बुधबार नेपाल लाइभमा प्रकाशित मुख्य ७ समाचार
१. पर्यटन बोर्डको सिइओ छनोटमा लाग्यो 'ब्रेक'
दीपकराज जोशीको अवकाससँगै खाली भएको नेपाल पर्यटन बोर्डको सिइओ (प्रमुख कार्यकारी अधिकृत)को छनोट प्रक्रियामा ब्रेक लागेको छ। छनोट उपसमितिले माघ ५ मा नयाँ सिइओका लागि सिफारिस गरेका ३ जना उम्मदवारको नाममा एकमत नभएपछि विवाद सुरु भएपछि सिइओ छान्ने प्रक्रिया रोकिएको हो। छनोट उपसमितिले नयाँ सिइओका लागि आवदेन दिएका १७ जनाबाट ९ जनाको नाम सर्ट लिस्ट गरेर धनञ्जय रेग्मी, हिकमत सिंह ऐर र दीपक बस्ताकोटीको नाम नेपाल पर्यटन बोर्डको सञ्चालन समितिमा रिफारिस गरेको थियो।
तर, सञ्चालक समितिका अध्यक्ष तथा संस्कृति, पर्यटन तथा नागरिक उड्डयन मन्त्रालयका सचिव केदारबहादुर अधिकारीले छनोट उपसमितिले नयाँ सिइओ छनोटका लागि सिफारिस गरेको ३ जनाको नाममा ५ जनाको हुनुपर्ने भन्दै बैठक नै अनिश्चितकालका लागि स्थगित गरे।
थप समाचार : पर्यटन बोर्डको सिइओ छनोटमा लाग्यो 'ब्रेक'
२. एक नेवाः मुस्मांको फुटबल
अफताब उद्दिनका पुर्खा कास्मिरबाट व्यापार गर्न काठमाडौं आए। वर्षौं पहिले। इन्द्रचोक उनीहरुको रोजाइँमा पर्यो। आकाशभैरव मन्दिरको वरपर। अहिले त्यो कास्मिरी बजारकै परिचयमा छँदैछ। उनीहरुको व्यापार फैलँदै गयो। विशेष त पोतेकै। तर, अफताब उद्दिनका बुबा सम्सु उद्दिनले पोते मात्रै बेचेनन्। जिजुबाजेले इन्द्रचोकमा सुरु गरेको व्यापारसँगै उनको रोजाइँमा पर्यो फुटबल। त्यो समयका गजवका डिफेन्डर। खेलाडी बुबाका छोरा अफताबमा पनि त्यो गुण सर्यो। उस्तै डिफेन्डर।
बिसं २००४ सालमा राणा परिवारको फुटबल क्लब नरेश ११ मा सम्सु उद्दिन पनि खेल्थे। त्यसबेला राणाहरुको टिममा दुई मुसलमान खेलाडी थिए। सम्सु उद्दिनसँगै अर्का मुनिर उद्दिन। सम्सु उद्दिनले त्यही समय इन्द्रचोक आकाशभैरव फुटबल क्लब पनि बनाएका थिए। सात जना मुसलमान र बाँकी अरु समुदायका खेलाडी मिसाएर। खाली खुट्टा चल्ने फुटबलमा टोलतिर सम्सु उद्दिनले राम्रै नाम कमाएका थिए। त्यही नाम राणाहरुमाझ र दरबारसम्म पनि फैलिएको थियो।
थप समाचार : एक नेवाः मुस्मांको फुटबल
३. उखु किसानले सरकारबाटै पाएनन् अनुदान
उखु किसानहरुलाई चिनी उद्योगीबाट बक्यौता रकम दिलाउने आश्वासन बाँडिरहेको सरकार आफैँले भने किसानहरुलाई अनुदान रकमबाट वञ्चित गराएको पाइएको छ। कृषि तथा पशुपंक्षी विकास मन्त्रालयले किसानहरुलाई १ अर्ब ३४ करोड बराबर अनुदान दिन बाँकी छ। उखु किसान र उद्योग वाणिज्य तथा आपूर्ति मन्त्रालयबीच भएको ५ बुँदे सम्झौतामा माघ ७ भित्र सबै बक्यौता रकम दिलाउने भनिएकोमा उखु किसानले न त बक्यौता रकम पाउन सके, न सरकारी अनुदान नै।
‘हामीले १५ करोड बक्यौता रकममात्रै पाएका छौँ, अहिलेसम्म सरकारले अनुदान पनि दिएको छैन,’ उखु किसान संघर्ष समितिका संरक्षक राकेश मिश्रले नेपाल लाईभसँग भने। सर्लाही सिसौटीयाका अर्का उखु किसान रामविलास महतो पनि आफूले चिनी मिलबाट १ लाख ८० हजार बक्यौता पाएको तर सरकारले दिने अनुदानबारे केही जानकारीसमेत नआएको बताउँछन्।
थप समाचार : उखु किसानले सरकारबाटै पाएनन् अनुदान
४. ‘अस्ट्रेलिया काण्ड’ मा पीडित भन्दै नेपालमा उजुरी
अस्ट्रेलियामा रहेकी एक नेपाली युवतीले ‘अस्ट्रेलिया काण्ड’ भन्दै सामाजिक सञ्जालमा सार्वजनिक भएको अश्लील भिडियो क्लिपमा फेसबुकमा रहेको आफ्नो भिडियो जोडेर चरित्र हत्या गरेको भन्दै नेपालमा उजुरी गरेकी छिन्।अश्लील साइटमा राखिएको असम्बन्धित भिडियोमा आफ्नो भिडियोको सानो क्लिप जोडेर चरित्र हत्या गरिएको भन्दै अस्ट्रेलियाबाटै बुधबार नेपाल प्रहरीको साइबर ब्युरोमा उजुरी आएको हो।
