डडेल्धुरा- जिल्ला प्रहरी कार्यालय डडेल्धुराको ब्यारेक तीन वर्षदेखि भाडाको घरमा सञ्चालित छ। आफ्नै भवन जिर्ण भएपछि चर्को रकम तिरेर प्रहरी ब्यारेक भाडाको घरमा सञ्चादन हुँदै आएको हो।
२०७३ सालमा ब्यारेक जिर्ण भएपछि ४४ जना प्रहरी हवलदार र जवान भाडाको घरमा बस्दै आएका जिल्ला प्रहरी कार्यालय डडेल्धुराका प्रहरी नायब उपरीक्षक दाधिराम न्यौपानेले बताए। उनका अनुसार भाडा लिएको भवन पनि सानो हुँदा एउटै कोठामा ४ जनाका दरले बस्नुपर्ने बाध्यता छ।
जिल्ला प्रहरी कार्यालयबाट झन्डै ३ सय मिटरको दूरीमा ब्यारेक छ। कुनै आकश्मिक कामका लागि ब्यारेकमा रहेका प्रहरीलाई बोलाउन तथा खटाउनु परेमा समेत समस्या रहेको डिएसपी न्यौपाने गुनासो गरे। रातदिन जनताको शान्तिसुरक्षाका लागि खटिने प्रहरी अहिले आफैं असहज र असुरक्षित महसुस गरिरहेको उनको भनाइ छ।
‘एक त आफ्नो भवन नहुँदा महँगो रकम तिरेर भाडाको घरमा बसेका छौं, घर मालिकको तनाव छँदैछ। त्यसमाथि आकश्मिक कामका लागि ब्यारेकमा बस्ने प्रहरीलाई बोलाउनै समस्या छ,’ उनले भने, ‘प्रहरीलाई गाउँ जस्तै स्थानमा भाडाको घरमा बसाइएको छ, घरमा घेरबार केही छैन। भिड नियन्त्रणमा वा अन्य ठाउँमा खटिँदा कसैलाई चित्त नबुझेको हुनसक्छ, रिस उठेको हुनसक्छ, त्यसकारण पनि खुल्ला घरमा बस्दा प्रहरी आफैं असुरक्षित छ।’
हवलदारमाथिका पदका लागि भने जिल्ला प्रहरी कार्यालयमा बस्ने व्यवस्था मिलाइएको उनले जनाए। हाल ब्यारेकमा बस्ने प्रहरीहरुलाई खानादेखि शौच तथा नुवाइधुवाइ गर्नसमेत जिल्ला प्रहरी कार्यालय परिसरमा आउनुपर्ने बाध्यता रहेको प्रहरी जवान नविन पन्तले गुनासो गरे। ‘४४ जना छौं। पानी १५ मिनेट मात्र आउँछ शौचालय जान पनि पुग्दैन,’ पन्तले भने, ‘सुत्न पनि एउटै कोठामा ४ जना, कहिलेकाहीँ दंगा आएको बेला ५ जनासम्म सुत्नुपर्छ। ड्युटी आउन-जान पनि समस्या छ।’
३ वर्षमा १५ लाख ८४ हजार भाडामा खर्च
ब्यारेक भवनको भाडावापत डडेल्धुरा प्रहरीले मासिक ४४ हजारका दरले वार्षिक ५ लाख २८ हजार रुपैयाँ भुक्तानी गर्ने गरेको छ। पछिल्लो ३ वर्षमा घरभाडामा मात्रै १५ लाख ८४ हजार रुपैयाँ खर्च भएको प्रहरी नायब उपरिक्षक न्यौपानेको भनाइ छ।
जनतासँग प्रत्यक्षरूपमा जोडिएको नेपाल प्रहरी नै अरुको भवनमा कष्टकर रुपमा बस्नुपर्दा कार्यसम्पादनमा असर पर्ने उनले बताए। सामान्यतया खाने, बस्ने, शौचालयलगायतका आधारभूत कुरा परिपूर्ति नहुँदा प्रहरीलाई दैनिक कार्यसम्पादनमा असर पर्नेगरेको न्यौपानेको भनाइ छ। यो आर्थिक वर्षको मंसिर महिनासम्ममा नयाँ भवन निर्माण गर्ने तयारीमा रहेको डिएसपी न्यौपानेले जानकारी दिए।
६ प्रहरी चौकी भाडामा, शीर्ष चौकी जिर्ण भवनमा
डडेल्धुरा जिल्लामा स्थानीय तहमा रहेका ६ प्रहरी चौकी भाडाका जिर्ण भवनमा सञ्चालित छन्। जिल्लाको भित्री मधेसमा पर्ने भारतसँगको सीमा प्रहरी चौकी तातोपानी, स्याउले, गाङ्खेत, रुपाल, देवलदिव्यपुर, आलिताल प्रहरी चौकीहरु भाडाका भवनबाटै सुरक्षा दिन बाध्य छन्।
तातोपानी चौकीले ३ हजार ९ सय ९३, स्याउलेको ६ हजार, गाङ्खेतले ३ हजार ३ सय २८, रुपाल चौकीले ३ हजार ७ सय २७, देवलदिव्यपुरले ३ हजार ९ सय ९३, र आलिताल प्रहरी चौकीले मासिक ३ हजार ९ सय ९३ रुपैयाँ भाडावापत तिर्ने गरेका जिल्ला प्रहरी कार्यालय डडेल्धुराले जनाएको छ। तीन वर्षमा यी चौकीहरुको भाडा ९ लाख १ हजार २ सय तिरिएको पनि कार्यालयको लेखा शाखाको भनाइ छ। सबै ६ स्थानमै प्रहरीको आफ्नो जमिन नहुँदा भाडामा बस्नु परेको हो।
पछिल्लो ३ वर्षमा जिल्ला प्रहरी कार्यालयले घरको भाडावापत मात्रै २४ लाख ८५ हजार २ सय रुपैयाँ बुझाउने गरेको छ।
जिल्लाका अधिकांश चौकीहरुको अवस्था नाजुक छ। त्यसमाथि आलिताल गाउँपालिकामा रहेको जिल्ला प्रहरी कार्यालयको भवन सभेत जिर्ण रहेको जिल्ला प्रहरी कार्यालय डडेल्धुराले जनाएको छ।
एकजनाले कम्तीमा ४ सयलाई सुरक्षा दिनुपर्ने अवस्था
जिल्ला प्रहरी कार्यालय डडेल्धुरामा ३ सय ५० जना प्रहरीको दरबन्दी रहेको भए पनि अहिले २ सय ५० को हराहरीमा मात्रै रहेको प्रहरी नायब उपरिक्षक दाधिराम न्यौपानेले बताए। विभिन्न स्थानमा आवश्यकता अनुसार अस्थाई प्रहरी पोष्ट भएकाले पनि जनशक्ति अभाव छ।
जिल्लामा हाल खटिएका प्रहरी संख्याको आधारमा एक जनाले कम्तीमा पनि ४ सय जनालाई सुरक्षा दिनुपर्ने अवस्था छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
1668178073.jpg)
