काठमाडौं– सम्पत्ति शुद्धीकरण, अकूत सम्पत्ति आर्जन, कर्तव्य ज्यान तथा अपहरण मुद्दा लागेका पूर्वमन्त्री सञ्जयकुमार साहले श्रीमती दुलारीदेवी साह र बाबु साधु साह सुडीको नाममा रहेको सम्पत्ति फुक्का गराउने प्रयास असफल भएको छ।
विशेष अदालतले मुद्दाको किनारा नलागेसम्म सम्पत्ति प्रतिवादीमध्ये कसैको नाममा रहेको भए पनि फुक्का गर्न नमिल्ने आदेश गरेपछि साहको प्रयास असफल भएको हो। साहकी श्रीमती र बाबुले गत शुक्रबार विशेष अदालतमा सम्पत्ति फुक्का गरिदिन माग गर्दै निवेदन दर्ता गराएका थिए। उक्त निवेदनमा शुक्रबार सुनुवाइ गर्दै विशेषले मुद्दाको किनारा नभएसम्म नमिल्ने आदेश गरेको हो। विशेषले अदालतमा प्रतिवादी बनाएका सबैको नाममा रहेको सम्पत्ति हाललाई निलम्बनकै अवस्थामा राख्नसमेत आदेश गरेको छ।
विशेषका न्यायाधीशत्रय द्वारिकामान जोशी, चण्डीराज ढकाल र नारायणप्रसाद पोखरेलको इजलाशले फुक्का गर्न अस्वीकार गरेको हो।
साहको घरव्यवहार मिलाउन बिक्री गर्ने प्रयोजनका लागि सम्पत्ति फुक्का गर्न भन्दै निवेदन दिएका थिए। तर विशेषले साहले आर्जन गरेको सम्पत्ति परिवारका अन्य सदस्यको नाममा लुकाएर राखेको दाबी गरेकाले फुक्का गर्न नमिल्ने तर्क गरेको छ।
सम्पत्ति शुद्धीकरण अनुसन्धान विभागले साहविरुद्ध ३२ करोड ४ लाख ५० हजार सम्पत्ति गैरकानुनी आर्जन गरेको दाबी गर्दै विशेषमा चैत १६ गते सम्पत्ति शुद्धीकरण मुद्दा दायर गरेको थियो। उक्त मुद्दामा सुनुवाइ गर्दै विशेषले ५० लाख धरौटी माग गरेको थियो। धरौटी नबुझाउने भनेपछि उनलाई थुनामै पठाइएको छ।
साहले विभिन्न गैरकानुनी गतिविधिबाट रकम आर्जन गरी सम्पत्ति शुद्धीकरण अनुसन्धान ऐनविपरीत कार्य गरेको दाबी गर्दै अर्थ मन्त्रालय अन्तर्गत रहेका सम्पत्ति शुद्धीकरण अनुसन्धान विभागले मुद्दा दायर गरेको थियो। साहको सम्पत्ति शुद्धीकरण विभागले उनीसहित १३ जनालाई विपक्षी बनाएको थियो।
जनकपुर बमकाण्ड र सञ्चार उद्यमी अरुण सिंघानिया हत्याको मुख्य अभियुक्तको आरोपमा उनीमाथिको मुद्दा धनुषा जिल्ला अदालतमा विचाराधीन छ। जिल्ला थुनामा रहेका साहविरुद्ध अदालतमा विचाराधीन मुद्दाको संख्या नै तीन पुगेको छ।
सुनुवाइ सर्यो
अख्तियार दुरुपयोग अनुसन्धान आयोगले पूर्वसांसद साहविरुद्ध दायर गरेको ३१ करोडको भ्रष्टाचार मुद्दाको पेसी समेत सोमबार तोकिएको थियो। तर, उक्त मुद्दा हेर्न नभ्याउने हुँदै सुनुवाइ सरेको छ।
साहले सांसद र मन्त्री हुँदा पदको दुरुपयोग गर्दै ३१ करोड बराबरको रकम अवैध आर्जन गरेको दाबी अख्तियारको छ।
सम्पत्ति शुद्धीकरण विभागको २ वर्ष लामो अनुसन्धान प्रतिवेदन अनुसार साहले हत्या, अपहरण, फिरौती, जबर्जस्ती असुली लगायत अपराधजन्य गतिविधिबाट आर्जन गरेको चलअचल गरी ३२ करोडको सम्पत्ति भेटिएको आरोपपत्रमा उल्लेख छ। विभागले उनी तथा आफन्तका नाममा भएको चलअचल सम्पत्तिसमेत छानबिन गर्न नेपाल प्रहरीको केन्द्रीय अनुसन्धान ब्युरो (सिआइबी) लाई २ वर्षअघि जिम्मा दिएको थियो।
साहलाई २०६९ बैसाख १८ मा जनकपुरको रामानन्द चोकमा ५ जनाको ज्यान जानेगरी भएको बम विस्फोट र २०६६ फागुन १७ मा सञ्चार उद्यमी सिंघानिया हत्याका मुख्य योजनाकार भएको अभियोग लगाइएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
1677243823-1775234234-1789571125.jpg)
-1786602170.png)
