काठमाडौं–श्रीलंकामा प्रदर्शनकारीहरु राष्ट्रपति भवनमा प्रवेश गरेको भिडियो सार्वजनिक भएको छ। स्थानीय समाचार एजेन्सी न्यूजवायरले सार्वजनिक गरेको भिडियोमा हजारौंको संख्यामा प्रदर्शनकारीहरु राष्ट्रपति भवनमा प्रवेश गरेर तोडफोड गरिरहेको देखिन्छ।
राजधानी कोलम्बोमा शुक्रबार नै ठूलो मात्रामा सशस्त्र सैनिक र प्रहरी तैनाथ गरिएको थियो। अधिकारीहरुले शुक्रबार राति नै कर्फ्यु घोषणा गरेर प्रदर्शनकारीलाई रोक्ने प्रयास पनि गरेका थिए। तर राजनीकि दल र नागरिक समाजको कडा आपत्तिपछि कर्फ्यु फिर्ता लिइयो। बार एशोसियसनले प्रहरी प्रमुखविरुद्ध नै मुद्दा दायर गर्ने चेतावनी दिएको थियो।
घरभित्रै रहनु भनि जारी गरिएको आदेश अवज्ञा गर्दै प्रदर्शनकारी शनिबार राष्ट्रपतिको सरकारी निवासछेउमा जम्मा हुन थालेका थिए।
समाचार एजेन्सी एएफपीका अनुसार प्रदर्शनकारीले रेल्वे कर्मचारीलाई कोलम्बो जानका लागि रेल चलाउन बाध्य पारेका थिए। प्रहरीले भीड तितरबितर पार्न अश्रु ग्याँस र हवाई फायर गरेको थियो।
तर, यति धेरै मानिस प्रदर्शनका लागि पुगे कि प्रहरीले रोक्नै सकेन। सामाजिक सञ्जालमा भाइरल भएका भिडियोहरुमा मानिसहरु राष्ट्रपति निवासमा प्रवेश गरिरहेको देखिन्छ। मानिसहरु राष्ट्रपतिको आलिसान कोठामा आराम गर्नेदेखि स्वीमिङ्ग पुलमा प्रवेश गरेको देखिन्थ्यो।
प्रधानमन्त्री विक्रमसिंघे राजीनामा दिन तयार
यसैबीच, श्रीलंकाका प्रधानमन्त्री रनिल विक्रमसिंघेले आफू राजीनामा दिन तयार रहेको बताएका छन्। शनिबार दिउँसो सरकारविरोधी प्रदर्शनकारी राष्ट्रपति गोटाबाय राजापाक्षेको सरकारी आवासमा प्रवेश गरेपछि प्रधानमन्त्री निवास पनि प्रवेश गरेका थिए।
विक्रमसिंघेले सर्वदलीय सरकार निर्माणका लागि सहज होस् भनेर आफू राजीनामा दिन तयार भएको बताएका छन्।यस्तै, श्रीलंकाका पूर्वक्रिकेटर सनथ जयसूर्याले पनि शनिबार भएको प्रदर्शनमा भाग लिएका थिए। उनले प्रदर्शनकारीसँगैका आफ्नो केही तस्बिर सामाजिक सञ्जाल ट्वीटरमा सार्वजनिक गरेका छन्।
बीबीसी हिन्दीबाट
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1791212224.jpg)
-1786602170.png)
-1791090469.jpeg)
