काठमाडौं- हास्यकलाकार केदार घिमिरे ‘माग्ने बुढा’ ट्राफिक कारबाहीमा परेपछि चर्चामा छन्। उनलाई सिट बेल्ट नलगाई कार चलाएका कारण बुधबार ट्राफिक प्रहरीले चिट काटेको थियो।
प्रहरीको व्यवहारको बहस भइरहेको बेला उनी चिट काट्ने प्रहरीसँग रिसाउनु सट्टा उल्टै उनलाई धन्यवाद दिइरहेका छन् । त्यसैले उनको चर्चा भइरहेको छ।
'सिट बेल्ट नलगाएर चर्चामा आउनुभयो है' भन्ने नेपाल लाइभको जिज्ञासमा उनले हाँस्दै जवाफ दिए, ‘त्यही त, चाहिनेभन्दा बढी हल्ला भयो। तर, साँच्चिकै ती ट्राफिक प्रहरी साह्रै मज्जाका थिए। मैले त्यति नम्र र मीठो हिसाबले बोल्ने ट्राफिक प्रहरी अहिलेसम्म देखेको थिइनँ।’
महानगरीय ट्राफिक प्रहरी महाशाखा रामशाहपथ पुगेर ५ सय रुपैयाँ जरिवाना तिरेका केदारले ट्राफिक कारबाहीमा पर्दाको अनुभव नेपाललाइभसँग यसरी सुनाएः
मेरो घरबाट नजिकै हो, ग्वार्को चोक। चोकमा पुगेर कोटेश्वर ‘टर्न’ हुनै लागेको थिएँ, नजिकै आएर एक जना ट्राफिक प्रहरीले गाडी रोक्नुभयो। नाम रहेछ, सन्तोष चौधरी। मलाई त लाग्यो, आपत परेर लिफ्ट माग्नका लागि रोक्नुभएको होला तर कारण त चिट काट्न पो रहेछ।
हेड अफिसबाटै खटिएका ट्राफिक प्रहरी रहेछन्। मेरे नजिकै आएर मलाई नम्र शैलीमा भन्नुभयो, ‘तपाईंले सिट बेल्ट लाउनुभएको रहेनछ, हामी कारबाही गर्छौ ल।’
उहाँको मिठासपूर्ण आग्रह नकार्न सकिनँ, लुरुलुरु हुन्छ भनेँ, अनि लाइसेन्स दिएँ।
त्यसपछि लाइसेन्स उकास्न भनेर ट्राफिक महाशाखा गा’को थिएँ। बैंक बन्द भइसकेछ। महाशाखाका प्रमुख एसएसपी भीमप्रसाद ढकाललाई भेटेर मलाई कारबाही गर्ने ती नम्र प्रहरीलाई एकचोटी भेटाइदिन अनुरोध गरेँ। उहाँले भेटाइदिनुभयो।
त्यही बेला एसएसपीज्यूको मोबाइलमा एक जना पत्रकारको फोन आएको थियो। उहाँले सामान्य शैलीमा माग्ने बुढा आउनुभा’छ भनेर घटनाबारे सामान्य जानकारी दिनुभएको थियो। त्यसको केही समयभित्रै त्यहाँ त आधा दर्जनजति पत्रकारको भिड लागिहाल्यो। त्यसपछि हल्ला भयो। अहिले प्रहरीको व्यवहार बहस भइरहेका बेला राम्रै भएछ जस्तो लाग्यो।
चिट काट्ने बेला ती प्रहरीले मलाई चिनेजस्तो लागेन। पछि महाशाखामा भेट्दा पनि नचिनेको बताउनुभयो। आम सर्वसाधारणकै रुपमा पनि त्यस्ता व्यवहार पाइँदोरहेछ, मलाई खुसी लाग्यो।
म पहिलोपल्ट ट्राफिक कारबाहीमा परेको भने होइन। कति परियो, परियो तर यसपाली ज्यादा हल्ला भयो। तै पनि चिट काट्ने ट्राफिक प्रहरीलाई फेरि भन्छु- मीठो बोली बचनका लागि धन्यवाद!
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
-1788425345.png)
