पूर्वाधार

अवैध संरचना हटाउँदै पोखरा महानगर

रिखिराम जिसी बुधबार, मंसिर १४, २०७९ १९:५३

पोखरा– पोखरा महानगरपालिका वडा नम्बर ४ अन्तर्गत पर्ने फिर्केखोला किनारमा सार्वजनिक जग्गा अतिक्रमण गरेर बनाउन लागेका संरचना हटाइएको छ।

वडा कार्यालयको नेतृत्वमा नगर प्रहरी सहितको टोलीले पोखरा–बाग्लुङ राजमार्ग अन्तर्गत फिर्के पुलको उत्तरतर्फ फिर्केखोला अतिक्रमण गरेर बनाउन लागेका अस्थायी संरचना बुधबार हटाइएको वडा नम्बर ४ का वडा अध्यक्ष देवकृष्ण पराजुलीले जानकारी दिए।

‘खोलाको छेउमा फडानी गरेर कम्पाउन्डजस्तो बनाउनुभएको रहेछ। पाँचवटा कोठा बराबरको अतिक्रमण भएको थियो, पाँचवटै कोठा बनाएर प्लटिङ गरेर छोड्नुभएको थियो। संरचना बनाउँदै हुनुहुन्थ्यो। वडा कार्यालयले गएर हटाएका छौं’, उनले भने।

हटाउन सूचना जारी गरे पनि नहटाएपछि वडा कार्यालय आफै गएर संरचना हटाएको वडाध्यक्ष पराजुलीले बताए। ‘हामीले हटाउन भनेर सूचना जारी ग¥यौं, उहाँहरू मान्नु भएन’, उनले भने, ‘बुधबार नगर प्रहरीसहितको टोली गएर हटाएका हौं ।’

बन्न लागेका संरचनालाई बनाउन रोकिएको वडा अध्यक्ष पराजुलीले बताए। ‘अतिक्रमण गरेर संरचना बनाउन दिएका छैनौं। मिच्ने क्रम जारी छ, तर हामी हटाउने अभियानमा लागिरहेका छौं’, उनले भने।

अतिक्रमण गरेर बनेका संरचना पनि सूचना दिएर हटाउन लगाउने वडाध्यक्ष पराजुलीले सुनाए। ‘अतिक्रमण गरेर धेरै संरचना बनेका छन्, बनेका संरचना सूचना, समय दिएर हटाउन लगाउँछौं’, उनले भने।

महानगरपालिकाले सार्वजनिक ठाउँमा अतिक्रमण गरेर बनेका संरचना क्रमशः हटाउँदै जाने महानगरका प्रवक्ता मोतीलाल तिमिल्सिनाले जानकारी दिए। ‘सार्वजनिक ठाउँमा अतिक्रमण भएर बनेका संरचना हट्ने कुरा त रह्यो नै।

कतिपय मापदण्डका कुरा छन्। ती कुरालाई व्यवस्थापन गर्नुपर्ने हुन्छ। अन्य ठाउँको पनि क्रमशः हटाउँछौं’, उनले भने ।

महानगरले मापदण्डविपरीत बन्दै गरेका संरचना निर्माण रोकिरहेको प्रवक्ता तिमिल्सिनाले बताए। ‘मापदण् विपरीत केही संरचना बन्दै गरेका थिए। जसलाई महानगरले सूचना जारी गर्दै निर्माण रोकेको छ’, उनले भने।

सार्वजनिक जग्गा अतिक्रमण गरेर बनाइएको संरचनाका विषयमा के गर्ने भन्नेबारे छलफल भइरहेको प्रवक्ता तिमिल्सिनाले बताए। उनले भने, ‘अतिक्रमण गरेर बनिसकेका संरचनाको हकमा कसरी जाने भन्नेबारे छलफल हुँदैछ।’

यसअघि पोखरा महानगरले वडा नम्बर ३३ मा रहेका अनधिकृत रूपमा निर्माण गरिएका छाप्रा भत्काएको थियो। विभिन्न जिल्लाबाट आएका मानिसहरूले अवैध रूपमा निर्माण गरेर बसेका छाप्रा हटाइएको हो।

मेयर धनराज आचार्यको निर्देशन र वडाध्यक्ष रामचन्द्र अधिकारीको उपस्थितिमा वडा नम्बर ३३ को दुई पिप्लेमा निर्माण गरिएका २३ छाप्रा र वडा नम्बर ३३ कै पशुपति घाटमा निर्माण गरिएका ३ छाप्रा गरी २६ वटा छाप्रा थियो।

छाप्रा भत्काउँदै मेयर आचार्यले भनेका थिए, ‘सार्वजनिक जग्गा संरक्षण अभियानको सुरुवात स्वरूप ती छाप्रा भत्काइएको हो। अन्यत्र पनि यस्ता अनधिकृत रूपमा निर्माण गरिएका संरचना क्रमशः भत्काउँदै लगिने छ।’

यसअघि फेवातालको सिमसार क्षेत्रमै पुगेर महानगर मेयर धनराज आचार्यले मापदण्ड मिचेर संरचना नबनाउन निर्देशन दिएका थिए। फेवातालको सिरानमा डाँडा खारेर पुरिएको सिमसार क्षेत्रको अवलोकन गर्दै मेयर आचार्यले फेवातालको मापदण्डभित्र पर्ने गरी संरचना नबनाउन निर्देशन दिएका थिए।

पोखरा महानगरका निवर्तमान मेयर मानबहादुर जिसी नेतृत्वको ५५ औं कार्यपालिकाको २०७८ चैत १६ गते बसेको बैठकले फेवातालको मापदण्ड ३० मिटर बनाउने निर्णय गरेको थियो। तर, सर्वाेच्च अदालतले गत असार १३ गते फेवातालको मापदण्ड ६५ मिटर नै कायम राख्न अन्तरिम आदेश दिएको थियो।

सर्वोच्चको आदेशलाई आधार मान्दै ६५ मिटरभित्र संरचना नबनाउन मेयर आचार्यको निर्देशन थियो। ‘अटेर गरेर संरचना बनाए भत्काउँछौं। सिमसार क्षेत्र यसरी पुरिनु अत्यन्त दुःखद् छ। यसरी त भोलिको पुस्ताले ताल नै देख्न पाउँदैन। अब यस्तो हुन दिइने छैन’, मेयरले भनेका थिए।