दसैँको अवसरमा नेपालबाट आसाम पुगेका लोकप्रिय गायक प्रमोद खरेल र उनको ‘परम्परा ब्यान्ड’ ले नेपाली भाषी समुदायमाझ सांगीतिक उत्साह छरेका छन् । १९ र २० अक्टोबरमा आसामका सोनितपुर जिल्लाको लोखरा र उदालगुरीमा आयोजित कार्यक्रममा हजारौँ दर्शक सहभागी भएका थिए।
लोखरामा स्थानीयले असमिया संस्कृतिको प्रतीक ‘गम्छा’ र पाली समुदायले ‘ढाका टोपी’ लगाएर कलाकारलाई स्वागत गरेका थिए । स्वागतबाट भावुक बनेका गायक खरेलले स्टेजनजिकै आदिकवि भानुभक्त आचार्यको शालिक भेट्दा थप खुसी लागेको बताए ।
दुवै स्थानमा दर्शकको उल्लेख्य भिड थियो । दुई घण्टाभन्दा बढी चलेको कार्यक्रममा ब्यान्डले ‘ओए झुमा’, ‘लाई देऊ न मायाले’, ‘हङ्गामा भो कसम हङ्गामा भो’, ‘मेरो दिल छ पोखरामा’ र ‘सलल कर्णाली सलल’लगायत आफ्ना चर्चित गीत प्रस्तुत गर्यो । दर्शकको विशेष अनुरोधमा दिवंगत असमिया गायक जुबिन गार्गको चर्चित गीत ‘माया बिनी’ पनि प्रस्तुत गरिएको थियो, जसले कार्यक्रमलाई थप भावनात्मक बनायो ।
दर्शकको अत्यधिक भिडका कारण कार्यक्रमपछि खरेललाई भारतीय प्रहरीको सहयोगमा बाहिर निकालिएको थियो । आयोजकका अनुसार राति अबेरसम्म दर्शकले उत्साहपूर्वक सांगीतिक कार्यक्रमको आनन्द लिएका थिए ।
यसअघि सन् २०१८ मा आसामको पश्चिमी क्षेत्रमा प्रस्तुति दिएका खरेलले यसपटक मध्य आसाममा सांगीतिक यात्रा गरेका हुन् । नेपालबाहिर रहेर पनि नेपाली भाषा, कला, संस्कृति र संगीतप्रतिको प्रेम आसामका नेपाली समुदायमा प्रस्ट देखिएको खरेलले बताए । स्थानीयको न्यानो आतिथ्यता र दर्शकको मायाले आफूहरूलाई थप उत्साहित बनाएको उनको भनाइ छ ।
दसैँका अवसरमा आयोजित यस सांगीतिक यात्राले नेपाली संगीतमार्फत नेपाल र आसामका नेपाली भाषी समुदायबीचको आत्मीय सम्बन्धलाई थप प्रगाढ बनाएको आयोजकले जनाएको छ ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
