नयाँदिल्ली– भारतमा रेलले विद्यार्थी बोकेको एउटा बसलाई ठक्कर दिँदा कम्तीमा १३ बालबालिकाको मृत्यु भएको छ भने अन्य ७ जना गम्भीर घाइते भएका छन्।
बाटो पार गर्न लागेको बसलाई रेलले ठक्कर दिएर बिहीबार सो दुर्घटना भएको प्रहरी अधिकारीहरुले जनाएका छन्।उत्तर प्रदेशको राजधानी लखनउबाट ३ सय २३ किलोमिटर टाढा पर्ने कुशीनगर जिल्लाको बेहपुर्व भन्ने ठाँउमा दुर्घटना भएको हो।
‘आज बिहान तिव्र गतिमा आएको स्वचालित रेलले एउटा विद्यालयको बसलाई ठक्कर दिँदा बसमा चढेकामध्ये कम्तीमा १३ बालबालिकाको मृत्यु भएको छ। अरु ७ जना गम्भीर घाइते भएका छन्,’ वरिष्ठ प्रहरी अधिकृत आनन्दकुमारले भने।
उनले थपे,‘घाइते बालबालिकाहरुलाई तत्काल अस्पताल पुर्याइएको थियो। केहीको अवस्था अत्यन्तै गम्भीर रहेकाले मृत्यु हुनेको संख्या बढ्न सक्ने सम्भावना रहेको छ।’
दुर्घटनामा परेका बालबालिकाहरु अधिकांश १० वर्ष मुनिका रहेको अधिकारीहरुले जानकारी दिएका छन्। थावे–बढनी सडकखण्ड भएर चल्ने यात्रुबाहक सो रेलले स्थानीय डिभाइन मिसन स्कुलको बसलाई ठक्कर दिएको थियो। बसमा २२ जना विद्यार्थी सवार रहेको बताइएको छ।
उत्तर प्रदेशका मुख्यमन्त्री योगी आदित्यनाथले घटनाप्रति दुःख प्रकट गरेका छन्। घटनास्थलको अवलोकन गर्न पुगेका मुख्यमन्त्री आदित्यनाथविरुद्ध नाराबाजी हुन थालेपछि उनी घटनास्थल नजिकैबाट फर्किएका थिए।
त्यसपछि उनले अस्पताल पुगेर घाइतेहरुको अवस्थाको बारेमा जानकारी लिएका छन्। उनले दुर्घटनाको बारेमा तत्काल छानबिन गर्न गोरखपुरका प्रहरी कमिसनरलाई निर्देशन समेत दिएका छन्।
उत्तर प्रदेश सरकारले घटनामा परी मृत्यु भएका तथा घाइते बालबालिकाको परिवारलाई जनही २ २ लाख रुपैयाँ दिने घोषणा गरेको छ।
केहि समयअघि पनि उत्तर भारतीय राज्य हिमाञ्चल प्रदेशमा २७ जना बालबालिकासहित ३० जनाको विद्यालय बस दुर्घटनामै परेर निधन भएको थियो ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
