फाइल तस्बिर
काठमाडौं– लगातारको वर्षाका कारण पहिरो गएपछि नारायणगढ–मुग्लिन सडकखण्ड र पृथ्वी राजमार्गमा सवारीसाधनको आवागमन बन्द गरिएको छ।
विभिन्न जिल्लामा बाढी तथा पहिरोको जोखिम बढेपछि सडकमा आवागमनसम्बन्धी विभिन्न प्रतिबन्ध र समयतालिका लागू गरिएको प्रहरीले जनाएको छ।
चितवनमा बिहीबारदेखि निरन्तर वर्षा भइरहेकाले नारायणगढ–मुग्लिन सडकखण्डका विभिन्न स्थानमा लगातार पहिरो गइरहेको प्रहरीले जनाएको छ। अर्को सूचना जारी नभएसम्म उक्त सडकखण्डमा सबै सवारीसाधनको आवागमन बन्द गरिएको छ।
धादिङमा पनि निरन्तर वर्षाका कारण पृथ्वी राजमार्गका विभिन्न स्थानमा पहिरो गइरहेको भन्दै अर्को सूचना जारी नभएसम्म सबै सवारीसाधनको आवागमन बन्द गरिएको छ।
मकवानपुरमा अविरल तथा भारी वर्षाका कारण पृथ्वी राजमार्ग र कान्ति राजमार्ग अवरुद्ध भएपछि सडकमा सवारीसाधनको चाप बढेको छ। त्यसलाई व्यवस्थापन गर्न मालवाहक तथा यात्रुवाहक सवारीसाधनलाई त्रिभुवन राजपथ हुँदै समयतालिकाअनुसार सञ्चालन गराउने व्यवस्था गरिएको प्रहरीले जनाएको छ।
हेटौँडाबाट काठमाडौं जाने सवारीसाधनले चौकी टोलबाट त्रिभुवन राजपथ प्रयोग गर्न सक्ने समय शुक्रबार बिहान १० बजेदेखि दिउँसो २ बजेसम्म तोकिएको छ। असोज १० गते शनिबार बिहान ४ बजेदेखि दिउँसो ८ बजेसम्म तथा राति १० बजेदेखि असोज ११ गते बिहान २ बजेसम्म मात्र सवारी सञ्चालन गर्न दिइनेछ।
काठमाडौंबाट हेटौँडातर्फ आउने सवारीसाधनका लागि सिमभञ्ज्याङ चौकीबाट असोज ९ गते शुक्रबार साँझ ७ बजेदेखि राति ११ बजेसम्म, शनिबार दिउँसो १ बजेदेखि साँझ ५ बजेसम्म र आइतबार बिहान ७ बजेदेखि ११ बजेसम्म सवारी सञ्चालन गर्न दिइनेछ।
मालवाहक सवारीसाधनतर्फ अर्को व्यवस्था नभएसम्म इन्धन तथा एलपी ग्यास बोकेका बाहेक १० चक्काभन्दा लामो र १५ टनभन्दा बढी भार भएका मालवाहक सवारीसाधनलाई उक्त सडकखण्डमा पूर्ण रूपमा निषेध गरिएको छ। यात्रुवाहक सवारीसाधनका हकमा ११ मिटर लम्बाइसम्मका सवारीसाधनले मात्र त्रिभुवन राजपथ प्रयोग गर्न पाउने व्यवस्था गरिएको छ।
सिन्धुलीमा सम्भावित बाढी तथा पहिरोको जोखिमलाई मध्यनजर गर्दै बिहीबारदेखि शनिबार बेलुका ५ बजेदेखि बिहान ५ बजेसम्म बीपी राजमार्गमा आवतजावतमा पूर्ण रोक लगाइएको छ।
दोलखामा पनि बिहीबारदेखि शनिबारसम्म बेलुका ८ बजेदेखि बिहान ५ बजेसम्म जिल्लाभरका सबै सडकखण्डमा आवतजावतमा पूर्ण रोक लगाइएको छ।
काभ्रेमा बिहीबारदेखि शनिबारसम्म बेलुका ५ बजेदेखि बिहान ५ बजेसम्म बीपी राजमार्ग र अरनिको राजमार्ग हुँदै सिन्धुपाल्चोकतर्फ जाने सम्पूर्ण सवारीसाधनको आवतजावतमा पूर्ण रोक लगाइएको छ।
सिन्धुपाल्चोकमा सम्भावित बाढी तथा पहिरोको जोखिमलाई मध्यनजर गर्दै बेलुका ८ बजेदेखि बिहान ५ बजेसम्म पृथ्वी लोकमार्गमा आवतजावतमा पूर्ण रोक लगाइएको प्रहरीले जनाएको छ।
यसैबीच, काभ्रेको बीपी राजमार्ग पूर्ण रूपमा अवरुद्ध भएको छ। शुक्रबार बिहान करिब ४:३० बजे रोशी गाउँपालिका–७ चारसयवेशी र रोशी गाउँपालिका–८ गिम्दीवेशीस्थित बीपी राजमार्ग सडकखण्डमा सडक माथिबाट पहिरो खसेपछि दुवैतर्फको बाटो अवरुद्ध भएको प्रहरीले जनाएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
