एन्फा अध्यक्ष कर्मा छिरिङ शेर्पा
काठमाडौं- अखिल नेपाल फुटबल संघ (एन्फा) को आपतकालिन कार्यसमितिको बैठक आज बस्दै छ। गुट उपगुट बनेको एन्फा पदीय स्वार्थमै केन्द्रित भएको पछिल्लो गतिविधिले प्रष्ट हुँदै आएको छ।
त्यही विवादलाई साम्य पार्दै भागबन्डा गर्न बैठक बस्न लागेको आरोप पनि छ। सोमबारलाई तय भएको बैठक बरिष्ठ उपाध्यक्ष पंकजविक्रम नेम्वाङ उपस्थित नहुने भएपछि मंगलबारको लागि बैठक तय भएको हो।
बरिष्ठ उपाध्यक्ष नेम्वाङले आफ्नो स्वास्थ्यको कारण उपस्थित हुन नसक्ने भनेपछि बठैक रोकिएको थियो। बैठकमा मुख्यतय तीन एजेण्डामा छलफल हुनेछ। मानर्थ अध्यक्ष, भक्तपुर जिल्ला फुटबल संघ, कोभिड-१९ को राहात विषय रहेको एन्फा प्रवक्ता किरण राईले जानकारी दिएका छन्। ‘मानार्थ अध्यक्ष, भक्तपुर जिल्ला फुटबल संघ, कोभिड-१९ को राहात र विविध पक्षमा छलफल हुनेछ’ उनले भने।
केहीदिन अघि एन्फा अध्यक्ष कर्माछिरिङ शेर्पा विवादमा फसे। तराईका चार जिल्लामा ग्रास रुटका कार्यक्रमका सम्बन्धमा दिएको अभिब्यक्ति विवादयुक्त हुँदा एन्फाले प्रेस विज्ञप्ति नै निकाल्नु पर्यो। एन्फा अध्यक्षले ‘तराईमा राष्ट्रियताको भावना कम हुने’ भन्ने आशय निस्कने गरी अन्तर्वार्ता दिएका थिए।
एन्फा एकपछि अर्को विवादमा मुछिइरहँदा गुट-उपगुट पनि त्यत्तिकै जन्मिए। अहिले एन्फामा आफ्ना स्वार्थ पूरा गर्नकै लागि विभिन्न बखेडा गर्ने जमात बढेको छ। दुई वर्षअघि चुनाव जितेर आउँदा कर्माछिरिङ शेर्पाको टिममाथि ठूलो विश्वास र भरोसा थियो। खेलाडीले त्यस्तै अपेक्षा गरे। तर यो दुई वर्ष बढिको समयसम्म एन्फाले आलोचना बाहेक तारिफयोग्य काम गर्न सकेन।
हुन त सुरुवातदेखि नै चार जिल्ला फुटबल संघलाई समेटेर जान नसकेको एन्फा झनै पेचिलो बन्दै गएको छ। ‘चेन्ज एन्फा’ नारा घन्काउँदै एन्फा छिरेका पदाधिकारी नै बदमासी भएको काठमाडौं, ललितपुर, भक्तपुर र धादिङ जिल्ला फुटबल संघको आरोप निरन्तर लाग्दै आएको छ।
पदाधिकारीबीचको मनमुटाब र गुटले सिर्जना गरेको विवाद बेलाबखत सामाजिक सञ्चालमा पनि छ्यापछ्याप्ती देखिन्छ। यसले गर्दा अहिलेको एन्फा टिम लामो घोडाको रेस होइन भन्ने कुरा प्रष्ट हुन्छ।
एन्फाको कच्चा निर्णय
एक-दुई पटक मात्रै हैन पटक पटक आलोचित हुँदै आएको छ। यसको एउटै कारण हो, अपरिपक्क र कच्चा निर्णय।
एन्फा अध्यक्ष पदका लागि दोस्रो पटक चुनाव लड्दै गरेका कर्माछिरिङ शेर्पा चुनावी मैदानमा सारथी बनेर सघाएका टासी घलेलाई मानर्थ अध्यक्षको पद दिने सर्त थियो। कर्माछिरिङ प्यानलले यस्तै र विभिन्न पद दिने शर्तमा ‘गेम चेन्जर’ व्यक्तिहरुलाई चुनावी मैदानमा आफ्नो पक्षमा पार्यो।
चुनावपछि एन्फा विभिन्न भागबन्डाहरुमा लाग्यो। विवाद पनि सुरु हुन थाल्यो। त्यही चुनावी मैदानबाटै व्यक्तिगत स्वार्थहरुको जन्म भयो। त्यसैको परकाष्टा हो अहिलेको एन्फा किचलो। यसअघि मानार्थ अध्यक्षबाट पदच्युद भएका टासी घलेलाई पुनर्वहाली गर्ने विषय यो बैठकको मुख्य प्राथमिकता छ।
एन्फा मानर्थ अध्यक्ष भएर पनि एन्फाकै विरुद्दमा लागेको भन्दै एन्फाले टासी घलेलाई माघ ३ गते हटाएको थियो। तर टासी घले आफ्नो अपमान भएको भन्दै पाटन उच्च अदालतदेखि राष्ट्रिय खेलुकद परिषद् (राखेप) सम्म पुगेका थिए।
एन्फा आफैले गरेको काममाथि आलोचित हुँदा विस्तारै विश्वास पनि गुम्दै गएको छ। टासी घलेलाई मानर्थ अध्यक्षबाट निकालेको एन्फा फेरि उनलाई पुनर्वहाली गर्न बैठक बस्दै छ। यो कुराले पनि के प्रष्ट पार्छ भने एन्फा स्वयम परिपक्क छैन। एन्फाविरुद्ध रहेका चार जिल्ला फुटबल संघमध्ये भक्तपुर जिल्ला फुटबल संघलाई कारबाही गर्नका लागि पनि बैठक बोलाइएको खुल्न आएको छ।
एन्फा पर्ख र हेर नीतिमा?
संसारभर फैलिएको कोरोना भाइरस (कोभिड-१९) ले एन्फालाई गजबकै आनन्द ल्याइदिएको छ। ढुक्कले बस, के चिन्ता। नेपालभन्दा विकराल अवस्था भएका देशले खेलकुद गतिविधि सञ्चालन गरिसके। खेल नभएका देशमा पनि अभ्यासका कामहरु भइरहेका छन्।
तर एन्फा भने पर्खेर हेरको अवस्थामा छ। रोकिएको सहिद स्मारक बी डिभिजन लिग फुटबल, राष्ट्रिय टिमको तयारी र अन्य गतिविधि कसरी र कहिलेबाट गर्ने ठोस निर्णयमा एन्फा पुगेको छैन। सरकारको निर्णय हेरेर बिना पहल बसिरहेको छ।
अन्य देशले बन्द रंगशालामा प्रतियोगिता गराउनेदेखि खेलाडीको स्वास्थ्य परिक्षणपछि अभ्यास गराउन थालिसक्दा पनि एन्फाले नसोच्नु पछि भुल हुनेछ। एन्फा भने आफ्नै आन्तरिक विवादमा फसेको छ। एन्फाका पदाधिकारीले पनि आफ्नो दुनो सोझ्याउने बाहेक अन्य पक्षमा ध्यान पुर्याउन सकेका छैनन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
