काठमाडौं- सर्वोच्च अदालतले राजधानीको बुढानीलकण्ठमा मदिरा सेवन गरेर गाडी चलाई ठक्कर दिएर पैदल यात्रुको ज्यान लिने कार चालक पृथ्वी मल्ललाई ५ लाख धरौटीमा छोडेको छ।
सर्वोच्चले जिल्ला अदालत र उच्च अदालत पाटनले थुनामा पठाएका मल्ललाई धरौटीमात्र माग गरेको हो। सर्वोच्चले धरौटी माग गरेको रकम बुझाएर मल्ल छुटेका छन्।
उक्त दुर्घटना भएको गाडीमा मोडेल परमिता राणा समेत रहेकी थिइन्। न्यायाधीश सपना प्रधानमल्ल र मनोजकुमार शर्माको इजलाशले १० वर्षसम्म कैद सजाय माग भएका मल्ललाई धरौटीमा रिहा गर्ने आदेश गरेको हो।
काठमाडौं जिल्ला अदालतले २०७६ पुस २३ गते पुर्पक्षका लागि थुनामा पठाउने आदेश गरेको थियो। जिल्लाले थुनामा पठाएपछि मल्ल उच्च अदालत पाटन पुगेका थिए। उच्चले पनि जिल्लाकै आदेश सदर गरेपछि उनीहरु सर्वोच्च पुगेका थिए। २०७६ मंसिर २८ गते बिहान मन्दिर दर्शन गरेर फर्किरहेकी गोर्खाकी लिला देवकोटालाई बुढानिलकण्ठमा मल्लले चलाएको कारले ठक्कर दिएको थियो। देवकोटालाई तत्कालै अस्पताल पुर्याइए पनि उनको मृत्यु भएको थियो।
रातभर ठमेलमा मदिरा सेवन गरेका २१ वर्षीय मल्ल बिहानीपख शिवपुरी पुगेर फर्कनेक्रममा उनी आफैंले चलाएको कारले अनियन्त्रित भई पैदल यात्रु देवकोटालाई ठक्कर दिएको थियो।
यसरी भएको थियो घटना
बुढानीलकण्ठ प्रहरी कार्यालयदेखि विष्णुमति खोलातर्फ आउने सडकमा यो ‘हिट एन्ड रन’ को घटना भएको थियो। घटनास्थलभन्दा उत्तरमा बुढानीलकण्ठ स्कुल रहेको छ। दक्षिणमा जस्ताले छाएको मोटरसाइकल ग्यारेज भएको टहरो हुँदै बिजुलीको कुच्चिएको पोलमा मल्लले गाडीले हिर्काएका थिए। सोही सडक पेटीमा मन्दिरबाट फर्किएकी महिलालाई उनले प्रहार गरी भागेका थिए।
मन्दिर गएर फर्किएकी लिला देवकोटा मन्दिरमा पूजा गरेर घर फर्कँदै गर्दा कारको ठक्करले घरसम्म पुग्न पाइनन्। फुटपाथमा हिँड्दै गरेका बेला बा १४ च ६१२३ नम्बरको कारले ठक्कर दिएपछि गोरखा घर भएकी ४० वर्षीया देवकोटा गम्भीर घाइते भएकी थिइन्। उपचारका लागि न्यूरो अस्पताल बाँसबारी पुर्याउँदा डाक्टरले मृत घोषणा गरेका थिए।
उक्त भयानक दुर्घटनाका प्रतिवादी कार चालक पृथ्वी मल्ललाई जिल्ला अदालत काठमाडौंले पुस २३ गते पुर्पक्षका लागि कारागार चलान गरेको थियो।
सवारी तथा यातायात व्यवस्था ऐन, २०४९ को दफा १६१ बमोजिमको कसुरमा उनलाई पुर्पक्षका लागि जेल पठाइएको हो। उक्त कसुरमा १० वर्षसम्मको कैद सजाय माग गर्दै मल्लविरुद्ध मुद्दा दर्ता भएको थियो।
मल्लले बयानमा भनेका थिए- डेनिअल्स रक्सीले झ्याप थिएँ, दुर्घटना भएपछि थाहा पाएँ
अध्ययनको सिलसिलामा पृथ्वी मल्ल विगत १ वर्षदेखि अमेरिकामा बस्दै आएका थिए। उनी गत मंसिर २३ गते बिदामा काठमाडौं फर्किएका थिए। त्यसको केही दिन साथीभाइ भेटघाटमा व्यस्त रहेका मल्ल २७ गते साँझ साढे ५ बजे बा १४ च ६१२३ नम्बरको कार लिएर घुम्न निस्कन्छन्।
त्यसपछि नक्सालस्थित नारायणचौरको जिम हल पुग्छन् मल्ल। त्यहाँ उनले करिब २ घन्टा बिताउँछन्। ‘बेलुका साढे ७ बजेतिर मेरो साथी करिश मास्केले फोन गरेर बोलाएपछि म उसलाई लिन छाउनी गएँ,’ बयानमा मल्लले भनेका छन्।
