सुरक्षा/अपराध

संखुवासभामा एकै परिवारका ६ जनाको हत्या घटना : फरेन्सिक विज्ञ र कुकुरसहितको टोली घटनास्थलतर्फ

नारायण अधिकारी सोमबार, भदौ २१, २०७८ १२:३७

काठमाडौं- संखुवासभामा एकै परिवारका छ जनाको हत्या भएको छ। मादी नगरपालिका-१ खोला गाउँका तेजबहादुर कार्कीको परिवारका छ जनाको हत्या भएको हो।

उनीसहित ८० वर्षीया पार्वता कार्की, ५८ वर्षीया तेजबहादुर कार्की, उनकी श्रीमती ५६ वर्षीया मनमाया कार्की, २८ वर्षीया बुहारी रञ्जना कार्की, १० वर्षीय नाती दीपक कार्की र पाँच वर्षीया नातिनी गोमा कार्कीको हत्या भएको पाइएको प्रदेशका १ का डीआईजी अरुणकुमार बिसीले नेपाल लाइभलाई जानकारी दिए।

सोही परिवारका सदस्य अपांगता भएका अर्का एक जना भने जीवितै रहेको पाइएको छ।

तीन प्रहरीले गरेका छन् घटनास्थलको सुरक्षा
छ जनाको हत्या भएको खबर सोमबार बिहान साढे ९ बजेतिर प्रहरी चौकी मादी आएको थियो। स्थानीयले छ जनाको हत्या भएको खबर गरेपछि प्रहरी चौकी मादीका कार्यरत हवल्दारसहित तीन जना प्रहरी तत्कालै घटनास्थल पुगेका थिए। उनीहरुले घटनास्थल र क्राइम सिन सुरक्षित गर्ने काम गरेको संखुवासभाका डीएसपी लालध्वज सुवेदीले बताए।

घटनास्थलमा पुगेको प्रहरी टोलीले धारिलो हतियार प्रहार गरेर हत्या गरेजस्तो देखिएको बताएको थियो। त्यसपछि अहिले खँबदबारीबाट डीएसपी सुवेदीसहितको टोली घटनास्थलतर्फ जाँदै छ। सुवेदीले नेपाल लाइभसँग भने, ‘घटना के कसरी भयो भन्ने अहिलेसम्म केही खुलेको छैन। हामी पनि घटनास्थलतर्फ जाँदै छौं।’

फरेन्सिक विज्ञ र कुकुरसहितको टोली घटनास्थलतर्फ
एकै परिवारका छ जनाको हत्या भएको भन्ने जानकारी आएपछि घटनालाई गम्भीर रुपमा लिँदै फरेन्सिक विज्ञ र कुकुरसहितको टोली परिचालन गरिएको डीआईजी बिसीले नेपाल लाइभलाई जानकारी दिए।

उनका अनुसार संघीय प्रहरी एकाइ कार्यालयबाट तालिम प्राप्त कुकुरसहिको टोली पठाइएको छ। त्यसैगरी फरेन्सिक विज्ञसहितको टोलीले पनि पठाइएको उनले जानकारी दिए।

‘जतिसक्दो घटनास्थललाई सुरक्षित राख्न भनिसकेका छौं,’ डीआईजी बिसीले भने, ‘तालिम प्राप्त कुकुर र फरेन्सिक विज्ञको टोली घटनास्थल पुगेपछि अनुसन्धानमा सहज हुनेछ।’

प्रहरीले अहिलेसम्म हत्या किन कसबाट भयो भन्नेतर्फ केही आकलन गर्न सकेको छैन। अहिलेको काम भनेको जतिसक्दो घटनास्थललाई सुरक्षित राख्ने काम भइरहेको छ।