त्रिवेणी बम विस्फोटबाट मृत्यु भएका आफन्तले गरे आन्दोलनको घोषणा

समाचार

महेश न्यौपाने सोमबार, जेठ २६, २०७७ १०:३१

रोल्पा- रोल्पाको त्रिवेणी बम विस्फोटका मृतकका परिवारले न्याय नपाएको भन्दै आन्दोलन घोषणा गरेका छन्। आइतबार त्रिवेणी गाउँपालिका कार्यालय रोल्पालाई ज्ञापनपत्र बुझाउदै संघर्ष समिति मार्फत् आन्दोलनका कार्यक्रम घोषणा गरेको जानकारी दिएका हुन्।

संघर्ष समितिले राखेको मागपत्रमा मृतक चार जनालाई बालसहिद घोषणा गर्नुपर्ने, अन्य सहिदले पाए सरहको सेवा सुविधा तथा अन्य क्षतिपूर्ति दिनुपर्ने, घटना जुनसुकै पक्षबाट भए पनि सत्यतथ्य पत्ता लगाई दोषीलाई कारबाही गर्नुपर्ने र गाउँपालिकाको सार्वजनिक स्थलमा चारै जना बालबालिकाको शालिक सहित सहिद स्मारक बनाउनुपर्ने विषय छन्।

आफूहरुको माग पूरा नभए चरणबद्ध आन्दोलन गर्दै जाने संघर्ष समितिले जनाएको छ। ‘चरणबद्ध संघर्षका कार्यक्रम अन्तर्गत जेष्ठ २५ गते ज्ञापनपत्र बुझाउने, जेठ ३० गते धर्ना जुलुस गर्ने, असार ५ गते तालाबन्दी गर्ने र असार १० गतेदेखि अनसन बस्ने सम्मका कार्यक्रम घोषणा गरेका छौं’, संघर्ष समितिका संयोजक कृष्ण नेपालीले भने।

जिल्ला प्रशासन कार्यालय रोल्पा, मुख्यमन्त्रीको कार्यालय बुटवल र गृहमन्त्रालयलाई बोधार्थ दिइएको उक्त ज्ञापनपत्रमा प्रदेश ५ का आन्तरिक मामिला तथा कानुनमन्त्रीले दिएको आश्वासन र संघीय सरकारको निर्णय पिडित परिवारको न्याय विपरित रहेको उल्लेख गरिएको छ। यसअघि आफूहरुले त्रिवेणी गाउँपालिका र वडा कार्यालयमा निवेदन दिए पनि पनि बेवास्ता गरिएको आरोप लगाएका छन्।

माओवादी सशस्त्र युद्धकालको बम विस्फोटवाट मृत्यु भएका बालबालिकाहरुलाई सामान्य गाडी दुर्घटनामा मृत्यु भएसरी व्यवहार गरिएको त्रिवेणी गाउँपालिका सदस्य गीता नेपालीले बताइन्। प्रदेश ५ सरकारका आन्तरिक मामिला तथा कानुन मन्त्री कुलप्रसाद केसी स्वयं घटना स्थल आई सत्यतथ्य बुझेर फर्किए पनि अहिले अपेक्षा विपरित निर्णय आएको नेपालीको भनाई छ। ‘मन्त्री स्वयंले मृतकलाई सहिद घोषणा गर्ने आश्वासन दिएका थिए’, नेपालीले भनिन्।

प्रदेश सरकारबाट घटनाको अनुसन्धानका लागि आएको टिमले समेत मृतकका परिवारको कुरा नसुनेर घटना स्थलको मात्रै अनुसन्धान गरेर फर्किएको मृतकका आफन्तको आरोप छ। ‘घटना घटेको १ महिना पूरा हुँदासम्म पनि आफ्ना छोराछोरी के कारणले मारिए भन्ने थाहा नपाउनु कहाँसम्मको न्याय हो’, मृतक गौरवको सानी आमा गीता नेपालीले प्रश्न गरिन्।

‘चार बालबालिकालाई सहिद घोषणा गर्नुपर्ने आफूहरुको माग भए पनि वास्ता गरिएन’, संघर्ष समितिका संयोजक कृष्ण नेपालीले भने, ‘माओवादी सशस्त्र युद्धकै बम विस्फोटबाट बालबालिकाको मृत्यु भएकाले उक्त द्वन्द्वमा ज्यान गुमाएकाहरु सरह राज्यले व्यवहार गरोस् भन्ने परिवारजनको माग हो।‘

घटना बारे छानविन गर्न समिति गठन भएको भनिए पनि अहिले सम्म समितिले स्थलगत अवलोकन गरेको थाहा नपाएको नेपालीले बताए। छानबिनको सुस्तताले आफुहरुले न्याय पाउने कुरामा विश्वास घट्दै गएको उनले बताए। ‘मृतकका आफन्तहरु बोल्न सक्ने अवस्थामा छैनन्। राज्यले न्याय गर्छ भन्ने विश्वास थियो, बज्रपात भयो’, उनले भने।

संघीय सरकारको गत जेष्ठ २२ गतेको बैकठले प्रतिमृतक ५ लाख राहात दिने निर्णय गरेको थियो। प्रदेश ५ सरकारले गत जेठ १ प्रतिमृतक १ लाख दिने निर्णय गरेको थियो। आश्वासन विपरित संघ र प्रदेश सरकारले गरेको निर्णयबाट असन्तुष्ट आफन्तजन सहित स्थानीयहरुले संघर्षका कार्यक्रम घोषणा गरेका हुन्।

गत वैशाख १८ गते बेलुका रोल्पा त्रिवेणी गाउँपालिका- ७ गैरीगाउँ गुज्रीखोला ठ्यामरबोटमा वाख्रा चराउन गएका १५ वर्षीय नोखिराम डागी, १३ वर्षीय गौरव नेपाली, ११ वर्षीया विमला केसी र ५ वर्षीय विजय केसीको ज्यान गएको थियो।

सम्बन्धित समाचार

रोल्पाको त्रिवेणीमा बम विस्फोट हुँदा ४ बालबालिकाको मृत्यु

रोल्पा त्रिवेणी विस्फोटमा मृत्यु हुने चारै जनाको सनाखत