काठमाडौं– मंसिर १४ मा हुने उपनिर्वाचनका लागि नेपाली कांग्रेसको जिल्ला कार्यसमितिबाट बागलुङ २ ‘ख’ र धरान उपमहानगरपालिबाट उम्मेदवारको सिफारिस केन्द्रलाई प्राप्त भएको छ। पाँचथरस्थित फाल्गुनन्द गाउँपालिकाका प्रत्यासीको नाममा टुंगो लागे पनि केन्द्रमा सिफारिस भइसेको छैन।
पार्टी केन्द्रले ३ जनाको नाम पठाउन मातहतका संगठनलाई निर्देशन दिएको थियो। प्रदेश उम्मेदवारका लागि क्षेत्रीय कार्यसमितिले सिफारिस गरेका नाममा जिल्ला कार्यसमितिले रायसहित नाम केन्द्रलाई पठाउनसक्ने अधिकार छ।
उपनिर्वाचनमा सर्वाधिक चासोको क्षेत्र हो– कास्की २। प्रतिनिधिसभा सदस्यका लागि निर्वाचन हुने एक मात्रै क्षेत्रमा कांग्रेसबाट दर्जन बढी आकांक्षी देखिएका छन्।
निधन भएका पूर्व पर्यटनमन्त्री रवीन्द्र अधिकारीसँग पराजित देवराज चालिसेको उम्मेदवारी दोहोरिने धेरैको आंकलन छ। क्षेत्रीय कार्यसमितिले जिल्लालाई नाम सिफारिस गर्न नसकेकाले केन्द्रमा नाम पठाउन ढिलाई भएको जिल्ला सभापति कृष्ण केसीले जानकारी दिए। सिफारिसका क्रममा आइपरेको व्यवधान बारे उनले भने, ‘सर्वसहमतिमा नाम सिफारिस गर्न भनिएको छ। सर्वसहमति हुन नसके कुन विधिबाट तय गरी पठाउने कुनै प्रावधान छैन। क्षेत्रीय कार्यसमितिलाई बहुमतको आधारमा उम्मेदवार छनोट गर्ने विकल्प छैन।’
कास्की २ मा चालिसे सहित खेमराज पौडेल, शोभियत बहादुर अधिकारी, माधव बास्तोला, वीरेन्द्र नारायण बिजुक्छे, लक्ष्मी पाण्डे, महादेव गुरुङ, ऋषि काफ्ले र गुरु बराल आकांक्षी छन्। क्षेत्रीय कार्यसमितिको बैठकले नामावली टुंगाएसँगै केन्द्रमा सिफारिस गर्ने जिल्ला सभापति केसीले जानकारी गराए।
धरान उपमहानगरका लागि सर्वसहमतिमा एक जनाको नाम तय भएको छ। गत स्थानीय तहको निर्वाचनमा कांग्रेसबाट मेयरमा पराजित तिलक राईलाई पुनः उम्मेदवारमा दोहोर्याइएको छ। राई कांग्रेसका महानगरका सभापति समेत हुन्।
सुनसरी कांग्रेसका सभापति राजीव कोइरालाले भने, ‘क्षेत्रीय कार्यसमितिले सर्वसहमतिमा चयन गरी नाम पठाएको थियो। उनकै नाम केन्द्रमा सिफारिस गरें।’
तत्कालिन एमालेबाट निर्वाचित मेयर तारा सुब्बाको निधन भएको थियो।
केन्द्रीय कार्यालयले बढीमा तीन जनाको नाम पठाउन निर्देशन दिए पनि बागलुङ २ ‘ख’ मा जिल्ला कार्यसमितिले चार जनाको नाम पठाएको छ। कांग्रेसका बागलुङ जिल्ला सभापति दिपेन्द्र बहादुर थापाले भने, ‘क्षेत्रीय कार्यसमितिले पठाएका नाम हटाउने अधिकार जिल्ला कार्यसमितिलाई छैन। चार जनाकै नाम केन्द्रमा पठाएँ।’
