लन्डन– ब्रिटिश परराष्ट्र मन्त्री मेरी एलिजाबेथ ट्रस (लिज ट्रस) बेलायतको नयाँ प्रधानमन्त्री बन्ने भएकी छन्।
सत्तारुढ कन्जरभेटिभ पार्टीका १,४१,००० भन्दा बढी सदस्य तथा सांसदहरुले गरेको मतदानबाट उनी छनोट भएकी हुन्। अब उनलाई मंगलबार (६ सेप्टेम्बर) मा महारानी एलिजाबेथ द्वितीयले औपचारिक रुपमा प्रधानमंत्रीको पदमा नियुक्त गर्नेछिन्।
विवादै विवादमा घेरिएका प्रधानमन्त्री बोरिस जोनसनले गत जुलाई महिनामा पदबाट राजीनामा दिने घोषणा गरेपछि सत्तारुढ दलको नयाँ नेता छान्ने प्रक्रिया शुरु भएको थियो।
लिज ट्रसले खसेको मतको ५७ प्रतिशत मत पाएकी छन् भने ऋषि सुनकले ४२ प्रतिशत मत पाएका छन्। सोमबार अपरान्ह वेस्ट मिन्स्टरमा अन्तिम मत परिणाम घोषणा गरिएको थियो।
उक्त घोषणापछि बोल्दै ट्रसले आफूले उर्जाको बढ्दो मूल्यसँग जुध्न र राष्ट्रिय स्वास्थ्य सेवा (एनएचएस)मा सुधार गर्ने कामलाई प्राथमिकता दिने बताइन्।
बेलायतको अक्सफोर्डमा जन्मिएकी ४७ वर्षीय ट्रसले अक्सफोर्ड विश्व विद्यालयबाट स्नातक अध्ययन पुरा गरेकी छन्। उनी सन् २०१० मा पहिलोपटक ब्रिटिश संसद, हाउस अफ कमन्समा निर्वाचित भएकी थिइन्।
उनले शिक्षा, वातावरण, अन्तर्राष्ट्रिय व्यापार तथा परराष्ट्र मन्त्रीको रुपमा काम गरिसकेकी छन् । उनका श्रीमान ह्यु ओ लियरी एकजना लेखापाल हुन्। उनीहरुका दुई छोरी छन्।
‘बोरिस फ्याक्टर निर्णायक’
लन्डनको बरो अफ बार्नेटका पूर्वउपमेयर काउन्सिलर लक्ष्य गुरुङ सत्तारुढ कन्जरभेटिभ पार्टीका एक सदस्य हुन्। उनले पार्टीको नयाँ नेता चुन्न मतदान गरेका थिए। नेपाल लाइभसँग कुरा गर्दै गुरुङले भने, ‘कन्जरभेटिभ पार्टीका झण्डै ५० प्रतिशत सदस्यहरुले अझै पनि कार्यवाहक प्रधानमन्त्री बोरिस जोनसनलाई समर्थन गर्छन् ।’
बोरिसले ऋषि सुनकलाई अर्थ मन्त्री बनाए। तर उनले अर्थ मन्त्रीबाट राजीनामा गरेर बोरिसलाई धोका दिए भनेर कन्जरभेटिभ पार्टीका धेरै मतदाताले बोरिसप्रति वफादार लिज ट्रसलाई मतदान गरेको जस्तो मलाई लाग्छ,’ गुरुङले भने।
भारतीय मूलका सुनक
पूर्वअर्थमन्त्री सुनकका बाबुआमा दुवै पूर्वी अफ्रिकाबाट यूके आएका हुन् र दुवै भारतीय मूलका हुन्। जनरल फिजिसिअन बुवा र औषधि पसल सञ्चालन गर्ने आमाका सन्तानका रूपमा सुनक सन् १९८० मा साउथह्याम्पटनमा जन्मिएका हुन्।
फेब्रुअरी २०२० मा सुनक यूकेको चान्सलर अफ एक्सचेकर (अर्थमन्त्री) बने। त्यसको केही सातामै उनले सामना गर्नु परेका महामारी र लकडाउनका चुनौतीहरू निकै पेचिला थिए। भनिन्छ, ति चुनाैतीहरु दोस्रो विश्वयुद्धपछि कुनै चान्सलरले झेलेकोमध्ये सबभन्दा ठूला थिए।
सुनकले मतदानमा सम्मानजनक मत पाए पनि उनको राजनीतिक भविष्य के होला भन्ने चाहिं अस्पष्ट छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
-1779545841.jpg)
