काठमाडौं– झापा प्रहरीको फरार अभियुक्तको सूचीमा रहेका नितेश ओली नितेशले आफ्नो फेसबुकबाट गृहमन्त्री सुदन गुरुङसँग खिचेका फोटो र भिडियो हटाएका छन्।
नेपाललाइभले सोमबार ‘फरार अभियुक्तसँग गृहमन्त्रीको सेल्फी’ शीर्षकमा समाचार प्रकाशन गरेलगत्तै उनको फेसबुकमा रहेका गृहमन्त्रीसँगका भिडियो र फोटो हटाइएका हुन्।
सुनसरी प्रहरीले अभद्र व्यवहारमा पक्राउ गर्न करिब दुई वर्षअघि नै झापा प्रहरीलाई पत्राचार गरेको र २०८३ असार १५ गते झापा जिल्ला अदालतबाट साइबर अपराधमा पक्राउ अनुमति प्राप्त भएको भए पनि प्रहरीले उनलाई पक्राउ गरेको थिएन। झापा प्रहरीले उनलाई फरार अभियुक्त भनिरहे पनि सत्ताको दबाबमा पक्राउ गर्नुको साटो फुक्काफाल छोडिदिएको आरोप छ।
फरार भनिएका उनी गोरखा पुगेर गृहमन्त्रीसँगै हिँड्दै सेल्फी र भिडियो खिच्न सफल भएका थिए। गोरखाका प्रमुख जिल्ला अधिकारी धर्मेन्द्रकुमार मिश्र पनि उनको फोटोमा देखिएका थिए। यद्यपि, नितेश फरार अभियुक्त भएको थाहा नपाएकाले त्यस्तो हुन पुगेको उनले नेपाललाइभलाई बताएका थिए।
नितेशले गृहमन्त्रीसँगका फोटो र भिडियो हटाएपछि फेसबुकमै एउटा भिडियो पोस्ट गरेका छन्। उक्त पोस्टमा उनले भनेका छन्, “मसँग सम्बन्धित नभएको विषयमा आधारहीन रूपमा ‘फरार अभियुक्त’ भन्ने आरोप लगाइएको देख्दा दुःख लागेको छ। मेरो विषय अदालतमा विचाराधीन कानुनी प्रक्रिया हो।”
उनले गोरखामा एक हप्तासम्म बसेर बाढीपहिरो प्रभावित क्षेत्रमा निरन्तर रिपोर्टिङ गर्ने तथा उद्धार र राहतका गतिविधिलाई नजिकबाट प्रस्तुत गर्ने अवसर पाएको भन्दै उक्त भिडियोको प्रसंग स्पष्ट पारेका छन्।
यो पनि: फरार अभियुक्तसँग गृहमन्त्रीको सेल्फी - नेपाल लाइभ :: नेपाल लाइभ :: Nepal Live - Independent Digital Media
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
