भैरहवा– २५६२औं बुद्धजयन्ती मूल समारोह सञ्चालन गर्ने भनिएको सभाहल तयार भएको छ। लुम्बिनीमा सञ्चालन हुने समारोहका लागि लुम्बिनी विकास कोषले ४ करोड रुपैयाँको लागतका अस्थायी भवन निर्माण गरेको हो। मन्त्रीपरिषद्को निर्णयबाट नेपाली सेनाले सभाहल निर्माणको जिम्मा पाएको थियो।
बौद्ध झण्डामा अंकित ५ रंगले सभाहललाई रंग्याइएको छ। भित्र र बाहिरका पर्खाल तथा भीत्तामा लगाइएको नीलो, पँहेलो, रातो, सेतो र कलेजी (फिका गुलावी) रंगले बुद्धत्वको भाव झल्काएको छ।
उक्त हलमा बुद्धजयन्तीको मुल समारोह हुनेछ। वैशाख १७ मा आयोजना हुने समारोहको उद्घाटन कार्यक्रममा राष्ट्रपति विद्यादेवी भण्डारी, प्रधानमन्त्री केपी शर्मा ओलीदेखि विभिन्न मुलुकका राष्ट्रप्रमुख तथा विशिष्ट पाहुनाको सहभागिता रहने लुम्बिनी विकास कोषका उपाध्यक्ष अवधेश त्रिपाठीले जानकारी दिए।
२०७२ सालमा प्रधानमन्त्री केपी शर्मा ओली प्रमुख अतिथि रहने भनिएको बुद्ध जयन्तीको कार्यक्रम स्थलमा अघिल्लो दिन बेलुका आएको हावाहुरीले क्षति पुर्याएको थियो। जसका कारण हिलाम्य भएको समारोहस्थललाई रातारात सरसफाई गरी कार्यक्रम सञ्चालन गरिएको थियो। सो कार्यक्रममा सम्बोधन गर्दै प्रधानमन्त्री ओलीले लुम्बिनीमा कार्यक्रम गर्न ५ हजार अट्ने सभाहल बनाउने घोषणा गरेका थिए।
जसअन्तर्गत मन्त्रिपरिषद् बैठकले यसपटकको बुद्धजयन्ती समारोह अस्थायी प्रकृतिको सभाहलमै भएपनि गर्ने सोचअनुसार नेपाली सेनलाई निर्माणको जिम्मा दिएको थियो। ५ हजार जना अटाउने हल बनाउने उद्घोष गरेका प्रधानमन्त्री ओलीले त्यो तत्काल सम्भव नदेखिएकाले ३ हजार जना अट्नसक्ने हल बनाउनका लागि मन्त्रीपरिषद्बाट निर्णय गराई नेपाली सेनालाई कामको जिम्मा दिएका थिए।
नेपाली सेनाले लुम्बिनी अन्तर्राष्ट्रिय अनुसन्धान केन्द्र र संग्रहालयबीचमा अस्थायी प्रकृतिको पक्की हल बनाएको छ। चैत ७ बाट बनाउन थालिएको हलको निर्माण कार्य एक महिनामै पूरा भएको कोषले जनाएको छ ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
