काठमाडौं- ‘तराईतिर राष्ट्रियताको भावना कम भएको’ भन्ने विवादास्पद अभिव्यक्ति दिएका अखिल नेपाल फुटबल संघ एन्फाका अध्यक्ष कर्माछिरिङ शेर्पाले आफ्नो मनसाय त्यस्तो नरहेको भन्दै माफी मागेका छन्।
‘तराईका बच्चाहरुलाई फुटबलप्रति आकर्षित गर्नका लागि र राष्ट्रियता सिकाउनका लागि’ सप्तरी, सिराह, धनुषा र महोत्तरीमा आर्मीसँग सहकार्य गरेर ग्रासरुट फुटबलको कार्यक्रम सुरु गरेको अध्यक्ष शेर्पाको अभिव्यक्ति थियो।
आफ्नो मनसाय फुटबलको विकासभन्दा बढी केही नभएको भन्दै उनले अहिले माफी मागेका हुन्। ‘मैले दिएको अन्तर्वार्तामा खेल भावनाबाहेक कुनै मनसाय राखेर वा कुनै क्षेत्र, प्रदेश र भुगोललाई होच्याउने वा नकरात्मक सन्देश प्रवाह गर्न खोजेको छैन। विशुद्ध हिसाबले नेपालमा फुटबल विकास गर्ने उद्देश्य मात्र रहेको छ’ उनले विज्ञप्तीमार्फत भनेका छन्।
‘मैले दिएको अभिव्यक्ति कुनै सम्प्रदाय, वर्ग, जाति, लिङ्ग, भाषाभाषी, प्रदेश र भुगोलप्रति लक्षित नगरेको र नभएको स्पष्ट पार्न चाहन्छु। मेरो भनाइलाई तोडमोड गरी फुटबलप्रति वितृष्णा उत्पन्न गराउने मनसायबाट प्रेरित तत्वले एन्फा र यसको नेतृत्वको छवि धमिल्याउने र हुँदै आएको फुटबलको विकासको गतिमा अवरोध पुर्याउने योजना मुताबिक आएको बुझ्न अनुरोध गर्दछु’ उनले भनेका छन्।
राष्ट्रियताका विषयमा लामो कुरा गर्दैै उनले अघि भनेका छन्– ‘उक्त अन्तर्वार्तामा व्यक्त भावनाभन्दा पनि शाब्दिक अर्थमा मात्रै धेरै ध्यान दिइएको छ। तर मेरो अप्रिपाय तथा भावना कसैको राष्ट्रियतामा प्रश्न गर्ने थिएन र कदापि होइन पनि। यद्यपि अन्तर्वार्ताको क्रममा व्यक्त शब्दावलीबाट नेपाली दाजुभाइ दिदीबहिनी एवं त्यस क्षेत्रका नेपालीमा कुनै चोट वा ठेस पुग्न गएमा म क्षमा याचना गर्दछु।’
अध्यक्ष शेर्पाको अभिव्यक्तिको सामाजिक सञ्जालदेखि संसदसम्म विरोध भइरहेको थियो। बुधबार मधेशी आयोगले राष्ट्रियताको विषयमा शेर्पाले दिएको विवादास्पद अभिव्यक्तिको विषयमा छानविन प्रक्रियासमेत अघि बढाएको बताएको थियो।
यस्तै उनको अभिव्यक्तिको विषयमा संसदमा समेत कुरा उठेको थियो। अध्यक्ष शेर्पाले नेपाली समाजमा विभेदको विजारोपण गरेको भन्दै समाजवादी पार्टीका सांसद विमलप्रसाद श्रीवास्तवले संसदमा कारबाहीको माग गरेका थिए।
अमेरिकाबाट चल्ने अनलाइन पोर्टल दुर्बिन नेपालको अन्तर्वार्तामा शेर्पाको विवादित अभिव्यक्ति यस्तो थियो–
सप्तरी, सिराह, धनुषा र महोत्तरीमा हामीले नेपाल आर्मीसँग सहकार्य गरेर ग्रासरुटको कार्यक्रम सुरु गर्यौं। हामीले दुई कारणले कार्यक्रम सुरु गर्यौं। तराईका बच्चाहरुलाई फुटबलप्रति आकर्षित गर्नका लागि अर्को राष्ट्रियता सिकाउनका लागि हामीले सुरु गर्यौं।किनभन्दा तराई तिर जादा खेरी राष्ट्रियताको फिलिङ अलि कम छ। नेपाल आर्मीसँग ग्रासरुटको प्रशिक्षणको कार्यक्रम सिक्न आउँदा आर्मीको ब्यारेकमा आउँदा कमसेकम राष्ट्रिय गीत गाउने, नेपालको विषयमा चर्चा हुने, खेलाडी उत्पादन हुने हिसाबले हामीले काम गरेका छौं। त्यसले गर्दा ग्रासरुट कार्यक्रमलाई जीन्दगीको अविस्मरणीय कामको रुपमा लिएको छु।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1772726043.png)
-1764146706.png)
