काठमाडौं- 'डेडिकेटेड लाइन' लिए बापतको विद्युत महसुल असुल गर्न नेपाल विद्युत प्राधिकरणले गरेको पत्राचारप्रति निजी क्षेत्रले आपत्ति जनाएको छ।
नेपाल उद्योग वाणिज्य महासंघ, नेपाल उद्योग परिसंघ र नेपाल चेम्बर अफ कमर्सले मंगलबार काठमाडौंमा संयुक्त पत्रकार सम्मेलन गरी लोडसेडिङका बेला दिइएको डेडिकेटेड लाइनको विद्युत महसुल पनि असुल गर्न नेपाल विद्युत प्राधिकरणले हालै गरेको पत्राचारप्रति आपत्ति जनाएका हुन्।
लोडसेडिङको बेला लिइएको ट्रंक तथा डेडिकेटेड लाइनको विद्युत महशुल पनि असुल गर्ने सरकारको पत्राचार सबै उद्योगहरुलाई धराशायी बनाउने गरी आएकाले त्यसप्रति आपत्ति जनाउनु परेको नेपाल उद्योग वाणिज्य महासंघकी अध्यक्ष भवानी राणाले बताइन्।
'डेडिकेटेड लाइनको सुविधा लिने सम्झौता नगरेका उद्योगहरुमा पनि त्यसको विद्युत महसुल असुल गर्न पत्राचार फिर्ता लिन सरकार र सम्बन्धित निकायसँग माग गर्दछु,' अध्यक्ष राणाले भनिन्।
चर्को ब्याजदरका कारण समस्या परिरहेका उद्योगहरुलाई सरकारले फेरी थप विद्युत महशुल तिर्नुपर्ने पत्राचार गरेकोमा व्यवसायीहरुको आपत्ति छ। प्राधिकरणले सो पत्राचार फिर्ता नलिए सबै उद्योग बन्द हुने महासंघकी अध्यक्ष राणाको चेतावनी थियो।
अध्यक्ष राणाले विद्युत प्राधिकरणले डेडिकेटेड लाइन नलिएका उद्योगहरुलाई पनि सो महसुल असुल गर्ने पत्राचार गरेर दुःख दिएको पनि बताइन्।
२०७३ सालबाट बढाएको विद्युत महसुल हाल आएर सरकारले असुल गर्नु गलत भएको अध्यक्ष राणाको भनाई छ।
कार्यक्रममा नेपाल उद्योग परिसंघका अध्यक्ष सतीशकुमार मोरले विद्युत महशुल विनियमावलीमा भएको व्यवस्था विपरित नेपाल विद्युत प्राधिकरणले सो पत्राचार गरेकाले सो महशुल नतिर्ने स्पष्ट पारे।
'डेडिकेटेड लाईन लिन सम्झौता गरेर उद्योगहरुसँग सो महसुल लिनु स्वभाविक हो। तर नलिएकाहरुबाट असुली गर्न मिल्दैन,' उनको भनाइ थियो।
सिमेन्ट, फलाम र होटल व्यवसायनै धराशायी हुने गरी सरकारले सो महशुल असुलीका लागि पत्राचार गरेकोमा नेपाल चेम्बर अफ कमर्शका वरिष्ठ उपाध्यक्ष राजेन्द्र मल्लले पनि आपत्ति जनाए।
उनले मुलुकमा व्यापार घाटा बढिरहेका बेला सरकारले स्वदेशी उद्योगनै बन्द हुने गरी सो महसुल असुल गर्न खोजेको भन्दै असन्तुष्टि पनि व्यक्त गरे।
निजी क्षेत्रले डेडिकेटेड लाइन लिएबापतको विद्युत महसुल तिर्न नसक्ने जानकारी सरकारलाई गराएको छ।
यो पनि पढ्नुहोस्
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
