काठमाडौं- एउटा कर्तव्य ज्यान मुद्दाको वरिपरि जेलिएको छ, रक्सी। यो मुद्दाको गाँठो पत्ता लगाउन त्यही रक्सीमा पुग्नुपर्छ। रक्सीलाई पन्छाएर अघि बढे यो विषयको 'चुरो'मा पुग्न सहज छैन। मुद्दाको सुरु रक्सीबाटै हुन्छ र अन्तर्य पनि रक्सीसँगै गाँसिएको छ। यही मुद्दा किनारा लगाउनका लागि भीमबहादुरका नाबालक छोराछोरीदेखि न्यायाधीशसम्मले रक्सीबारे बहस गरिसके। तर मुद्दाको छिनोफानो हुन अझै केही समय कुर्नुपर्ने भएको छ।
रक्सी जेलिएको यो मुद्दाबाट भीमबहादुरका नाबालक छोराछोरीले समेत उम्कन पाएका छैनन्। रक्सी बहससँगै उनीहरुको दैनिकी पनि जोडिएको छ। उनीहरु बिचल्लीमा परेका छन्। भीमबहादुरका नाबालक छोराछोरीको समेत बिचल्ली पार्ने रक्सीबारेका अन्तरकुन्तर नेपाल लाइभले खोतल्ने प्रयास गरेको छ।
तेह्रथुमका भीमबहादुर लिम्बूले करिब २० वर्षअघि सीता लिम्बूसँग बिहे गरे। आर्थिक अवस्था नाजुक भएका भीमबहादुर ‘उठ जोगी, फट्कार छाला, जहाँ जाला त्यहीँ खाला’ भन्दै काठमाडौंसम्म आइपुगे। ज्यामी काम गरेकै भरमा एक छोरा, एक छोरी र श्रीमतीसहितको परिवार पाल्दै थिए।
000
काठमाडौं बुढानीलकण्ठ नगरपालिका-१२ कपनमा कोठा भाडा लिएर बस्ने भीमबहादुर जेठ १६ गते राती ८ बजेतिर घर पुगे। ‘म कोठामा पुग्दा श्रीमती सीता रक्सी पिएर टिल्ल थिइन्। छोराछोरीलाई अश्लील गाली गर्दै कुटपिटसमेत गरिछन्। मलाई समेत अश्लील गाली गरिन्,’ असारको पहिलो साता काठमाडौं जिल्ला अदालतका न्यायाधीश श्रीकृष्ण भट्टराईको इजलासमा श्रीमतीको रक्सी नसा बताउँदै थिए भीमबहादुर।
नाबालक छोराछोरीहरुले बयानमा भनेका छन्, ‘आमा आफैंले भित्ता र भुईंमा टाउको ठोक्काएकाले चोटपटक लागेको थियो।’
भीमबहादुरले श्रीमती सीताको रक्सी अम्मलीबारे महानगरीय प्रहरी बौद्धसँग भनेका छन्, ‘उनी रक्सी पिएर सडकमा नै लड्थिन्। घरमा काम भने फिटिक्कै नगर्ने। रक्सीकै कारण ५/७ महिनादेखि पेटसमेत सुनिन थालेका थियो।’
अत्यधिक रक्सी पिएर पेट गडबढ हुने, हातखुट्टा सुनिने र जन्डिस पनि देखा परेपछि केही समयअघि भीमबहादुर सीतालाई उपचारका लागि अस्पताल पुर्याएका थिए। त्यसबेला ६ लाख रुपैयाँ ऋण काडेर भीमबहादुरले श्रीमतीको उपचार गरेका थिए। ‘अमिलो, पिरो, जाँडरक्सी खानु जोखिम हुन्छ। यी चिज चटक्कै छोड्नुहोला,’ डाक्टरले त्यसबेला भनेका कुरा न्यायाधीशसमक्ष सुनाए भीमबहादुरले।
पुनः १६ गतेकै घटनातर्फ फर्किऔं। साँझमा आफूलाई समेत गाली गर्न थालेपछि भीमबहादुरले श्रीमतीलाई झापड हानेको बयान दिएका छन्। ‘मैले तर्साउने हिसाबले गाला, स्तन र योनी नजिक एकपटक लात र हातले हिर्काएको हो,’ १६ गते राती भएको घटनाको बयान दिँदै उनले सुनाए। भोलिपल्ट बिहान सास फेर्न गाह्रो भएपछि अस्पताल पुर्याउँदा डाक्टरले सीतालाई मृत घोषित गरे।
अत्यधिक रक्सी पिएकै कारण गाह्रो भएको, रक्सीकै कारण झगडा भएको र भोलिपल्ट अस्पातल पुर्याउँदा मृत घोषित भएकी सीताकी बहिनी सरस्वती खापुङले भिनाजु अर्थात् भीमबहादुरविरुद्ध कर्तव्य ज्यानको कसुरमा जाहेरी दिइन्।
