काठमाडौं– इजरायलमा केयर गिभरको रोजगारी दिलाइदिने भन्दै रकम उठाएको आरोपमा पक्राउ परेकी बालिका सिवाकोटीले कांग्रेस नेता भरत चौलागाईंलाई डेढ करोड रुपैयाँ नगद दिएको बयान प्रहरीलाई दिएकी छन्।
सीआईबीका अनुसार १५६ जनालाई इजरायल पठाइदिने भन्दै चौलागाईं र सिवाकोटीले करिब २ करोड ५० लाख रुपैयाँ उठाएको प्रारम्भिक अनुसन्धानबाट खुलेको छ। सिवाकोटीले आफूले उठाएको रकममध्ये डेढ करोड रुपैयाँ चौलागाईंलाई गौशालामा भेटेर बुझाएको बयान दिएकी हुन्।
पीडितलाई प्रधानमन्त्रीका प्रमुख सल्लाहकार कुमार बेनको नाम प्रयोग गर्दै मन्त्रिपरिषद्बाट निर्णय गराएर इजरायल पठाउने आश्वासन दिइएको प्रहरी अनुसन्धानमा उल्लेख छ।
काम नभएपछि पीडितहरूले सिवाकोटीलाई नियन्त्रणमा लिएर रिसोर्टमा राखेको र त्यसपछि उनले चौलागाईंलाई फोन गरेको अनुसन्धानमा खुलेको छ। उक्त फोन संवादमा चौलागाईंले आफूले कुमार बेनसँग कुरा गरेको र काम चाँडै हुने बताएका थिए।
तर चौलागाईंले आफूले रकम लिएको आरोप अस्वीकार गरेका छन्। उनले सिवाकोटीसँग जग्गासम्बन्धी कारोबारका क्रममा ऋणबापत केही रकम लिएको दाबी गरेका छन्।
चौलागाईं र सिवाकोटीविरुद्ध सीआईबीले अनुसन्धान जारी राखेको छ। दुवैलाई दोस्रोपटक काठमाडौं जिल्ला अदालतबाट सात दिनको म्याद लिएर अनुसन्धान भइरहेको सीआईबीले जनाएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
-1789631269.jpg)
