तस्बिर: केएमजी
काठमाडौं– कान्तिपुर हाफ म्याराथनको दशौँ संस्करणअन्तर्गत पुरुषतर्फको २१.१ किमिको हाफ म्याराथनमा सशस्त्र प्रहरी बलका गोपीचन्द्र पार्की प्रथम भएका छन्। यस्तै, महिलातर्फ नेपाल प्रहरीका राजपुरा पछाइ प्रथम भइन्।
पार्कीले १ घण्टा ७ मिनेट ४१ सेकेन्डमा निर्धारित दूरी पूरा गरेका थिए। पार्की १३औं दक्षिण एसियाली खेलकुद (साग) मा ५ हजार मिटर दौडमा स्वर्ण पदक विजेतासमेत हुन्। यस्तै, पछाइले निर्धारित दूरी १ घण्टा १९ मिनेट १० सेकेन्डमा पूरा गरिन्।
त्रिभुवन आर्मी क्लबका दीपक अधिकारी १ घण्टा ७ मिनेट ५० सेकेन्डमा निर्धारित दूरी पूरा गरेर दोस्रो भए। तेस्रो हुने त्रिभुवन आर्मी क्लबकै मुकेश पालले १ घण्टा ८ मिनेट ४७ सेकेन्डमा निर्धारित दूरी पार गरे। चौथो, पाँचौँ र छैटौँ पनि त्रिभुवन आर्मी क्लबकै धावक भएका छन्।
महिलातर्फ सशस्त्र प्रहरी बलकी पुष्पा भण्डारी १ घण्टा २२ मिनेट पाँच सेकेन्डमा निर्धारित दूरी पार गर्दै दोस्रो भइन्। नेपाल पुलिस क्लबकी रोवा विष्ट १ घण्टा ३० मिनेट ४२ सकेन्डमा निर्धारित दूरी पार गर्दै तेस्रो स्थान हासिल गर्न सफल भइन्।
चौथो हुने त्रिभुवन आर्मी क्लबकी निर्मला केसी, पाँचौँ हुने विन्द्रा श्रेष्ठ र छैटौँ हुने आर्मीकी गीता विकले क्रमशः १ घण्टा ३१ मिनेट १३ सेकेन्ड, १ घण्टा ३३ मिनेट २७ सेकेन्ड र १ घण्टा ३६ मिनेट ३ सेकेन्डमा निर्धारित दूरी पार गरे।
कान्तिपुर हाफ म्याराथनको २१.१ किमि विधामा महिला र पुरुषका विजेताले १/१ लाख पुरस्कार पाउने छन्। यो गत संस्करणभन्दा दोब्बर वृद्धि हो। दोस्रो, तेस्रो, चौथो, पाँचौँ र छैटौँ हुनेले क्रमशः ५० हजार, ३० हजार, २० हजार, १० हजार र रु पाँच हजार प्राप्त गर्ने जनाइएको छ।
‘जलवायु परिवर्तन’ नाराका साथ आयोजित दशौँ संस्करणमा महिला र पुरुष दुवैको २१.१ किमिको हाफ म्याराथन, कर्पोरेट दौड (पाँच किमि), ह्विलचियर रेस (तीन किमि) गरी तीन विधामा प्रतिस्पर्धा भएको थियो। हाफ म्याराथन थापाथलीबाट सुरु भएर माइतीघर, बानेश्वर, तीनकुने, कोटेश्वर, जडीबुटी, लोकन्थली, थिमि, सल्लाघारी, कटुञ्जे रोडबाट सोही रुट फर्किएर थापाथली आएर समापन भएको थियो।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1787755120.jpg)
-1786602170.png)
-1786513116.png)
