काठमाडौं- अवैध रुपमा आयात भएका टेस्ला र अउडीका कारसम्बन्धी दुईवटा मुद्दा समान प्रकृतिका भए पनि सर्वोच्च अदालतले दोहोरो व्याख्या गरेको छ। सर्वोच्चले टेस्लाको कार तत्काल छुटाउन आदेश दियो, तर अउडीका कार रोकेर मुद्दा फैसला भएपछि मात्र छुटेका छन्।
टेस्ला आयातकर्ता श्रीमा डिस्ट्रिब्युसनले दायर गरेको मुद्दामा सर्वोच्चले तत्काल कार छुटाउन आदेश दियो भने अउडी आयातकर्ता प्रिन्सालाई मुद्दा फैसला भएपछि मात्र छुटाउन दिइयो।
टेस्लाका कार छुटाएर सुरक्षित रुपमा राख्न आयातकर्तालाई दिन सर्वोच्चले भन्सार कार्यालयको नाममा अन्तरिम आदेश दिएको थियो। यसरी अन्तरिम आदेश दिने मुख्य आधार कारमा प्रयोग भएको ब्याट्री बिग्रिन्छ भन्ने नै थियो।
श्रीमाले दायर गरेको रिटमाथि सुनुवाइ गर्दै न्यायाधीश प्रकाशकुमार ढुंगानाले २०७७ जेठ २६ मा दिएको अन्तरिम आदेशमा ‘कारमा जडित ब्याट्री बिग्रने र कम्प्युटर जडित पार्टपुर्जा बिग्रिएर आयाकर्तालाई अपूरणीय क्षति पुग्ने हुँदा लाग्ने दस्तुरलगायत अन्तिम फैसला आएपछि टुंगिने गरी निवेदकलाई दुईवटा कार दिनू’ भनिएको छ।
टेस्ला आयातकर्ता श्रीमाले ल्याएका ती कार २०७६ माघमा भन्सारमा आइपुगेका थिए। जेठ १५ मा आर्थिक ऐन २०७७ आएसँगै श्रीमाले जेठ १९ मा सर्वोच्चमा मुद्दा दायर गरेको थियो। सर्वोच्चले जेठ २६ मा गाडी छुटाउन अन्तरिम आदेश दियो। त्यसविरुद्ध भन्सारले असार २ मा भ्याकेट हालेको भए पनि सर्वोच्चले असार ११ मा भ्याकेट खारेज गरिदियो। भन्सारको भ्याकेट न्यायाधीशद्वय सपना प्रधान मल्ल र पुरुषोत्तम भण्डारीको संयुक्त इजलासले खारेज गरेको थियो।
तर, श्रीमाले ल्याएका टेस्लाका कार छुटेपछि अउडीको आयातकर्ता प्रिन्सा अटोमोटिभ्स पनि सर्वोच्च पुगेको थियो। प्रिन्साको तर्फबाट रमेशकुमार जालानले असार २८ मा सर्वोच्चमा मुद्दा दायर गरेकोमा त्यसको भोलिपल्ट, २९ गते न्यायाधीश तेजबहादुर केसीको इजलासले छलफलमा बोलाउन आदेश दिएको थियो।
साउन २७ मा पुनः पेशी तोकिएकोमा न्यायाधीशद्वय सुस्मालता माथेमा र हरिकृष्ण कार्कीको संयुक्त इजलासले फाइल मगाउन आदेश दिएको थियो। प्रिन्साले पनि २०७६ माघमा नै तीनवटा अउडी कार ल्याएको थियो।
सर्वोच्च अदालतको आदेश
प्रिन्साले पनि इलेक्ट्रिक कार बिग्रने भन्दै तत्काल छुटाउन माग गरेको थियो। तर, सर्वोच्चले प्रिन्साको उक्त जिकिरलाई बेवास्ता गरेको देखिन्छ। टेस्ला कार ल्याएको श्रीमाले कारमा प्रयोग भएको ब्याट्री बिग्रने जिकिर गरेको र त्यसैलाई आधार मानेर सर्वोच्चले कार छुटाउन आदेश दिएको थियो।
त्यतिमात्र होइन, सर्वोच्चले अउडीको आयातकर्ता प्रिन्साले आधिकारिक बिक्रेताको प्रमाणित कागजात पेस गर्न नसकेको फैसला दिएको छ। यता टेस्लाको आयातकर्ता श्रीमाले समेत काजगात पेस गरेको थिएन। पछिल्लोपटक टेस्लाका कार श्रीमा डिस्ट्रिब्युसनले नभई अरेत इन्टरनेसनल नामक कम्पनीले आयात गर्न थालेको छ। यी दुवै कम्पनी एकै समूहबाट सञ्चालित छन्।
टेस्लाको २०११ मा जारी बिक्री नीतिअनुसार उसले आफ्ना कार जुन देशमा बिक्री गर्छ त्यही देशको कम्पनीसँग साझेदारी गरेर खोलिएको नयाँ कम्पनीबाट मात्र बिक्री हुने उल्लेख छ।
पछिल्लोपटक टेस्ला ल्याएको कम्पनी अरेतले आफूलाई हङकङ टेस्लाले आधिकारिक बिक्रेता दिएको दाबी गरेको छ। त्यसरी नेपाली कम्पनीलाई आधिकारिक बिक्रेता दिने अधिकार हङकङ टेस्लालाई छैन। तर, कम्पनीले त्यस्तो कागजातसमेत सर्वोच्चमा पेस गरेको छैन। यसबाट पनि सो कम्पनीले किर्ते कागजातकै भरमा कार आयात गरिरहेको पुष्टि हुन्छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
