भैरहवा– बैंकहरुले अत्याधिक रुपमा ब्याज बढाएको भन्दै उद्योग व्यवसायी सडकमा उत्रिएका छन्। न्यून ब्याजदरमा लिएको कर्जाको ब्याज बैंकले एकाएक अत्याधिक रुपमा वृद्धि गरेको भन्दै उद्योगी व्यवसायी सडकमा उत्रिएका हुन्।
बैंकहरुले १६ दशमलब ७५ प्रतिशतसम्म ब्याज वृद्धि गरेका छन्। बैंकहरुले आफूखुसी बढाएको ब्याजका कारण आफूहरु मर्कामा परेको भन्दै ब्याज दर घटाउन माग गरेका छन्। बैंकहरुले ब्याज बढाउँदा उत्पादन लागतसमेत बढ्ने भएकाले त्यसको प्रत्यक्ष मारमा सर्वसाधरणहरु पनि परेका छन्।
‘ब्याजदर बढेपछि उत्पादनको लागत स्वभाविक रुपमा बढ्दै गएको छ’, उद्योग व्यापार संगठन रुपन्देहीका अध्यक्ष नारायण प्रसाद भण्डारीले भने, ‘जसको मारमा सर्वसाधरणसँगै बजारमा विदेशी उत्पादनसँग प्रतिष्पर्धा गर्न आफूहरुलाई पनि समस्या परेको छ।’
बैँकहरुले तरलता लगायतका विभिन्न बहाना बनाएर उद्योगीहरुको ढाड सेक्ने गरी अत्याधिक ब्याजदर बढाएको व्यवसायीहरुले गुनासो गरे। बैंकहरुले आफूखुसी रुपमा ब्याजदर बढाउँदासम्म नेपाल राष्ट्र बैंकले ब्याजदर वृद्धिका विषयमा कुनै नियमन तथा कारबाही प्रक्रिया अगाडि नबढाएकोमा व्यवसायीहरुले आक्रोश पोखेका छन्।
शुक्रबार भैरहवाका उद्योगी व्यवसायीहरुले अत्याधिक रुपमा बढेको ब्याजदर घटाउने सम्बन्धमा राष्ट्र बैंकले चासो नदिएको भन्दै राष्ट्र बैंकको क्षेत्रिय कार्यालय भैरहवा घेराउ गरेका छन्। यसअघि व्यवसायीहरुले ब्याज दर घटाउन माग गर्दै राष्ट्र बैंकको क्षेत्रीय कार्यालयमार्फत गर्भनरलाई ज्ञापनपत्र बुझाएका थिए। सोपश्चात् पनि राष्ट्र बैंकबाट कुनै सुनुवाइ नभएपछि व्यवसायीहरुले आन्दोलनका कार्यक्रम अगाडि बढाउँदै शुक्रबार भैरहवाको बुद्धचोकबाट विरोध र्यालीसहित बैंक पुगेर घेराउ गरेका हुन्।
‘व्यवसायीहरुले १० रुपैयाँको वस्तुलाई १२ रुपैयाँमा बिक्री गर्दा कालोबजारी ऐनअन्तर्गत जेल हालिन्छ तर ७ प्रतिशतको ब्याज एकै पटक १६ दशमलव ७५ प्रतिशतसम्म पुर्याउँदा बैंकहरुलाई त्यो ऐन लाग्दैन?’, अध्यक्ष भण्डारीले प्रश्न गरे।
व्यवसायीहरुले बैंकको ब्याजदर ९ प्रतिशतमा झार्न राष्ट्र बैंकलाई आग्रह गरेका छन्। सिद्धार्थ उद्योग वाणिज्य संघका अध्यक्ष कुलप्रसाद न्यौपानेले पनि बैंकहरुले अत्याधिक रुपमा ब्याज बढाउँदा उद्योगी व्यवसायीहरु मर्कामा परेको बताए। उनले बैंकहरुले निक्षेप संकलनको नाममा १०÷११ प्रतिशतसम्म ब्याज दिँदा उद्योग व्यवसायमा लगानीको वातावरण हराउँदै गएको दाबी गरे।
‘सरकारको यो नीतिले उद्यमशीलताको विकास हुँदैन’, उनले भने, ‘निक्षेपको ब्याजदर नघटेमा पैसा भएका व्यक्तिहरु उद्योग व्यवसायतर्फ आकर्षित नभई बैंकको ब्याजले नै सहज जीवनयापनतर्फ लम्किछन्।’
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
