काठमाडौं- जनता समाजवादी पार्टी (जसपा)मा सरकारमा सहभागी हुनेबारे छलफल तीव्र बनेको छ। फुटको संघारमा पुगेको पार्टीको आधिकारिकता विवाद टुंगो लागेपछि मात्र सरकारमा सहभागी हुने बताउँदै आएको अध्यक्ष उपेन्द्र यादवपक्षले शनिबारदेखि औपचारिक रुपमै यसबारे छलफल अघि बढाएको छ।
शनिबार बसेको सो पक्षको संसदीय दलको अनौपचारिक बैठकले सरकारमा आफ्नो पार्टीबाट सात जना मन्त्री र एक जना राज्यमन्त्री माग्ने निर्क्योल गरेको छ। शनिबारको बैठकमा जसपाको अर्को पक्ष, अध्यक्ष महन्थ ठाकुरपक्ष छाडेर आएका पाँचजना सांसदसमेत सहभागी थिए।
शनिबारको बैठकमा मन्त्रीको संख्याबारे एक खालको टुंगो लागेकाले अब पार्टीले माग्ने सम्भावित मन्त्रालय र त्यसमा जाने मन्त्रीहरुबारे पनि चर्चा सुरु भएको छ। जसपाले गठबन्धनका घटकहरुबीच मन्त्रालयहरुको समुचित र समानुपातिक बाँडफाँट हुनुपर्ने तर्क पनि अघि सारेको छ।
को-को छन् मन्त्रीका दाबेदार?
शनिबारको बैठकमा मन्त्रालय संख्याबारे टुंगो लागे पनि ती पदमा को-को मन्त्री बन्ने भन्नेबारे भने छलफल नभएको जसपा नेता एवं बाँकेबाट निर्वाचित प्रतिनिधि सभा सदस्य मोहम्मद इस्तियाक राईले बताए। उनले सबै भूगोल, जाति र समुदायको प्रतिनिधित्व हुनेगरी मन्त्री छनोट गर्नुपर्ने विषयमा भने समझदारी बनेको उल्लेख गरे।
जसपाबाट अध्यक्ष यादवकै नेतृत्वमा सरकारमा सहभागिता हुने चर्चा यसअघि भएको थियो। प्रधानमन्त्री देउवा र यादवबीच भएको समझदारीअनुसार यादव उपप्रधानमन्त्रीसहित परराष्ट्रमन्त्री बन्ने तय भएको देउवानिकट कांग्रेस नेताहरुले बताएका थिए। तर, जसपाभित्र यादवले नै सरकारमा नेतृत्व गरेर जानेबारे सहमति बन्न सकेको छैन।
बरु वरिष्ठ नेता राजेन्द्र श्रेष्ठको नाम अहिले मन्त्री बन्ने प्रमुख दाबेदारका रुपमा चर्चामा छ। त्यसैगरी महेन्द्र राय यादवलाई पनि मन्त्री बन्ने प्रबल दाबेदार मानिएको छ। 'राजेन्द्रजी सरकारमा जाने निश्चितजस्तै छ, महेन्द्रजी पनि प्रबल दाबेदार हो,' अध्यक्ष उपेन्द्र यादवनिकट जसपाका एक नेताले भने, 'महेन्द्रजी मन्त्री नबनेको अबस्थामा भने मृगेन्द्रसिंह यादव पनि मन्त्रीको दाबेदार बन्नुहुनेछ।'
यसबाहेक प्रदीप यादव, रेणु यादव र रामसहाय यादव पनि मन्त्री बन्ने चर्चामा छन्।
महन्थ ठाकुरपक्षबाट कति जना सांसद उपेन्द्रपक्षमा आइपुग्छन् भन्ने कुराले पनि को मन्त्री बन्ने भन्ने निर्क्योल गर्नेछ। अहिलेसम्म पाँचजना सांसद महन्थ ठाकुरलाई छाडेर उपेन्द्रपक्षमा आएका छन्। यो संख्या अझ बढ्ने बताइएको छ। 'अहिलेसम्मको अवस्था हेर्दा महन्थ पक्षबाट आएका साथीहरुमध्ये दुई जनालाई मन्त्री र एकजनालाई राज्यमन्त्री बनाउने तय भएको छ,' ती नेताले भने।
महन्थपक्षबाट आएका सांसदहरु प्रमोद साह, अमृता अग्रहरी, रानी मण्डल, रुही नाज र नरमाया ढकाल शनिबारको बैठकमै सहभागी भएका थिए। उनीहरु सबैलाई मन्त्रीको दाबेदारका रुपमा हेरिएको छ।
जसपाले तीन पार्टी (नेपाली कांग्रेस, नेकपा माओवादी केन्द्र र जसपा) मात्र सरकारमा सहभागी हुने अवस्थामा सात मन्त्री र एक राज्यमन्त्री मागे पनि नेकपा एमालेको माधवकुमार नेपालपक्ष पनि सरकारमा सहभागी भएमा चाहिँ त्यो संख्या कम हुनेछ। त्यो अवस्थामा मन्त्रीका आकांक्षीहरुको व्यवस्थापन गर्न थप कठिनाइ हुनसक्छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1778155080.jpg)
-1764146706.png)
