काठमाडौँ– किस्ट मेडिकल कलेज तथा शिक्षण अस्पताल र अस्पतालमा सुत्केरीको क्रममा मृत्यु भएकी महिलाका आफन्तबीच सहमति भएको छ।
अस्पतालले ती महिलाका सन्तानको पालनपोषण, उपचार र शिक्षाको जिम्मा लिने सहमति भएको हो।
जिल्ला प्रशासन कार्यालय ललितपुरमा सुरक्षा निकाय, अस्पताल र मृतक परिवारबीच भएको छलफल गरिएको हो। छलफलपछि अस्पतालले नौ वर्षीया जेठी छोरी र नवजात शिशुको पालनपोषण तथा अध्ययनका लागि सहयोग गर्ने सहमति गरिएको बिरामीका आफन्तले जनाएका छन्।
अस्पताल प्रशासनले भने नवजात शिशुको मात्रै उपचारको जिम्मा लिएको जनाएको छ।
बच्चाको हालको उपचार तथा बच्चाले पेडियाट्रिक समय पार नगरुन्जेल सम्म अस्पतालले निशुल्क उपचार गर्ने सहमति भएको अस्पतालले जनाएको छ।
किस्ट अस्पतालका प्रमुख सञ्चालन अधिकृत अमिस पाठक सन्तानको पालनपोषण र शिक्षाको जिम्मा अस्पतालले लिने भन्ने सहमति नभएको बताउँछन् ।
बच्चाले पेडियाट्रिक उमेर पार नगर्दासम्म किस्ट अस्पतालमा नै गरिएको उपचार निशुल्क हुने गरी सहमति गरिएको उनले जानकारी दिए।
सहमतिमा कुनै आर्थिक क्षतिपूर्तिको व्यवस्था नगरिएको उनी बताउँछन्। पैसाको लेनदेन हुँदा लाश माथि खेलवाड हुनसक्ने भन्दै त्यसो नगरिएको पाठकको दाबी छ।
मिनाश्री राई सुत्केरी भएपछि अत्यधिक रक्तस्रावका कारण उनको मृत्यु भएको अस्पतालले जनाएको छ। तर, आफन्तले भने चिकित्सकको लापरबाहीले सुत्केरीको मृत्यु भएको भन्दै प्रदर्शन गरेका थिए । सोमबार प्रहरी र मृतकका आपन्तबीच झडप समेत भएको थियो। अस्पताल तोडफोड समेत गरिएको थियो। अस्पतालको गेट तोडेर प्रदर्शन गर्न थालेपछि प्रहरीले लाठी चार्जसहित २४ राउन्ड अश्रुग्यास प्रहार गरेको थियो ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
