काठमाडौं- श्रीमती हत्याको आरोप लागेका भीमबहादुर लिम्बूलाई काठमाडौं जिल्ला अदालतले एक वर्ष कैद र १० हजार जरिवानाको फैसला सुनाएको छ। अदालतका न्यायाधीश श्रीकृष्ण भट्टराईको इजलासले लिम्बूलाई एक वर्ष कैद र १० हजार रुपैयाँ जरिवानाको फैसला सुनाएको हो।
गत जेठ १६ गते कपनमा श्रीमती सीता लिम्बूको हत्या आरोपमा भीबहादुर पक्राउ परेका थिए। रक्सी पिएको विषयमा पटकपटक विवाद हुने गरेको र रक्सीकै निहुँमा झगडा हुँदा सीताको ज्यान गएको थियो। त्यसपछि सीताकै बहिनीले भीमबहादुरले हत्या आरोप लगाउँदै कर्तव्य ज्यानको कसुरमा जाहेरी दिएकी थिइन्।
त्यसपछि महानगरीय प्रहरी वृत्त बौद्धले पक्राउ गरेर उनीमाथि अनुसन्धान गरेको थियो। सोही घटनामा जोडिएका भीमबहादुरको फैसला जिल्ला अदालत काठमाडौंले गरेको छ। जसमा सीताको मृत्यु भीमबहादुर कुटाइबाट नभएको‚ अत्यधिक रक्सी पिएकै कारण उनको कलेजोमा समस्या भएर जन्डिससमेत भएको र डाक्टरले रक्सी पिए ज्यान जान सक्ने बताएकाले रक्सीकै कारण ज्यान गएको देखिएको भन्दै अदालतले उनलाई १ वर्ष कैद र १० हजार जरिवानाको फैसला सुनाएको हो।
सीताको उपचार गरेका हेल्पिङ ह्यान्डस् अस्पतालका डा हेमबहादुर लिम्बूले अदालतमा बकपत्र गर्दा समेत मृतकको पटकपटक रक्सी सेवन गरी क्रोनिक लिभर डिजिज भएको, उक्त अवस्थामा रक्तस्राव हुँदा रगत रोक्न सक्ने क्षमतामा कमी हुने भएकाले त्यसले मृत्युसमेत हुने, कलेजोको रोग अन्तिम अवस्थाको भई जण्डिस देखा परिसकेको, मदिरा सेवन गरेमा जुनसुकै बेला पनि बिरामीको मृत्यु हुनसक्ने अवस्था भन्दै बयान दिएका थिए। त्यस्तै उनीहरुबीचको झगडा देखेका भीमबहमदुरका छोराछोरीले समेत बुवाले कुटेर नमारेको बयान दिएका थिए।
कसूरदारले पत्नीलाई मार्ने नियतले कुनै कार्य नगरेको, अत्यधिक रक्सी सेवनको कारण क्रोनिक लिभर डिजिज भई मृतकको कलेजोमा समस्या देखिएकोले अत्यन्त कमजोर स्वास्थ्य अवस्थामा भएको बेला तर्साउन सामान्य हप्कीदप्की गरेको, सीताले आफ्नो टाउको आफैं भित्तामा ठोक्काई सोही कारण मरेको पुष्टि भएको फैसलामा उल्लेख छ।
तर मृतकको शरीरमा देखिएका नीलडामहरू सहायक हुनसक्ने आशंका चिकित्सकले बकपत्रमा उल्लेख गरेकाले उनलाई १ वर्ष कैद र १० हजार जरिवाना तोकिएको फैसलामा उल्लेख गरिएको छ।
भीमबहादुरले कसुर गर्दाको अवस्था र आमाको मृत्युपश्चात् टुहुरा छोरारछोरीको अभिभावकत्व दिनुपर्ने, बालबच्चा पढाउने र कोठाभाडा र रासन, पानी जुटाउनुपर्ने देखिएकोले भीमबहादुरलाई कैदमा राख्नुको सट्टा त्यसबापत रकम लिई छोड्न सकिने पनि फैसलामा उल्लेख छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1787821304.jpg)
-1786602170.png)
-1786513116.png)
-1788425345.png)