द्रोण कुँवर, कुमारसिंह घर्ति, जीत शेरचन र टेकराज पौडेलको नाम सिफारिस गरिएको छ। कुँवर क्षेत्रीय सभापति हुन् भने अन्य महाधिवेशन प्रतिनिधि हुन्। गत निर्वाचनमा नेकपाको गठबन्धनबाट राष्ट्रिय जनमोर्चाका टेक बहादुर घर्ती विजयी भएका थिए। निधन भएका घर्तिका प्रतिस्पर्धी कांग्रेसका जीत शेरचन थिए।
दाङ ३ ‘ख’मा क्षेत्रीय कार्यसमितिले नाममा टुंगो लगाउन नसक्दा केन्द्रलाई नाम प्राप्त भएको छैन। नेकपाबाट प्रदेश ५ का प्रदेशसभा सदस्यमा विजयी भएका उत्तमकुमार ओलीको निधन भएपछि उक्त क्षेत्र रिक्त बनेको छ। गत निर्वाचनमा ओलीसँग पराजित भएका बुद्धिराम भण्डारीले पुनः उम्मेदवार बन्न इच्छा देखाएका छैनन्। भरत केसी, केशव आचार्य, शंकर डांगी र खेम प्रसाद खराल उम्मेदवारको आकांक्षी देखिएका छन्।
भक्तपुर १ ‘क’ बाट निर्वाचित प्रदेशसभा सदस्य बनेका नेकपाका हरिशरण लामिछानेको मृत्य भएपछि त्यस क्षेत्रमा पुनः निर्वाचन हुन लागेको छ। उक्त क्षेत्रमा कांग्रेसबाट तरुण दलका पूर्व अध्यक्ष समेत रहेका विनोद कायस्थको नाम बढी चर्चामा छ। गत निर्वाचनमा लामिछानेसँग पराजित भएका जीवन खत्री पनि आकांक्षी छन्। मनोजकुमार थापा, जगन्नाथ कार्की, हरि नेपाल, किरण न्यौपाने, राजाराम खड्का, सुरेश श्रेष्ठ उम्मेदवारको लाइनमा छन्। कृष्णलाल भंडेलले पनि उम्मेदवारको दाबी गर्दै आएका छन्।
भंडेल संविधान सभाको पहिलो निर्वाचनमा नेमकिपाका अध्यक्ष नारायणमान बिजुक्छेसँग पराजित भएका थिए।
पाँचथरस्थित फाल्गुनन्द गाँउपालिकाका अध्यक्षको पद रिक्त छ। कांग्रेसबाट निर्वाचित अमरकुमार नेम्बाङको रिक्त पदमा वृजहाङ आङदम्वेलाई सिफारिस गरिएको पाँचथर कांग्रेसका सभापति नरेन्द्र कुमार केरुङले जानकारी दिए।
संखुवासभाको मकालु गाँउपालिकाका अध्यक्ष खड्ग कटुवालको स्थान पनि खालि छ। उक्त स्थानमा सर्वसहमतिबाट उम्मेदवार चयन गरिने संखुवासभा कांग्रेस सभापति दिपेन कुमार श्रेष्ठले जानकारी गराए। उनले भने, ‘इच्छा राख्नेहरु धेरै छन्। कात्तिकको पहिलो साताभित्रै केन्द्रमा नाम पठाइन्छ।’
गत निर्वाचनमा कांग्रेस उम्मेदवार बहादुर राई पराजित भएका थिए।
महोत्तरीको पिपरा गाउँपालिकाका अध्यक्ष विनोदकुमार चौधरीको निधन पछि उक्त स्थान पनि खालि छ। क्षेत्रीय कार्यसमितिले नामावली सिफारिस नगरेकाले केन्द्रमा तीन जनाको नाम पठाउन नसकिएको जिल्ला सभापति महेन्द्र कुमार रायले जानकारी गराए।
सिफारिस भएका नामबाट उम्मेदवार छनोट गर्न र उपनिर्वाचनको रणनीति तय गर्न पार्टी केन्द्रको बैठक कार्तिक ७ लाई बोलाइएको छ।
नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।
