काठमाडौं– वरिष्ठ पत्रकार बबिता बस्नेतको पुस्तक ‘समय साक्षी’ सार्वजनिक भएको छ। प्रकाशक संस्था बुक हिलले आयोजना गरेको कार्यक्रममा प्रथम गभर्नर हिमालय शम्शेर राणा, कथाकार भुवन ढुङ्गाना, लेखक बस्नेत र लेखकका मातापिताले संयुक्त रुपमा पुस्तक लोकार्पण गरे।
कार्यक्रमलाई सम्बोधन गर्दै नेपाल राष्ट्र बैंकका पहिलो गभर्नर राणाले यात्रा गर्दाको दैनिकीको स्वरुपमा पुस्तक आएको बताए। तीन, चार पृष्ठका छोटा अध्याय रहेकाले पुस्तक पढ्न रुचिकर रहेको उनले बताए।
लेखक बस्नेतले यात्राका बेला भेटेका विषयवस्तुलाई महिला अधिकारसँग जोडेर प्रस्तुत गरेको राणाले जनाए। पुस्तकका विषयमा समीक्षात्मक मन्तव्य व्यक्त गर्दै कथाकार ढुङ्गानाले पुस्तकमा दुई सय १२ वटा निबन्ध समेटिएको बताइन्। विदेश गएका बेलाको यात्रा संस्मरणका विषय बढी रुचि लाग्ने खालका भएको उनले बताइन्।
‘चीन भ्रमणका बेला ग्रेटवालजस्ता ऐतिहासिक स्थलको विषयमा लेखिनुपर्ने थियो, यस्ता विषय छुटेको छ, कतिपय शीर्षक अङ्ग्रेजीमा राखिएको छ, यसो नगरी नेपालीमै मात्र राखे राम्रो हुन्थ्यो’ कथाकार ढुङ्गानाले भनिन्।
लेखक बस्नेतले आफूले यात्रा धेरै गर्ने गरे पनि अभिलेख नराख्ने गरेको सुनाउँदै आफूले यात्राका बेला भेटिएका विषयवस्तुलाई समेटेर पुस्तक लेखेको बताइन्। यसमा आफ्ना कथा र यात्राका कहानी समेटिएको उनले जानकारी गराइन्।
कार्यक्रममा बुक हिलका संस्थापकद्वय पवन आचार्य र भूपेन्द्र खड्काले यात्रा संस्मरणमा उल्लेखनीय पुस्तक पाठकसामु ल्याउन सफल भएको बताए।
‘(बबिता बस्नेत) समयले बनाएको एक जबरजस्त व्यक्तित्व, नयाँ कृतिको निम्ति हृदयबाटै बधाई तथा शुभकामना छ। मलाई यति विश्वास छ कृति पढ्दै गर्दा पाठकहरुले आफूलाई शब्दहरुमा भेट्टाएको महसुस गर्नुहुनेछ,' सञ्चारिका समूह नेपालकी अध्यक्ष बिमल तुम्खेवाले भनिन्।
त्यस्तै, सञ्चारकर्मी यशोदा तिम्सिना लेख्छिन्, ‘२३ देशको भ्रमण २१५ पेजमा समेटिएको रहेछ। सलल बगेको पुस्तक पढ्न साढे तीन घण्टा लाग्यो। सानातिना एकाध त्रुटीबाहेक खोट लगाउने ठाउँ भेटिएन। गाउँबाट करिअर खोज्दै शहर पसेकी युवती/महिलाको संघर्ष भेटिन्छ पुस्तकमा। पुस्तक सबै किसिमका पाठकलाई रूच्ने छ भन्ने शुभकामना!’
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
-1786513116.png)