त्यसपछि उनीहरु दुई जना बालुवाटारस्थित पलिन्ज गार्डेन रेस्टुरेन्ट पुग्छन्। खाना खान्छन्। राती करिब ९ बजे उनीहरू त्यहाँबाट ठमेल हानिन्छन्। ठमेलस्थित कोशिस रेस्टुरेन्टमा साथी भएकाले भेट्न गएको उनको बयान छ। ‘पृथ्वीले तीनवटा बियर खायो। मैले पनि हल्का पिएँ,’ करिशले बयानमा भनेका छन्।
तर पृथ्वी भने त्यहाँ केही पनि खानपिन नभएको दाबी गर्छन्। त्यहाँ लामै गफ हुन्छ। करिशकै एक साथीलाई ट्याक्सीमार्फत् उनीहरूले थापाथली पुर्याउँछन्। त्यसपछि फर्केर उनीहरु ठमेलको एलओडी क्लब पुग्छन्। त्यसबेला रातको साढे १ बजिसकेको हुन्छ।
एलओडीमा मदिरासँगै उनीहरू एकछिन झुम्मिन्छन्। त्यसपछि बिहान साढे ४ बजे ठमेलकै सेनेठ भन्ने अर्को क्लबमा पुग्छन्। जहाँ करिशका दुई जना साथीहरु हुन्छन्, मोडेल परमिता राणा र मनिषा।
उक्त क्लबबाट नायिका परमिता, मनिषा र करिशलाई कारमा लिएर पृथ्वी बाहिरिन्छन्। ‘ग्रिनभ्याली रिसोर्टमा खाना खाने भनेर हामी निस्केका थियौं,’ करिशले बयानमा भनेका छन्।
त्यसबेला अधिकांश पसल बन्द थिए। गोल्फुटारमा रहेको बिगमार्ट भने खुल्लै थियो। उनीहरू चारै जना त्यहीँ छिरे। चिप्स, चक्लेट र अन्य जंक फुड किने। जंक फुड खाँदै उनीहरुले ग्रिनभ्याली रिसोर्ट पुगे। रिसोर्टमा पुगेर खाना अर्डर गर्दा बिहान करिब ८ बजेको थियो।
प्याक गरेको खाना लिएर उनीहरू पुनः सोही बाटो हुँदै घर फर्किए। ‘म र दुई केटी साथी पछाडिको सिटमा बसेर प्याक गरेको खाना खाँदै थियौं। पृथ्वीले गाडी चलाएको थियो। बुढानीलकण्ठ स्कुल अगाडि आएपछि कार अनियन्त्रित भई सडकपेटीमा ठोक्किन पुगेछ,’ करिशले भने, ‘सिटबाट झेरेर हेर्दा एउटा मोटरसाइकल कच्याककुचुक भएको थियो। एक महिला रक्ताम्य भएर भुईंमा लडेकी थिइन्।
उता चालक पृथ्वीले पनि लापरबाहीका कारण दुर्घटना हुँदा देवकोटाको मृत्यु भएको स्वीकार गरेका छन्। पृथ्वीले बयानमा भनेका छन्, ‘रातभरको अनिँदो र डेनिअल्स रक्सीले म झ्याप थिएँ। बुढानीलकण्ठको पुल कटेपछि कार अनियन्त्रित भई विपरीत दिशातर्फ हिँड्दै गरेका पैदलयात्रीलाई ठक्कर दिएपछि झ्ल्याँस्स ब्युझिएँ।’
चालक पृथ्वी यतिसम्म झ्याप थिए कि उनको लाइसेन्स मापसे गरेको भनेर ट्राफिकले लगेको थियो। ट्राफिकले काटेको चिटसमेत उनले हराएको कुरा प्रहरी समक्ष बताएका छन्। करिब १२ घन्टाभन्दा अघिदेखि गरेको लगातारको रक्सी सेवन, अनिँदो र थकान हुँदाहुँदै पनि लापरबाही गर्दै कार चलाएकाले दुर्घटना हुन पुगेको प्रहरीको निष्कर्ष छ। उनको स्वास्थ्य परीक्षणमा समेत अत्यधिक मदिरा सेवन गरेको पाइएको थियो।
शंकास्पद छ आदेश
सर्वाेच्चले गरेको धरौटीमा रिहा गर्ने आदेश शंकास्पद भएको सरकारी अधिकारीको टिप्पणी छ। महान्यायाधीवक्ता कार्यालयका एक अधिकृतले विदेशमा भाग्न सक्ने सम्भावना भएको व्यक्ति रहेको र ३ वर्षदेखि १० वर्षसम्म कैद माग भएको मुद्दाका प्रतिवादीलाई सहजै धरौटीमा छाड्नु शंकास्पद भएको बताए।
जिल्ला र उच्चले पुर्पक्षका लागि थुनामा कारागार चलान भएको र अभियुक्तले रातभर रक्सी खाएको, गलत दिशामा ठक्कर दिएको, नेपाली सवारी अनुमतिपत्र समेत नभएको र बिहान भएको भयानक दुर्घटनामा सहज रुपमा छोड्न नमिल्ने ती अधिकारीले बताए। मल्ल अमेरिका बस्ने मानिस भएको र भोलि भाग्ने सक्ने अवस्था भएकाले दुई तहका अदालतले धरौटी नछोडेको र यदि उनी विदेश गएमा जिम्मा कसले लिने भन्दै उनले आदेशमा धेरै शंका रहेको बताए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
