संगीत

सुरेश अधिकारी भन्छन्– ‘दशैं गीत’ ले मेरो जीवन नै सार्थक बनायो

समर्पण श्री शनिबार, कात्तिक ४, २०८० १८:०९

काठमाडौं– 'वर्ष र दिनको रमाइलो चाड गाउँघरमा आइपुग्यो, नेपालीजनको महान पर्व आँगनमा आइपुग्यो...।’

दशैंको आगमन हुनासाथ यो गीत गाउँघर वा सहरबजारमा गुन्जन थाल्छ। दशैं आएको आभास पछिल्लो २ दशकदेखि यो गीतले पनि दिन थालेको छ। यो गीत फिल्म ‘मुग्लान’मा समावेश छ। चर्चित फिल्म ‘मुग्लान’ लाई निर्देशन गरेका थिए शिव रेग्मीले।

यो गीतमा फिल्मका कलाकार दिलिप रायमाझी, रमित ढुंगाना, विपना थापा, सुशील क्षेत्री, मिथिला शर्मा र झरना थापाले अभिनय गरेका छन्।

यो गीत कसले लेख्यो भन्ने विवाद त अहिले पनि कायमै छ। फिल्मका संगीतकार सुरेश अधिकारी यो गीत शिव रेग्मीले नै लेखेको दाबी गर्छन्। यद्यपि रचनाकार लोकनाथ सापकोटाले कपीराइटको मुद्दा हालेपछि रचनामा उनको नाम राखिएको थियो।

गीतलाई संगीतकार अधिकारी यसरी सम्झहन्छन्:

फिल्मका निर्देशक शिव रेग्मीले गीत लेखेर दिनुभयो। मैले संगीत गरेँ। यो गीत ‘मुग्लान’ मा राखिएको छ। मैले आजसम्म सबैभन्दा धेरै मेहेनत गरेकाे गीत हो यो।

दशैं हरेक वर्ष आउँछ। हरेक दशैंमा यही गीत कानमा गुन्जिरहन्छ। मान्छेहरू यही गीतमा नाचिरहेको देख्छु। धेरैले भनेका सुनेको छु, ‘यो गीत नबजी त दशैं आएकै लाग्दैन।’

विसं २०६० सालमा बनेको गीत हो। त्यसअघि पनि दशैं गीत नबनेका हैनन्। त्यसपछि पनि दशैं गीत थुप्रै बनेका छन्।

तर यो गीतचाहिँ दशैं को पर्यायवाचीजस्तो भयो। पर्वलाई पनि परिचित गराउने। यस्तो हुनुको कारणचाहिँ यो स्तरको गीत अरु नबनेरै हो। यसलाई रिप्लेस गराउने अर्को गीत अब हाम्रै टिम लाग्यौं भने पनि बनाउन सक्दैनौँ होला। जीवनमा थुप्रै गीतमा संगीत गरेँ। तर मेरो जीवन सार्थकचाहिँ यही गीत बनायो कि जस्तो लाग्छ।

हरेक चिजको आफ्नै आयु हुन्छ। सर्टन टाइमपछि त्यो हराउँछ। तर सर्टन टाइमपछि पनि त्यसको चर्चा भइरहन्छ भने त्यो कालजयी हुन्छ। यसर्थ यो गीत कालजयी हो। किनकि २० वर्षपछि पनि उत्तिकै लोकप्रिय छ यो गीत। संगीत निर्माण गर्दा पर्वको प्रतिनिधित्व साथै यसको परिकल्पना, शब्दको प्रकृतिको संयोजनले गीतलाई स्थापित गर्यो।

मलाई यसको धुन निकाल्नै निकै गाह्रो परेको थियो। फरक फरक धुनको सिर्जना गर्दा उत्तिकै कठिन भएको थियो।

यसलाई उदीत नारायण झा, दीपा झा, नारायण लामा र जुना प्रसाइँ लगायत फरक फरक गायक/गायिकाले गाउनुभयो।

यो गीत मेरो लागि सधैं प्रिय छ।