काठमाडौं- गत शनिबार नेपाल र भारतका वाणिज्य सहसचिवस्तरीय बैठकले दुई देशबीचको व्यापार सन्धि पुनरावलोकन गर्ने सम्झौता गर्यो। उक्त सम्झौतासँगै दुई देशबीच पारवहनका विषयमा पनि महत्वपूर्ण सहमति जुटेको उद्योग, वाणिज्य तथा आपूर्ति मन्त्रालयले जनाएको छ।
वाणिज्य सन्धि पुनरावलोकन सम्झौता गर्दा नेपालका तर्फबाट हस्ताक्षर गरेका उद्योग, वाणिज्य तथा आपूर्ति मन्त्रालयका सहसचिव नवराज ढकालकाअनुसार भारतसँगको छलफलका क्रममा जल तथा रेल यातायातका माध्यमबाट पारवहन सुविधा उपयोग गर्ने सम्बन्धी सन्धिलाई संशोधन गर्ने विषयलाई महत्वका साथ उठाइएको छ। पारवहन सन्धिको प्रस्तावित ‘लेटर अफ एक्सचेन्ज’को मस्यौदालाई अन्तिम रुप दिइएको ढकालले जानकारी दिए।
जलमार्ग प्रयोगका विषयमा अन्तिम चरणमा रहेको उक्त मस्यौदाका प्रावधान अनुसार भारतको हल्दिया, साहिबगन्ज, कालुघाट र वनारसमा रहेका आन्तरिक जल यातायातका टर्मिनलहरु प्रयोग गरी नेपाली सामान ढुवानी गर्न सकिनेछ।
नेपाल-भारत पारवहन सन्धिमा समावेशपश्चात् नेपालले कोलकत्ता-हल्दियाबाट गंगा नदीमा निर्मित भारतको आन्तरिक जलमार्ग प्रयोग गरी नेपाली ध्वजावाहक पानीजहाज समेत सञ्चालन गर्न सकिनेछ। त्यसैगरी, कलकत्ता-कालुघाट-रक्सौल जलमार्गमा पनि नेपाली पानीजहाज चल्ने सहसचिव ढकालले बताए।
‘हामीले वाणिज्य सन्धि पुनरावलोकनका लागि समहति गर्यौं नै, त्योसँगै पारवहनका महत्वपूर्ण विषयहरुमा पनि सहमति जुटेको छ। प्रारम्भिक सहमति त भयो तर अरु प्रक्रियाहरु थुप्रै बाँकी हुन्छन्। विभिन्न चरणमा छलफल भएपछि मात्रै अन्तिम टुंगो लाग्छ,’ ढकालले भने।
प्रधानमन्त्री केपी शर्मा ओलीको भारत भ्रमणका क्रममा भएको जलमार्गसम्बन्धी सम्झौताले भारतीय जलमार्गमा नेपाली ध्वजाबाहक पानीजहाज चलाउन बाटो खोलेको थियो।
यसअघि सन् २०१६ सालमा नवीकरण भएको वाणिज्य सन्धि पुनरावलोकन गर्न थप छलफलका लागि दुई देशबीच सचिवस्तरीय अर्को बैठक काठमाडौंमा बस्नेछ। जसले सन् २०२३ सम्मका लागि हुनेगरी वाणिज्य सन्धिको पुनरावलोकन गर्नेछ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1773729220.png)
-1773728847.png)
-1764146706.png)
-1773643707.png)
