काठमाडौं- नेकपा (एमाले)का अध्यक्ष केपी शर्मा ओली सत्ताबाट बाहिरिएसँगै जनता समाजवादी पार्टी (जसपा)मा उपेन्द्र यादव-बाबुराम भट्टराई पक्षले आफ्नो पकड बलियो बनाउन थालेको छ।यसअघि सत्ताको नजिक भएर महन्थ ठाकुर–राजेन्द्र महतो पक्षले उपेन्द्र–बाबुराम पक्षलाई पेल्दै आएका थिए।
प्रतिनिधि सभा दोस्रोपटक पुनर्स्थापना भएपछि महन्थ–राजेन्द्र पक्षका सांसद र केन्द्रीय कार्यकारिणी समिति सदस्य उपेन्द्र–बाबुराम पक्षमा थपिँदै जान थालेपछि यो पक्ष बलियो हुँदै गएको छ।
जसपा कार्यकारिणी समितिका ५१ जना (रेशम चौधरी) मध्ये बाबुराम-उपेन्द्र पक्षमा ३० जना खुलेर लागेका छन्। शनिबारदेखि कार्यकारिणी सदस्य एवम सांसद अमृता अग्रहरी समेत खुलेर बाबुराम–उपेन्द्र पक्षमा लागेकी छिन्। दलको आधिकारिकता उपेन्द्र–बाबुराम पक्षले पाएमा कार्यकारिणी सदस्यको संख्या बढ्ने देखिएको छ।
जसपाको आधिकारिता टुंग्याउन निर्वाचन आयोगले गठन गरेको इजलासमा आइतबारदेखि बहस हुँदैछ। जसपाका दुवै पक्षका कानुन व्यवसायीहरुले आ-आफ्नो तर्क राखेपछि निर्वाचन आयोगले जसपाको आधिकारिकता टुंगो लगाउने भएको छ। साउन दोस्रो सातासम्म जसपाको आधिकारिकता टुंगो लगाएपछि शक्ति समीकरणमा निकै ठूलो फेरबदल हुने आकलन गरिएको छ।
उपेन्द्र-बाबुराम पक्षले महन्थ-राजेन्द्र पक्षलाई पेल्ने योजना अनुसार नै राष्ट्रिय जनता पार्टी (राजपा) नामको पार्टी आफूनिकट हरिनारायण यादवको नाममा दर्ता गराइसकेको छ। दलको आधिकारिकता आफूहरुले पाएमा महन्थ–राजेन्द्र पक्षलाई राजपा समेत नदिन आफूनिकट नेतालाई निर्वाचन आयोगमा दर्ता गराउन लगाएको बताइन्छ। जसपा र राजपा पार्टीको नाम उपेन्द्र-बाबुराम पक्षले होल्ड गरेर राखेकाले आधिकारिकता यो पक्षले पाए महन्थ-राजेन्द्र पक्षले अर्कै पार्टी बनाउनुपर्नेछ।
ओली नेतृत्वको सरकारमा सहभागी हुँदा जसपाका ३२ सांसदमध्ये २० सांसद महन्थ–राजेन्द्र पक्षमा खुलेर लागेका थिए। उनीहरुसँग लागेमा सरकारमा जान पाइने र पार्टीमा अवसर पाइने भएकाले उपेन्द्र–बाबुराम पक्षका सांसद समेत उतै लागेका थिए। ओलीको बर्हिगमन भएपछि उपेन्द्र–बाबुराम पक्षको पल्लाभारी हुँदै गएको छ।
शनिबार उपेन्द्र–बाबुराम पक्षको संसदीय दलको अनौपचारिक बैठकमा ५ सांसद थपिएका छन्। जसमा प्रमोद साह, रुही नाज, अमृता अग्रहरी, रानी मण्डल र नरमाया ढकाल छन्। अब ३२ जना सांसदमध्ये उपेन्द्र–बाबुराम पक्षमा १७ जना र महन्थ–राजेन्द्रपक्षमा १५ जना मात्रै छन्। निर्वाचन आयोगले दलको आधिकारिकता टुंगो लगाउन बित्तिकै उपेन्द्र–बाबुराम पक्षमा कार्यकारिणी सदस्य र सांसदको संख्या बढ्दै जाने नेता मोहम्मद इस्तियाक राईले बताए।
तर, महन्थ-राजेन्द्र पक्षका नेता एकवाल मियाँले मन्त्री बनाउने आश्वासनमा उपेन्द्र-बाबुरामले सांसदहरू तानिरहेको बताए। 'सबैलाई मन्त्री बनाउने भन्दै लोभ्याएर सांसद तान्न खोजेका छ्न्। सबै सांसदलाई मन्त्री बनाउन सक्दैनन्। त्यसपछि पुरानै घर फर्किन्छ्न्। हामी पहिलेकै अवस्थामा पुग्छौं', उनले भने।
यता, राईले भने अहिले कार्यकारिणी समितिमा ६५ प्रतिशत भएको बताउँदै सांसदमा समेतमा पूर्ण बहुमत पुग्ने दाबी गरे। ‘हामी ठीक बाटोमा थियौं। त्यसैले पार्टीमा बलियो छौं। हामी व्यवस्था बचाउन, संविधान बचाउन लागेका थियौं। जनयुद्ध, जनआन्दोलन, मधेश र अन्य आन्दोलनबाट प्राप्त उपलब्धी रक्षार्थ अडानमा थियौं’ राईले नेपाल लाइभसँग भने, ‘अल्पमत बहुमत नभनेर अडानमा थियौं। त्यसकारण अजेण्डा सफल भएको छ।’
जसपामा पछिल्लो समय महन्थ–राजेन्द्र पक्ष रक्षात्मक हुँदै गएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1778155080.jpg)
-1764146706.png)
