काठमाडौं-अवैध रुपमा आयात भएका टेस्लाका इलेक्ट्रिक कार अदालतको आदेशमा छुटेपछि सोही बाटोबाट गाडी ल्याएको प्रिन्सा अटोमोटिभ्स पनि सर्वोच्च पुगेको छ। जर्मन गाडी उत्पादक अउडीको इलेक्ट्रिक कार ल्याएको प्रिन्सा आइतबार अदालत पुगेको हो। उक्त मुद्दामा सोमबार सुनुवाइ भइरहेको छ।
प्रिन्साले दायर गरेको मुद्दामा न्यायाधीश तेजबहादुर केसीको एकल इजलासमा सुनुवाइ भइरहेको छ। टेस्लाका गाडी आयातकर्ता श्रीमा डिस्ट्रिब्युटर्सले दायर गरेको मुद्दामा सर्वोच्चले गाडी छुटाउन अन्तरिम आदेश दिएपछि आफ्ना गाडी पनि छुटाउनु पर्ने भन्दै प्रिन्सा पनि अदालत पुगेको हो।
प्रिन्सा अटोमोटिभ्सले २०७६ भदौमा पहिलोपटक तीनवटा अउडीका इलेक्ट्रिक कार नेपाल भित्र्याएको थियो। उक्त विषयमा नेपाल लाइभले आयातकर्ता कम्पनी आधिकारिक बिक्रेता नियुक्त नभइ अवैध रुपमा गाडी ल्याएको समाचार प्रकाशित गरेको थियो।
त्यसपछि भन्सारले प्रिन्साले दोस्रो लटमा ल्याएका ३ वटा इलेक्ट्रिक कार र अन्य कम्पनीका ३ वटा कार जाँचपास गरेको थिएन। भन्सारले आयातकर्ताहरुलाई उत्पादक कम्पनीबाट आधिकारिक बिक्रेता नियुक्त भएको सक्कल कागजात पेश गर्न भनेको थियो। तर ती कम्पनीले सक्कल कागजात पेश गर्न सकेका थिएनन्।
सरकारले आगामी आर्थिक वर्षका लागि ल्याएको आर्थिक विधेयकमा विद्युतीय गाडीमा लाग्दै आएको भन्सार वृद्धि र अन्तःशुल्क बढाएको थियो। नयाँ करका दर लागू भए पनि कार आयातकर्ताहरुले पुरानै कर अनुसार गाडी ल्याउन पाउनु पर्ने र इलेक्ट्रिक कार भएकाले बिग्रन लाग्यो भन्ने तर्कका आधारमा गाडी छुटाउन भन्सारले इन्कार गरेको भन्दै सर्वोच्च अदालत पुगेका हुन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1782788260.png)
-1764146706.png)
