९० वर्षीय वृद्ध बौद्धमान कार्की र प्रहरीले सिल गरेको घटनास्थल क्षेत्र (रातो घेरामा)।
काठमाडौं– संखुवासभामा एकै परिवारका ६ जनाको हत्या भएको घटनामा जीवित रहेका ९० वर्षीय वृद्धले घटनाबारे आफूलाई केही जानकारी नभएको बताएका छन्।
९० वर्षीय वृद्ध बौद्धमान कार्कीले घटनाबारे आफूलाई केही जानकारी नभएको बताएका हुन्।
बौद्धमानलाई उदृत गर्दै घटनास्थल मादी नगरपालिका–१ उमलिङका वडाध्यक्ष खेमनाथ कटुवालले भने, ‘अहिले म घटनास्थलमै छु। घटनाबारेमा सोही परिवारका जीवित सदस्य ९० वर्षीय बौद्धमानसँग बुझ्दा उहाँले कुनै जानकारी नभएको बताउनुभएको छ।’
वडाध्यक्ष कार्कीका अनुसार बौद्धमानले आफू ६ बजे नै खाना खाएर सुतेको र घटनाबारे केही थाहा नभएको बताए। बिहान मात्रै घटनाबारे अरुले भनेपछि जानकारी पाएको उनको भनाइ छ । बौद्धमान राम्रोसँग कान पनि सुन्न सक्दैनन् भने आँखासमेत राम्रोसँग देख्दैनन्।
लखेटी–लेखेटी हत्या गरिएको आशंका
सोमबार बाटो हिँड्ने स्थानीयले बाटोमा शव देखेपछि यस हत्याकाण्डबारे प्रहरीसम्म जानकारी पुगेको थियो। त्यसपछि २ घण्टा टाढा रहेको मादी प्रहरी चौकीबाट प्रहरी हवल्दारको कमाण्डमा ३ जनाको टोली घटनास्थल पुगेको थियो। उनीहरुले घटनास्थललाई सुरक्षित गरेका थिए।
अहिले भने खाँदबारीबाट डिएसपी लालध्वज सुवेदीसहितको टोली घटनास्थल पुगेकीसकेको छ। उनका अनुसार एउटा शव बाटोमा भेटिएको छ। एउटा शव घरभत्रि रहेको छ। दुई वटा शव बारीको कान्लामा छन् भने बाँकी २ वटा शव खोल्सामा छन्।
विभिन्न ठाउँमा शवहरु छरिएको पाइएपछि लखेटी–लखेटी हत्या भएको हुनसक्ने प्रहरीले प्रारम्भिक अनुमान गरेको छ। ‘शवहरु एकै ठाउँमा छैनन्। छरपस्ट अवस्थामा रहेकाले लखेटी–लखेटी हत्या भएको हुनसक्ने हामीले आशंका गरेका छौं’ डिएसपी सुवेदीले नेपाल लाइभसँग भने।
उक्त घटनामा मादी नगरपालिका–१ खोला गाउँका ५८ वर्षीय तेजबहादुर कार्कीको परिवारका ६ जनाको हत्या भएको छ।
मृत अबस्थामा फेला पर्नेहरुमा ८४ वर्षीया पार्वती कार्की, ५२ वर्षीय तेज बहादुर कार्की, ५२ वर्षीया कमला कार्की, ३२ वर्षीया रञ्जना कार्की, ११ वर्षीय दिपेन कार्की र ७ वर्षीया गोमा कार्की रहेकी प्रदेशका १ का डिआइजी अरुणकुमार बिसीले नेपाल लाइभलाई जानकारी दिए ।
रञ्जनाका श्रीमान् भने विदेशमा रहेको पाइएको छ।
६ जनाको हत्या भएको खबर सोमबार बिहान साढे ९ बजेतिर प्रहरी चौकी मादी आएको थियो। स्थानीयले ६ जनाको हत्या भएको खबर गरेपछि प्रहरी चौकी मादीका कार्यरत हवल्दारसहित ३ जना प्रहरी तत्कालै घटनास्थल पुगेका थिए।
फरेन्सिक विज्ञ र कुकुरसहितको टोली घटनास्थलतर्फ
एकै परिवारका ६ जनाको हत्या भएको भन्ने जानकारी आएपछि घटनालाई गम्भीर रुपमा लिँदै फरेन्सिक विज्ञ र कुकुरसहितको टोली परिचालन गरिएको डिआइजी बिसीले नेपाल लाइभलाई जानकारी दिए। उनका अनुसार संघीय प्रहरी इकाई कार्यालयबाट तालिम प्राप्त कुकुरसहिको टोली घटनास्थल पठाइएको छ।
त्यसैगरी फरेन्सिक विज्ञसहितको टोलीले पनि पठाइएइको उनले जानकारी दिए। ‘जतिसक्दो घटना स्थललाई सुरक्षित राख्न भनिसकेका छौं’ डिआइजी बिसीले भने, ‘तालिम प्राप्त कुकुर र फरेन्सिक विज्ञको टोली घटनास्थल पुगेपछि अनुसन्धानमा सहज हुनेछ।’
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
-1775575666.png)
