखमा मात्र उद्घाटन भएको विमानस्थलमा यती एयरलाइन्सको जहाज दुर्घटना भएको हो।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1779445578-1779446181.jpg)
-1764146706.png)