सोमबारदेखि ‘अस्ट्रेलिया काण्ड : नेपाली युवतीको अश्लील भिडियो’ भन्दै सामाजिक सञ्जालमा पोर्न क्लिप सार्वजनिक गरिएको छ। सो क्लिप नेपालीको भने हैन। पोर्नहब नामक अश्लील भिडियो अपलोड गर्ने साइटमा रहेको भिडियोलाई नै नेपालीको भिडियो भन्दै फेसबुकका क्लोज ग्रुपहरुमा फैलाइएको हो।
थप समाचार :‘अस्ट्रेलिया काण्ड’मा पीडित भन्दै नेपालमा उजुरी, प्रहरीले सुरु गर्यो अनुसन्धान
५ हत्या आरोपीलाई कांग्रेसको 'सुनपानी'
सभामुख पदमा पार्टीबाट उम्मेदवारी दिने-नदिने विषयमा निर्णय गर्न मंगलबार सिंहदरबारस्थित कांग्रेस संसदीय दलको कार्यसमिति बैठकमा नेता डा मिनेन्द्र रिजालले उम्मेदवारी दिनुपर्ने मत राखेका थिए। हारजित हेरेर भन्दा पनि प्रमुख प्रतिपक्षी दलको जिम्मेवारीअनुसार सभामुखमा उम्मेदवारी दिन पार्टी नेतृत्वलाई सुझाव दिएका थिए। तर सचेतक पुष्पा भुसाल, कार्यसमिति सदस्य मीनबहादुर विश्वकर्मा लगायत नेताले भने उम्मेदवारी नदिन उचित हुने धारणा राखेका थिए। ३० सदस्यीय कार्यसमितिका अधिकांश सदस्य पनि नेकपा उम्मेदवार अग्नि सापकोटालाई सर्वसम्मत बनाउनुपर्ने पक्षमा उभिए।
बैठकमा सहभागी पार्टी सभापति शेरबहादुर देउवा प्रारम्भमा मौन नै बसे। तर्कवितर्क भइरहे। आखिरमा बैठक समापन गर्दै देउवाले भने, ‘उम्मेदवारी दिदैनौं।’ डा रिजाल हेरेको हेर्यै भए।
थप समाचार : हत्या आरोपीलाई कांग्रेसको 'सुनपानी'
६. प्रहरीको सरुवामा शक्ति केन्द्रको कर्के नजर
प्रहरी नियमावलीमा रहेको प्रावधानअनुसार एसपीतहसम्मको कर्मचारीको सरुवाको अधिकार प्रहरी महानिरीक्षको हो। एसएसपी र डिआइजीको सरुवाको अधिकार गृहमन्त्रालयसँग छ भने एआइजीको सरुवा मन्त्रिपरिषद्ले मात्र गर्नसक्छ। तर, प्रहरी महानिरीक्षकले गर्ने सरुवाको निर्णयको हालत के हुन्छ त्यो प्रष्ट्याउन मीरा चौधरी र गंगा पन्तले भोगेको अवस्था नै काफि छ।
संयोग कस्तो भने राजनीतिक स्वार्थको चपेटामा परेर भएको सरुवाअनुसार जिम्मेवारी लिन नपाउने दुवै महिला प्रहरी अधिकृतै परे। प्रहरी नियमावलीअनुसार एसपीसम्मको सरुवा तथा काज खटाउने अधिकार प्रहरी महानिरीक्षकलाई दिएको छ। तर, नियमावली र निर्देशिकाको पूर्णपालना गरेर काज सरुवा भएको भन्न सक्ने अवस्था प्रहरीमा नरहेको पूर्वडिआइजी हेमन्त मल्लको बुझाइ छ।
थप समाचार : प्रहरीको सरुवामा शक्ति केन्द्रको कर्के नजर
७. ट्राफिक प्रहरीको कारबाहीमा परे हास्यकलाकार केदार घिमिरे
हास्यकलाकार केदार घिमिरे ‘माग्ने बुढा’ ट्राफिक कारबाहीमा परेपछि चर्चामा छन्। उनलाई सिट बेल्ट नलगाई कार चलाएका कारण बुधबार ट्राफिक प्रहरीले चिट काटेको थियो।
प्रहरीको व्यवहारको बहस भइरहेको बेला उनी चिट काट्ने प्रहरीसँग रिसाउनु सट्टा उल्टै उनलाई धन्यवाद दिइरहेका छन् । त्यसैले उनको चर्चा भइरहेको छ। 'सिट बेल्ट नलगाएर चर्चामा आउनुभयो है' भन्ने नेपाल लाइभको जिज्ञासमा उनले हाँस्दै जवाफ दिए, ‘त्यही त, चाहिनेभन्दा बढी हल्ला भयो। तर, साँच्चिकै ती ट्राफिक प्रहरी साह्रै मज्जाका थिए। मैले त्यति नम्र र मीठो हिसाबले बोल्ने ट्राफिक प्रहरी अहिलेसम्म देखेको थिइनँ।’
थप समाचार : ‘लिफ्ट माग्न आउनुभएको होला भनेको चिट काट्न पो रहेछ’
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1700232974.jpg)
-1786602170.png)
