काठमाडौं- व्यवसायी अजय सुमार्गीले विभिन्न देशबाट ऋण लगानीका रूपमा नेपाल भित्र्याएको रकमको विषयमा छानबिन गरिरहेको सम्पत्ति शुद्धीकरण अनुसन्धान विभागले सम्बन्धित देशबाट विवरण माग्ने भएको छ।
विभागले सुमार्गीले नेपालबाट विभिन्न देशमा रकम पठाएर पुनः विदेशी लगानी भन्दै सो रकम नेपाल भित्र्याएको हुनसक्ने भन्दै छानबिन सुरु गरेको थियो। करिब एक वर्षको अनुसन्धानपछि विभागले सुमार्गीले गैरकानुनी तवरमा नेपालबाटै रकम पठाएर ऋण लगानी भन्दै पुनः नेपालमै रकम फिर्ता ल्याएको पुष्टि भएको दाबी गरेको छ।
विभाग स्रोतबाट नेपाल लाइभलाई प्राप्त कागजातमा सुमार्गीले ‘जोधार जोइन्ट भेन्चर’ कम्पनीको नाममा रकम नेपाल ल्याएका छन्। ‘अनुसन्धानका क्रममा जोधारका मालिक पनि सुमार्गी रहेको पुष्टि भएको छ,’ विभाग स्रोतले भन्यो, ‘इन्टेलिजेन्स अध्ययनमा उक्त कम्पनी सुमार्गीकै हो भनेर उल्लेख भएको छ।’
सुमार्गीले ११ करोड अमेरिकी डलर नेपाल ल्याएको विवरण खुलेको समेत विभागको दाबी छ। त्यसमध्ये नेपाल आइसकेको ४ करोड डलर नगदको कारोबार बन्द गरिएको विभाग स्रोतले जानकारी दिएको छ।
‘यो प्रकरणमा धेरै व्यक्ति जोडिएका देखिन्छन्, विभागले इन्टेलिजेन्सको सहयोगमा सबै देशबाट विवरण संकलन गरिसकेको छ’, विभाग स्रोतले भन्यो, ‘इन्टेलिजेन्स रिपोर्टको आधारमा मात्र त्यसलाई अदालतको प्रमाणको रुपमा पेस गर्न मिल्दैन। सोही कारण सम्बन्धित देशबाट विवरण (हार्ड कपी) प्रमाणको रूपमा माग्ने प्रक्रिया सुरु भएको छ।’
सम्पति शुद्धीकरण अनुसन्धान विभाग स्रोतले त्यसरी मागिएको विवरण प्राप्त हुनसाथ मुद्दा दायर गर्ने तयारी भइरहेको जानकारी समेत दिएको छ। ‘तर, पछिल्लो समय उक्त कामलाई रोक्न राजनीतिक तवरबाट दबाब पनि आइरहेको छ,’ विभाग स्रोत भन्छ, ‘यो मुद्दा दायर भएको अवस्थामा नेपालबाट हुने मनी लाउन्ड्रिङको थप नयाँ तथ्य पनि सार्वजनिक हुन्छ।’
विभागले सुमार्गीको धन छानबिनका लागि अहिले साइप्रस र बेलायतबाट विवरण माग्ने प्रक्रिया सुरू गरिएको जानकारी दिएको छ। तर, विवरण कसरी मागिएको भन्नेबारे उल्लेख गर्न नमिल्ने तर्क गर्दै विभाग स्रोतले भन्यो, ‘सुमार्गीको अन्य रकम रोक्का छैन, नगद भने रोक्का छ।’
यो प्रकरणलाई चाँडो मुद्दा प्रक्रियामा लैजान सके नेपालमा सम्पत्ति शुद्धीकरण सम्बन्धी अनुसन्धान अब्बल रहेको प्रमाणित हुने विभाग स्रोतले दाबी गर्यो।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
-1791388337.png)
