काठमाडौं- भृकुटीमण्डपमा जारी नाडा अटो सोमा बीएडब्लु इन्टरनेसनलद्वारा उत्पादित विद्युतीय सवारी साधानमा विशेष छुटको व्यवस्था गरिएको छ।
बीएडब्लुले बजारमा ल्याएको ब्रम्बी विद्युतीय गाडीमा नाडा ओटो सो अवधिभर गाडी बुकिङ गर्ने सबैलाई छुटको अवसर दिइएको छ। यसका साथै नेपाली डाक्टर तथा स्वास्थ्यकर्मीहरुका लागि भने थप विशेष छुटको व्यवस्था पनि गरिएको छ।
ब्रम्बी गाडी नेपाल भित्र्याएको एलआरआर मोटर्स प्रालीका सेल्स हेड श्रीजेश गौतमले विद्युतीय सवारी साधान भएकाले अटो सोको अवसरमा डाक्टर र स्वास्थ्यकर्मीहरुका लागि थप छुटको अफर दिएको जानकारी दिए।
'यो गाडी सहरी क्षेत्रका लागि निकै उत्तम मानिन्छ। सहरी क्षेत्रमा बसोबास गर्ने जोकोहीको पनि रोजाईमा यो पर्नसक्छ,' उनले भने, 'यो विद्युतीय सवारी भएकाले प्रत्यक्ष रुपमा वातावरणसँग र स्वास्थ्यसँग जोडिएको छ। त्यसकारण हामीले सुरुवाती अवसरमा चिकित्सक र स्वास्थ्यकर्मीलाई थप प्राथमिकता दिएका हौं।'
यो गाडी चीनको अटोमोबाइल्स कम्पनी बेजिङ अटोमोबाइल्स वर्क्स (बीएडब्लु) ले उत्पादन गरेको हो। बीएडब्लुले सन् १९५१ देनि विभिन्न ब्रान्डका गाडीहरु उत्पादन गर्दै आइरहेको छ। विद्युतीय गाडी भने कम्पनीले पहिलो पटक बजारमा ल्याएको हो।
कति पर्छ मूल्य? छुटपछि कति पर्छ?
उक्त गाडीको मूल्य नेपालमा २३ लाख तोकिएको छ। तर नाडाका अवसरमा उक्त मूल्यमा छुट दिँदै गाडीको मूल्य २१ लाख ९० हजार राखिएको गौतमले जानकारी दिए।
'छुटसहितको यो मूल्य नाडामा आएर बुक गर्ने सबैले पाउने छन्,' उनले भने, 'यसका साथै नाडाको छ दिनभित्र बुक गर्नेलाई थप सुविधा पनि दिएका छौं। जसमा ७.७ किलोवाटको पोर्टेवल चार्जर, १ वर्षको बीमा र कर फ्रि। अलो हुइल पनि अफरमा दिएका छौं।'
यी सुविधासहित डाक्टर र स्वास्थ्यकर्मीहरुका लागि थप अफर पनि राखिएको उनले जानकारी दिए। उनका अनुसार पहिला बुकिङ गर्ने एक सय जना डाक्टर र स्वास्थ्यकर्मीलाई विशेष अफर दिइएको छ।
'सानो र आकर्षक लुक्स भएकाले नाडामा आउने अधिकांशको सकारात्मक प्रतिक्रिया पाएका छौं। धेरैले फर्किएर आएर पनि बुकिङ गर्नुभएको छ,' गौतमले भने।
केके छन् विशेषता?
कम मूल्यमा सानो आकारको यो कारमा पाँच वटा ढोका रहेका छन्। यो ह्जाब्याग टाइपको कार हो। यसमा १७.२८ किलोवाटको ब्याट्री क्षमता रहेको छ। ३० किलोवाटको मोटर क्षमता रहेको छ। यसले फुल चार्ज हुँदा २२० किलोमिटरसम्म यात्रा गर्ने सक्छ। कारको ग्राउन्ड क्लिएरेन्स १७० एमएम रहेको कम्पनीले जनाएको छ।
कम्पनीका अनुसार गाडी खरिद गर्दा ब्याट्री र मोटरमा पाँच वर्षको वारेन्टी पाइन्छ। यसमा ३६० डिग्री क्षमताको क्यामेरा रहेको छ। किलेस इन्ट्री विशेषता रहेको उक्त कारमा दुइ वटा इयर ब्याग रहेको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