तर अदालतसमक्ष रक्सीकै कारण श्रीमतीको कलेजोले समेत काम गर्न छाडेको, रक्सी नखान डाक्टरले सीतालाई सुझाउँदासमेत रक्सी पिएकै कारण उनको ज्यान गएको दाबी भीमबहादुरको थियो। तर्साउने हिसाबले सामान्य कुटपिट गरेपछि भीमबहादुर अर्को कोठामा सुत्न गएका थिए। त्यसपछि के भयो उनलाई केही थाहा भएन। सीता रहेकै कोठामा उनीहरूका छोराछोरी पनि थिए। उनीहरुसँग समेत बयान लिइएको छ।
‘बुवाले आमालाई मार्ने नियतले कुटपिट गरेको होइन। आमालाई डाक्टरले 'जाँडरक्सी खाँदा गाह्रो हुन्छ' भनेका थिए। तर आमाले खान नछाडेकाले बुुवाले सम्झाएँदा हात र लातले एकएक पटक हिर्काउनु भएको हो,’ उनीहरुले बयानमा भनेका छन्, ‘आमा आफैंले भित्ता र भुईंमा टाउको ठोक्काएकाले चोटपटक लागेको थियो।’
000
सीताको लासजाँच मुचुल्कामा अनुहार सुन्निएको, आँखाको दाँयाबाँया भाग, ओठ र चिउँडोमा समेत निलो/कालो दाग देखिएको, नाकदेखि ओठाको भागमा रगतजस्तो पदार्थ लागी सुकेको उल्लेख छ। यी चोटहरु भने उनी आफैंले भित्ता र भुईंमा ठोक्काएकाले भएको नाबालक छोराछोरीले बयान दिएका छन्।
पोस्टमार्टम रिपोर्टमा मृत्युको कारणबारे ‘ब्लन्ट फोर्स इन्ज्युरी टु हेड इन द प्रिजेन्स अफ क्रोनिक लिभर’ भन्ने व्यहोरा उल्लेख छ। पोस्टमार्टम रिपोर्टअनुसार मृतकको टाउकोमा चोट लागेको र कलेजोमा लामो समयदेखिको खराबी वा रोग रहेको देखिन्छ।
आमाको मृत्यु भएको र बाबुसमेत कारागार चलान भएपछि दुई नाबालकको भविष्यसमेत अन्यौल भएको छ।
स्वास फेर्न गाह्रो भएपछि आफ्नी साली सरस्वतीलाई समेत फोन गरेर जानकारी गराएरै अस्पताल लगिएकाले पनि यसमा कर्तव्य ज्यानको कसुर लगाउनु ठिक नरहेको भीमबहादुरले अदालतसमक्ष बयान दिएका छन्। तीन वर्षभन्दा बढी कैद सजाय भएको फौजदारी मुद्दामा पुर्पक्षमा राख्नुपर्ने र प्रतिवादी कसुरदार होइनन् भन्ने पर्याप्त प्रमाण नपुगेको भन्दै असार १२ गते न्यायाधीश भट्टराईको इजलासले पुपर्क्षका लागि जेल पठाउने आदेश भयो।
रक्सीकै कारण कुटपिट भएर होस् वा रक्सी पिएकै कारण होस् आमाको निधन भयो। सोही केसमा बाबुसमेत जेल गएपछि उनीहरुका दुई नाबालक छोराछोरीको भने बिचल्ली भएको छ।
भीमबहादुरले नै ज्याला मजदूरी गरेर ल्याएको पैसाबाट उनीहरुको जीविकोपार्जन चल्दै आएको थियो। भीमबहादुरकै कमाइबाट छोराछोरीको पढ्दै आएका थिए। उनै भीमबहादुर जेल गएपछि उनीहरुको बिचल्ली भएको हो।
न्यायाधीश भट्टराईको इजलासले कुनै संघ संस्था वा नेपाल सरकारको सम्बन्धित निकायबाट उनीहरुको उचित व्यवस्थापन हुनुपर्ने देखिएको उल्लेख गर्दै नाबालकहरूको व्यवस्थापन गर्न भनेर सरकारी वकिल कार्यालय वा बौद्ध वृत्तलाई आदेश दिएको छ। तर उनीहरुबारे सरकारी निकायले हालसम्म पनि कुनै पहल गरेको छैन। आमाको मृत्यु भएको र बाबुसमेत कारागार चलान भएपछि दुई नाबालकको भविष्यसमेत अन्यौल भएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
-1789631269.jpg)
