समाचार

अदालतमा रक्सी बहस : भीमबहादुरका नाबालक छोराछोरीको उद्धार

नारायण अधिकारी बिहीबार, साउन १, २०७७ १३:०४

काठमाडौं-रक्सीका विषयमा विवाद हुँदा आमाको ज्यान गएको र बाबु जेल चलान भएपछि बिचल्लीमा परेका छोराछोरीको उद्धार भएको छ।

रक्सीका कारण बुढानीलकण्ठ नगरपालिका-१२ कपनमा डेरा गरी बस्ने भीमबहादुर लिम्बू र उनकी श्रीमती सीताको विवाद भएको थियो। त्यसक्रममा सीताको ज्यान गएको आरोप लागेका भीमबहादुर जेल चलान भएका थिए। पारिवारिक अवस्था कमजोर भएको, आमाको मृत्यु र बाबु जेल चलान भएपछि बिचल्लीमा परेका उनीहरुका छोरीछोरीको उद्धार भएको हो।

भीमबहादुरको छोरीलाई पालनपोषण गर्ने र शिक्षा दिने भन्दै माइती नेपालले लगेको छ। भीमबहादुरका छोरा भने उनकै ठूलोबुवा रोमन गुरुङसँगै बसेका छन् ।
सीताको मृत्यु र भीमबहादुर जेल चलान भएपछि उनीहरुको छोराछोरीको बिचल्ली भएको भन्दै नेपाल लाइभले समाचार प्रकाशन गरेको थियो । उक्त समाचारपछि भीमबहादुरकी छोरीलाई माइती नेपालले लगेको हो भने छोरालाई ठूलोबुवाले लगेका हुन् ।